Кибашлыос луозы ужбергатӥсьёс…

Али Удмуртиын пӧртэм интыосын киужъёсъя 23 муниципал юртъёс но центръёс ужало. Бюджетэз шыръян вылысь муниципалитетъёслы ӵектэмын та учреждениослэсь ужзэс выль сямен радъяны. Соос туризмез, культураез азинтӥсь автономной некоммерческой огазеяськонъёслы пӧрмыны кулэ. Удмуртиысь Правительстволэн Тӧроезлэн воштӥсез Анатолий Строков пусйиз:

— Кун чотын улӥсь муниципал учреждениос грантовой юрттэт басьтыны уг быгато. Автономной организация кариськыса, киужъёсъя юртъёс Удмуртилэн яке муниципал кылдытэтлэн бюджетысьтыз субсидия басьтыны быгатозы, со сяна, грант утон понна конкурсъёсы пыриськемзы луоз. Озьы асьмеос быгатомы шаерысьтымы кибашлыослэсь ужъёссэс Удмуртилэн палэназ но вӧлмытыны. Та дыре киужъёсъя юртъёсысь кивалтӥсьёслы, кибашлыослы чаклам акселератор ужзэ азьланьтэ, — шуиз Анатолий Строков.

«Бизнес-акселератор. Ремёсла» курс ужзэ мытӥз кылем толэзе. 2 толэзь ӵоже киужъёсъя юртъёсысь кибашлыос, кивалтӥсьёс дышетско выль сямен ужаны, ужбергатонэн вырыны, продукцизэс вотэсын вӧлмытыны. Пичи Пурга ёросысь Вуж Мӧнья гуртысь киужъёсъя юртлэн кивалтӥсез Марина Орлова верамъя, акселератор тунсыко ортче. Но киужъёсъя юртъёсты культура удысысь ужбергатонэ выжтон понна тросгес дыр кулэ.

2 толэзь ӵоже киужъёсъя юртъёсысь кибашлыос, кивалтӥсьёс дышетско выль сямен ужаны, ужбергатонэн вырыны, продукцизэс вотэсын вӧлмытыны.

— Ваньзэ тупен-тупен, но ӝог лэсьтоно. Трос юанъёс кылдо. Шуом, киужъёсъя юртъёслы тросгес продукция поттыны ӵекто. Со понна кулэ трос ужан тӥрлык, паськытгес инты. Пӧртэм ёросъёсын таин югдур пӧртэм, — шуэ М. Орлова.

Туризмез азинтыса, сувениръёс лэсьтыса, уз кыльы-а палэнэ калык культураез, киужъёсты улӟытон, утён, эскерон но азинтон? Та юан троссэ сюлэмшугъяськытэ. Та дыре Удмуртиысь Экономикая, Культурая, Нациосын ужан политикая министерствоосысь специалистъёс, Туризмъя но киужъёсъя элькун центрысь, Калык творчествоя элькун коркась методистъёс ёросъёсын валче ужало, воштӥськонъёс пайдаен гинэ, ӟеч лэсьтэм ужез куашкатытэк, мед ортчозы шуыса.

Виктория Крамова