Оӵ карлэн вӧсь интыосыз

Ангелина Снигирева
By Ангелина Снигирева 19 ноября, 2020 15:28

Кыӵе вашкала удмурт пытьыосты шедьтыны луэ Ижын?

Туэ Ижевсклы 260 ар тырмонэз пусйим. Городлэсь кутсконзэ герӟало 1760-тӥ арен, завод кылдэмен. Но та дырозь но Ижкар интыын сылӥзы удмурт но ӟуч гуртъёс, ортчылӥзы вӧсяськонъёс, пӧзизы трос чылкыт ошмесъёс. Ижкарлэн нимыз но удмурт «оӵ» кыллэсь потэмын.

Ижысь Кызьпу арамаын удмуртъёс вӧсяськылӥзы. Али татын буре ваён из пуктэмын. Туспуктӥз Максим Егоров

Чудӟа удмуртъёс

Туала Ижкар интыын адямиос улӥзы ини неолит вакытэ. Неолит эпохаысь арбериос шедьтэмын Кам шур дурын, Дэри ёросысь Поварёнка (Поваренки) но Рычино гуртъёсын. 3-тӥ-5-тӥ дауръёсы та интыын улӥзы фин-угор калыкъёс (мазунинской культура). Археологической памятникъёс пӧлы пыро Карлутка шур дурысь 2 вашкала каръёс, «Нефтемаш» завод сьӧрысь стадион интыысь гуӵин (селище), Подборенка шур дурысь вашкала шай (али татын интыяське Пиналъёслэн но егитъёслэн творчествозыя дворец).

16-тӥ дауре Иж музъем вылын адямиос улӥзы шуыса тодӥськомы Иж шурлэн ярдурысьтыз шедьтэм кладлы луыса. Кладын вал азвесь подвеска но Иван Грозный эксэй кивалтэм вакытысь (1533-тӥ-1584-тӥ аръёс) 219 манетъёс.

1582-тӥ арын Иван Грозный грамота келям ар князьлэн, Явушлэн, выжыезлы Багиш Яушевлы: солы оскемын вал Иж шур дурысь музъемъёсын кивалтыны. Но кӧня ке ар ортчыса, Фёдор Иванович эксэй выль грамота ыстэм: соя Багиш но Култуш агай-вынъёслы удмуртъёсты исаны лэзиллямтэ.

1711-тӥ-1716-тӥ аръёсысь Ландратской переписез учконо ке, Иж, Постол, Поӟым, Кечешур шуръёс йылысь, Шаркан, Кивар, Бадӟым но Пичи Вотка, Сюр шуръёс дурысь гуртъёс «Пронкина сотня Янмурзина» нимын огазеямын вал (ачиз Пронка Янмурзин улэм Лодзя гуртын (туала Лудӟи гурт). Маргарита Гришкина историк лыдъямъя, татын 4 сюрс 548 адями улэм, пӧлазы тросэз удмуртъёс вылӥллям. 1716-тӥ арысь документэз учконо ке, туала Ижкар котырын трос вашкала гуртъёс интыяськиллям: Егад-Чюдья (Ягул-Чудӟаез озьы янгышен гожъяллям ӟуч писарьёс), со ик Подборное, Чюдья, со ик Завьялово, Чюмашур, Вожой-Чудья (али Вожой), Вуки-Чюдья (али Шаберды), Козмесь (али Вуж Казьмас). Гурт нимъёсты учконо ке, та гуртъёсын Чудӟа (Шудья, Шудӟа, Чудья) воршудысь удмуртъёс улӥллям.

Но пумен югдур воштӥськиз. 1711-тӥ-1716-тӥ аръёсы, ваньмыз ӧвӧлэз 5 ар ӵоже, 10 гуртъёс но починокъёс быризы (6-яз удмуртъёс уло вал). Кылдӥзы 11 гуртъёс, но 4-ез гинэ удмурт вал. Таӵе воштӥськонъёслэн мугзы кӧня ке вал. Калык мукет интые улыны кошкылӥз, черъёсын сэрен трос адямиос кулылӥзы, матысь башкиръёс бугыръяськылӥзы. Калыклэсь лыдзэ ичиятыса гожъязы на ӧжытгес налог тырон понна. 1740-тӥ арын потэм указъя калыкъёсты христианствое пыртыны косэмын вал, нош 1760-тӥ арын кылдӥз Ижысь корт дурон завод.

Кытчы ышизы
гуртъёс?

Ягул (Егад-Чудья, Подборное) гурт сярысь гожтыса кельтэмын Ландратской переписьын. Соку татын удмуртъёс улӥллям, 7 юртъер сылэм. 1876-тӥ арын — 26 юртъер, 226 адями вылэм ини. Подборное гуртлэн, Подборенской шурлэн нимзы (али Подборенка шур) удмурт кылысь ӟуче калька амалэн выжтэмын. Удмурт нимъёс ӟуч калыклы валантэм вал, соин соосты ӵемысь берыктылӥзы (озьы ик Дэри ёросысь Гондыр гурт Медведево пӧрмиз, Вавож ёросысь Атас гурт — Петуховолы).

Карлутка шур кузя интыяськизы Карлутка, Русская Карлутка, Удмуртская Карлутка гуртъёс. Карлутка ним карысь вӧсяськон инты (луд) шуэмысь потэмын.

Пророко-Ильинской черклэн 1768-тӥ арысь кылем документаз Перепечина нимо удмурт гурт пумиське на. Бӧрысь сое Александрово, Кирхнеров починка шуыса пусйылӥзы. Али та гурт Ижкарлэн оглюкетэз луэ, со пала нуэ Ленинской районысь Александровской ульча. Нош Татарбазар шуон интыысь Ключевской урам палан куке но вылэм Ключи починка.

