Кун Кенешлэн 29-тӥ сессиез: Коронавирус, Удмуртилэн бюджетэз но Йӧскалык печатьлэн нуналыз

Удмурт Дунне
By Удмурт Дунне 26 ноября, 2020 13:02

24-тӥ ноябре Кун Кенешлэн 29-тӥ сессиез ортчиз. Эскеремын 18 ужпумъёс, пӧлысьтызы 10-эз герӟаськемын элькун законъёслэн проектъёсынызы. Сессилэн ужаз пыриськиз Удмуртилэн Тӧроез Александр Бречалов.

Кун Кенешын эскеремын 18 ужпумъёс, пӧлысьтызы 10-эз герӟаськемын элькун законъёслэн проектъёсынызы.
Туспуктэм: udmgossovet.ru

Висисьёс уг кулэсмо на

Александр Бречалов депутатъёсты тодматӥз коронавирус котырын кылдэм югдурез. Пусйиз: доразы ковидлэсь йӧнатӥськисьёслы дунтэк эмъюмъёс сётъяны кутскемын — талы 60 миллион манет висъямын. Нош больницаосын 3 сюрс 2 койка усьтэмын, со пӧлысь 651-эз али буш. Но Минздрав азе али курон пуктэмын: 65 ареслэсь бадӟымъёсты койкае выдтоно, висёнлэсь муре пыӵамзэ возьматэк. Удмуртилэн Тӧроез лыдъя: шаерысьтымы эмъясьёс секыт ке но, ужзэс быдэстыны вормо. Кылыдтэмын ни доразы йӧнатӥськисьёсты чаклась 145 бригада.

— Черламъёслэн лыдзы та вакытэ октябре кадь ӝог уг йылы ни ке но, уг но кулэсмы, — пусйиз Тӧро. — Оло, со герӟаськемын тросгес тестъёс лэсьтыны кутскемен: ог ӝыны ар талэсь азьло нуналскын 1 сюрс 500 эскеронъёс ортчытӥсько вал, али — 6 сюрс пала.

Матысь дыре шаерамы ковидлы пумит 1 сюрс 300 пала вакцина вуыны кулэ. Вазенгес 42-сэ басьтӥм ни — соос пуктылэмын эмъясьёслы, ваньзылэн тазалыксы умой. Вуоноез вакцина озьы ик эмъясьёслы чакламын.

Нырысетӥ лыдӟемен юнматэмын элькунмылэн вуоно арлы бюджетэз. Чакламъя солэн доход люкетэз 65 миллиард 935 миллион манет, расход люкетэз 65 миллиард 959 миллион манет луоз, дефицитэз — 24 миллион манет.
Туспуктэм: udmgossovet.ru

Лыктӥз чечыен

— Элькун бюджетлэн доход но расход люкетъёсыз шӧдскымон кулэсмизы — таӵеез ӧй вал, — пусйиз А. Бечалов, экономикаын югдур сярысь вераса. — Но асьмеос огкылэ вуим: мар чакламы вал, ваньзэ быдэстоно. Бен, секыт луоз. Но дэмен сюлмаськоно казнае тросгес уксё пыртон, инвесторъёсты кыскон сярысь. Кемалась ӧвӧл Москваын кылзӥзы Удмуртиез 2020-тӥ — 2030-тӥ аръёсы азинтон стратегиез — со бордын асьмеос ваньмы дэмен ужамы. Ушъязы! Бен, со али бумага вылын гинэ, но нырысетӥ вамыш лэсьтэмын.

А. Бречалов сессие вуиз чечыен — туж чебер упаковкаын, вылаз кунгожсьӧр кылъёсын гожтэмын. Та чечы Каракулино ёросысь Вятское черкогуртысь Николай Сапаевлэн вылэм. Егит ужбергатӥсь «Агростартап» программая туэ 3 миллион манет утӥз муш вордонзэ азинтыны тӥрлык басьтыны шуыса. Кӧня ке толэзь куспын вуззэ кунгожсьӧрозь, Швейцариозь, вуттӥз!

— 2021-тӥ ар — Гуртлэн арез. Отысь сюресъёсты тупатонлы 2 поллы тросгес уксё чакламын. Азинтӥськозы чагыр эстӥськон, Интернет пыртон. Валтӥсь интые потоз гуртлэсь экономиказэ ӝутон. Возьмано ӧвӧл ӟеч вакытъёслэсь вуэмзэс. Тужгес умоез вакыт — али! Николай Сапаев кадь адямиос тае валало, мукетъёсызлы но ужаны мылкыд сёто, — шуиз Тӧро.

Профицит но дефицит

Нырысетӥ лыдӟемен юнматэмын элькунмылэн вуоно арлы бюджетэз. Чакламъя солэн доход люкетэз 65 миллиард 935 миллион манет, расход люкетэз 65 миллиард 959 миллион манет луоз, дефицитэз — 24 миллион манет.

Лыдпусъёс уг шумпотто. Кылсярысь, 2020-тӥ арлы бюджет 970 миллион манет профицитэн кутэмын вал.

— Коронавирус вӧлмемен, югдур чылкак воштӥськиз, — вераз коньдон ужпумъёсъя министр Вера Сухих. — Матысь ог 3 арзэ выльысь ӧре пырыны кулэ луоз.

Со верамъя ик, казнае ятырез, ог 51 миллиард манетэз пырыны кулэ вытъёс чотын. Федерал казнаысь 14 но ӝыны миллиард манет возьмаськом. Но та лыдпус будыны быгатоз на, угось Россилэн вуоно арлы бюджетэз юнматымтэ на.

Расход люкетысь ятырез уксё кошкоз калыклы улон-вылонын юрттэт сётонлы, уждун тыронлы. Уксё пичиен-пичиен люкылэмын вань удысъёслы, но тырмыт ӧвӧл. Соин депутатъёс оско, 2-тӥ лыдӟемен юнматытозь, лыдпусъёс йылозы на. Вуоно сессиозь та ужпумез вылысь эскерозы на вань ялан ужась комиссиосын, фракциосын.

Кун Кенешысь Наукая, дышетонъя, культурая, нациосын но егитъёсын ужан политикая ялан ужась комиссилэн кивалтӥсез Татьяна Ишматова депутатъёсты, анай кылынымы вераськыса, тодматӥз «Праздникъёс но дано нуналъёс сярысь» законлэн проектэныз.
Туспуктэм: udmgossovet.ru

Йӧскалык печатьлэн нуналыз

Таӵеез ӧй вал на: сессия дыръя вераськон мынӥз удмурт кылын. Кун Кенешысь Наукая, дышетонъя, культурая, нациосын но егитъёсын ужан политикая ялан ужась комиссилэн кивалтӥсез Татьяна Ишматова депутатъёсты, анай кылынымы вераськыса, тодматӥз «Праздникъёс но дано нуналъёс сярысь» законлэн проектэныз. Та рад со 2-тӥ лыдӟемен учкемын но юнматэмын ни.

— 1-тӥ лыдӟемен учкем бере, эшшо ӵектонъёс вуизы на, — пусйиз Т. Ишматова. — Озьы 14 праздникъёс но 19 дано нуналъёс луизы. Чылкак вылез праздник — Йӧскалык печатьлэн нуналыз, пусъёмы сое 4-тӥ феврале. Ӵапак та нуналэ 1915-тӥ арын потӥз нырысетӥ удмурт газет — «Войнаысь ивор». Туала «Удмурт дунне» газет историзэ со бордысен лыдъя.

Элина Кумачёва

Удмурт Дунне
By Удмурт Дунне 26 ноября, 2020 13:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<