Удмуртъёслэн 14-тӥ ӧтчамзэс ортчытон пумысен оргкомитет люкаськылӥз

Ангелина Снигирева
By Ангелина Снигирева 11 ноября, 2020 15:02
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ӝоген, декабре, ортчыны кулэ вань удмуртъёслэн 14-тӥ ӧтчамзы. «Удмурт Кенеш» огазеяськонлэн кивалтӥсез Татьяна Ишматова валтэмъя, толон люкаськылӥз съездэз радъянъя оргкомитет.

Оргкомитетын съезд пумысен верасько.
Фото: Удмурт Кенеш

Оргкомитетэ пыриськизы «Удмурт Кенеш» огазеяськонлэн исполкомезлэн ёзчиосыз, пӧртэм удысъёс понна кыл кутӥсьёс. Татьяна Ишматова пусйиз туэ съездэз ортчытон ласянь кылдӥсь шуг-секытъёсты. Вал, пе, дэмланъёс съездэз онлайн но ортчыны. Но кызьы онлайн ортчытод 400-лэсь трос муртэ огазеясь ужрадэз? Кызьы съездлэн ужаз пыриськозы гуртъёсысь делегатъёс?

Озьы пӧртэм дэмланъёсты, малпанъёсты лыдэ басьтыса, съездэз зэмос залын ик ортчытыны чакламын. Элькунамы туннэ нуналлы сыӵе зал — Ижысь «Аксион» культура юртын. Отчы вань делегатъёсты дистанциез лыдэ басьтыса пуктыны луоно.

Котькуд съездын сямен, таяз но валтӥсь доклад лэсьтоз «Удмурт Кенеш» огазеяськонлэн кивалтӥсез. Татьяна Ишматова шараялоз удмурт движениысь берло аръёссэ вормонъёсты но, шуг-секытъёс но. Анализ лэсьтӥськоз — нош быдэсмизы-а 4 ар талэсь азьло пуктэм ужпумъёс? Мар люкетӥз?

Оргкомитет огкылэ вуиз: валтӥсь доклад бере кыл сётоно дышетонъя, культурая, нациосын ужан политикая министръёслы. Соос шугъяськытӥсь ужпумъёсъя но огъя югдуръя вераськозы.

Оргкомитетын съезд пумысен верасько.
Фото: Удмурт Кенеш

Съездлэн кыкетӥ люкетаз уж мыноз секциосъя. Оргкомитетын чаклазы, ӧтчамын азьвыллэсь тросгес секция луыны кулэ. Огласянь, тросгес ужпумъёс эскериськозы. Мукет ласянь, адямиос пандемияя куронъёсты лыдэс басьтыса, пичигес группаосын ужаны быгатозы. Озьы съездын луозы дышетонъя, культурая, иворъёсты вӧлмытон ёзъёсъя, туризмъя, кыл политикая, семья ужпумъёсъя, егитъёслэн ужпумъёссыя секциос.

Оргкомитетын ик юнматэмын вал та секциослэсь ужзэс радъян понна кыл кутӥсьёс.

Съездлэсь резолюцизэ дасян бордын уж али ик мынэ ни. Ӧтчам дыръя отчы ватсанъёс пыртэмын луозы на.

Елена Васильева

Ангелина Снигирева
By Ангелина Снигирева 11 ноября, 2020 15:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<