Тымет улӟоз

Ангелина Снигирева
By Ангелина Снигирева 16 ноября, 2020 10:37
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Вавожысь тыметэз чылкытатон кылем арысен мынэ. Гуртоос солы шумпото, угось ӵыпет шутэтскон интылы пӧрмоз. Но чылкытатон ужъёс токма медаз луэ шуыса, шурез чылкыт возёно.

Тыметын али техника ужа
Туспуктэм Инкуазез утёнъя но инкуазь узырлыкъя министерство

Изъянтӥсь

Ува шур кутске Ува ёросысен, вузэ Вавож ёросэтӥ нуэ, собере Вала шурен огазеяське. Шур вылысь калык тол но, гужем но уг бырылы ке, Вавожысь тыметэ калык пыдзэ ик уг лёга, шуыны луоз. Гуртоос тыметысь кӧш зын лыктэ, ву вылэ кӧё-вӧё шобрет кылдэ, чорыг кулэ шуыса ӝожтӥсько. Тымет сумедэн тырмиз, лазегомиз, турынэн шобырскиз. Таӵе югдур ог 10 арлэсь кема кыстӥське ни. Нош арлыдоос тодазы ваё на, азьвыл шуразы кисло-куслоос но каръясько вылэм шуыса. Тодӥсьёсыз шуозы: ракъёсты чылкыт вуысь гинэ пумиталод.

Калык верамъя, шурез кырсёмыто Ува каргуртысь заводъёс, соос шуре дырын-дырын кырсь вузэс кисьтало, пе. Вавожъёс ёрос администрацие, полицие, инкуазез утёнъя ведомствоосы, прокуратурае, ёрос газетэ гожтэтъёс ысъязы. Ёросысь депутатъёсын, газетчиосын валче та ужез вырӟытыны луиз. Калык куремъя шурез эскерыны трос пол поталлязы Росприроднадзорысь специалистъёс.

Ведомстволэн кивалтӥсез Иван Мокшанов верамъя, Ува шурез кырсёмытэ «Ува-молоко» предприятие. Берло 5 ар ӵоже шурез эскерыны ведомствоысь специалистъёс 8 пол потазы. Предприятиез кыл кутон улэ 10 пол кыскылэмын ни, ог 4 миллион 800 сюрс манет тыр штрафъёс тупатэмын. Предприятие тужгес зол шурез кырсёмытӥз, пе, 2017-тӥ арозь. Отӥяз, чылкытатӥсь сооружениос пуктэмзы бере, шуре кырсь ӧжытгес вуыны кутскиз. 2020-тӥ арын ортчытэм эскеронъёс, вуын кышкыт суретъёс вань шуыса, ӧз возьматэ.

Бадӟым осконъёс

Ува шурез чылкытатон ужпумез «Экология» нацпроектэ пыртӥзы. Тыметэз чылкытатон кутскиз 2019-тӥ арын гужем, соку тыметын вуэз возьыны юрттӥсь сооружениез выльдӥзы. Та вакытэ тыметлэсь пыдэссэ но шурлэсь ӧрзэ чылкытато. Инкуазез утёнъя но инкуазь узырлыкъя министр Денис Удалов верамъя, оглом чылкытатэмын луоз шурлэн 4,4 иськемез. Талы 72 миллион манет висъямын. Ужез йылпумъяны чакламын 2022-тӥ арын.

Шурез утялтэ «Дельта-строй» предприятие. Солэн директорез Александр Чебыкин верамъя, али ӵыпет быдэсак гудэмын, отын экскаватор ужа, машинаос сумедзэ полигонэ потто. Отысь музъем 3-тӥ классысь отход лыдъяське, соин ик сое уже кутыны уг яра, пе. Чылкытатӥськон 2020-тӥ арозь чакламын ке но, ужъёсты вазьгес быдтыны луонлыкъёс вань, шуэ А. Чебыкин.

Тыметэз чылкытатӥзы ке, шур котырез утялтыны кутскозы, шуэ Вавож ёрослэн йырыз Олег Овчинников. Гуртоос кемалась пляж куро ини. Калыклэсь мылкыдъёссэ но малпанъёссэ санэ басьтыны тыршом, вераз кивалтӥсь.

Ангелина Снигирёва

Ангелина Снигирева
By Ангелина Снигирева 16 ноября, 2020 10:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<