Ижкар пумен паськытамен, гуртъёс карта вылысь быризы. Карлутка гуртысь, Вужгуртысь (со интыяськиз али Карл Маркс нимо ульча палан) улӥсьёс мукет интые кошкизы яке Ижево гуртысь калыкен сураськизы. Перепечина но Ключи гуртъёс пумен Ижкаре пыризы. Со музъемез, кытын Ягул но Чимашур (Чюмашур) гуртъёс сылӥзы, ӵыпет басьтӥз. Отысь улӥсьёсыз палэнэ кошкизы — али Ижлы матын сыло Ягул но Чемошур гуртъёс.

Сураськизы, ӟучомизы

1823-тӥ арын Иж заводын (озьы нимаськиз ужасьёслэн каргуртсы) пуктэмын вал Александр Невскийлы собор. 1830-тӥ аръёсысь документэз учконо ке, та соборе ветлӥз Карлутка, Русская Картлутка (Зелёная Роща) но Вотская (Удмуртская) Карлутка гуртъёсысь калык. 1912-тӥ арын та соборе 19 сюрс 481 ӟучъёс, 1 сюрс 24 удмуртъёс ветлӥллям. Николаевской черке (пуктэмын 1859-тӥ арын) — 5 сюрс 181 ӟучъёс но 1 сюрс 453 удмуртъёс. Покровской черке (пуктэмын 1910-тӥ арын) — 5 сюрс 122 ӟучъёс но 1 сюрс 493 удмуртъёс.

«Гудыри» газетлэн 1925-тӥ арын потэм номераз А. Симонов гожтэ: Ижын улӥсь пересь ӟучъёс верамъя, азьло Ижкарез Ыжгурт нималлям. Нош «Ватка но Калмез» книгае (потэмын 1971-тӥ арын, люказы Н. Кралина, П. Поздеев, П. Яшин) пыртэмын Ильинской черкысь 94 аресъем попадьялэн тодэ ваёнъёсыз:

«Мон пичи дыръя али «За увалом» шуон интыез «Подгорная» шуо вал. Отын урамаз ваньмыз удмуртъёс улӥзы. Удмурт кышноос пельшетэн, чалмаен, кузь дэремен ветло вал. Старая (али Карл Маркс ульча) но Курёная (али Красной урам) ульчаосын ӝыныез удмуртъёс уло вал, улон сямзы та ульчаосысь удмуртъёслэн но ӟуч сямен кошке вал. Карлутка выллапалан удмуртъёслэсь кереметсэс-куалазэс вӧтам кадь тодӥсько на».

Пересь кышномуртлэсь юаллям, малы Ижкарын удмуртъёс ӟучомиллям шуыса. Со таӵе валэктон сётэм:

«Заводэз бадӟым карыны кутскизы. Удмуртъёс ваньмыз отчы ужаны пыризы, музъемзэс гыремысь дугдӥзы. Собере ӟучез удмурт, удмуртэз ӟуч кышно басьтыны кутскизы. Эксэй дыръя немецъёсты, бельгиецъёсты мастере ыстӥзы. Лыктэм солдатъёс, кема улыса, удмурт кышноосты басьтӥзы. Озьы сураськыса, удмуртъёс ӟуче потӥзы».

Арамаез утёно

Ижысь шаерчи Анатолий Новиков верамъя, Карлутка шур кузя удмуртъёслэн кӧня ке вӧсяськон интыоссы вылӥллям. Холодный ключ шуон интыын ӝужыт тыпы будэм — со вӧзын удмуртъёс вӧсяськиллям, сям-йылолъёс ортчытъяллям. Туала Авангардной ульча вӧзын ӝужыт вӧсяськон пужым сылэм. Со вылэ тубыса, Колтома районэз но адӟыны луэ, пе, вал.

Удмуртъёс вӧсяськылӥллям Карлутка шурлэн паллян ярдураз, Лудын (яке Кереметын) — али та интыез Кызьпу арама шуо, калыкын Козий парк нимало на. Та интыын юртъёс ноку ӧз ӝутскылэ: адямиос вашкала вӧсь интыосы пуктӥськыны кышкаллязы. Вашкала языческой интыез вӧсян вылысь Луд вӧзы православной часовня пуктӥзы.

Кызьпу арама — удмуртъёс понна туж дуно инты. Татын али но возиське инкуазь, история но культура, удмуртъёслэн вашкала осконзы. Арамае пуктэм буре ваён из вылын гожтэмын: «Удмурт калыклэн вашкала вӧсяськон интыез та Карлуд». Берло 20 ар ӵоже арамаын ортчыло удмурт вӧсяськонъёс, праздникъёс: Гуждор, Гербер, Виль… Кызьпу арамаын ортчылӥсь Гербер праздник удмуртъёслэсь данзэс ӝутэ, городысь удмурт культураез возе, сое туала улонэ пыртэ, пӧртэм выжыосысь адямиосты огазея. Соин Кызьпу арамаез одно ик утялтоно, удмурт праздникъёс ортчытъяны инты чакласа, выльдоно, чебер кароно, чылкыт возёно.

________

Надежда ШУТОВА, история наукаосъя доктор, РАН-лэн Урал ёзэтысьтыз Удмурт федерал тодослыко центрлэн Историяя, кылъя но литературая Удмурт институтысьтыз тодосчи

Ангелина Снигирева
By Ангелина Снигирева 19 ноября, 2020 15:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<