Бесерманъёс кыре-буре пото

Ангелина Снигирева
By Ангелина Снигирева 11 ноября, 2020 09:35

Шаерысьтымы бесерман огазеяськонэн 10 арлэсь ятыр кивалтэ Сергей Антуганов. Огазеяськонзылы туэ 30 ар тырмиз, та дыр ӵоже 5 гуртын бесерман культурая центръёс усьтэмын, берло ар куспын гинэ 2 выль коллектив кылдӥз.

Бесерман огазеяськонэн кивалтӥсь С. Антуганов 
калык дӥсенызы тодматэ.
«Ми бесерманъёс» огинлэн «ВКонтакте» бамысьтыз

Бесерманъёс Россиысь ичи лыдъем калыкъёс пӧлы пыро, 2010-тӥ арын ортчытэм переписья соослэн лыдзы 2 сюрс 200 адями гинэ кылемын, ӝыныез пала асьме шаерын уло, тросгес — Удмуртилэн уйпал ёросъёсаз, удмуртлы укшась кылын верасько. Та калыкен тодматскон вылысь нимысьтыз маршрутъёс кылдытэмын. Юкаменск ёросысь Пышкизь гуртын ужало «Вунонтэм сюресъёс», Шамардан гуртын — «Бесерманъёслэн узырлыксы. Татын милям выжымы» турмаршрутъёс. Нимысьтыз бесерман центръёс кылдытэмын Балезино ёросысь Юндыын, Глаз ёросысь Отогуртын, Яр ёросысь Вортчаын, улӟытэмын Кӧрбан праздник но Юнды-базар, Вортчаын ужа нылпиослэн «Колёса-питран» этнотеатрзы. Спектакльёс пуктэм сяна, театр Михаил Федотовлэсь кылбуръёссэ лыдӟонъя видеомарафон ортчытъя.

Кылем арын Юкаменскын бесерман калыклэн лулчеберетэзлы сӥзем нырысетӥез улосвылкуспо фольклор фестиваль ортчиз. Бесерман культураен тодматскон вакытэ 15-лэсь трос пӧртэм ужрадъёс вал. Отчы уйпал ёросъёсысь сяна, Эгра но Можга ёросъёсын улӥсь бесерманъёс вуылӥзы. Озьы ик пыриськиз Кун Кенешлэн Тӧроез Владимир Невоструев. Ас пал адямиенызы бесерманъёс туж данъясько.

Бесерман коллективъёс арлы быдэ мыло-кыдо пырисько Санкт-Петербургын ортчылӥсь ичи лыдъем фин-угор но самодийской калыкъёслэн фестивалязы. Шаерысьтымы ваньмыз сямен бесерман коллективъёс со ужрадэ черодэн пыриськизы ни, Юкаменск ёросысь Жувамысь «Жин-жин» коллективез вератэк. Кырӟам-верам сяна, та ужрад дыръя бесерманъёслэсь сюлмаськонъёссэс но шарае потто. Санкт-Петербурге туэ ветлӥз Юкаменск ёросысь Шамарданысь «Бесерман крезь» ансамбль. С. Антуганов шумпотэмын, кыре-буре потан вылысь берло аръёс куспын вань бесерман коллективъёслэсь дӥсьсэс выльдыны быгатӥзы шуыса.

— 10 ар ужатозям, бесерман калык воштӥськиз, бесерманъёс шаплыесьгес луизы кадь, асьсэ йылол-сямъёссэс сцена вылын быгатыса возьмато, — шуэ Сергей Серафимович. — Культура удысын ужасьёслы но тау карем потэ, соос но бесерманъёсты сайкатӥзы, шуыны луоз: сцена вылэ потто. Со вакытэ ик кӧт куректэ: арлыдоос пӧлысьтымы кошко, нош егитъёс дӥнямы лыктыны кепырало, бесерман кылын вераськисьёслэн лыдзы арысь аре кулэсме. Ачим мон Юкаменск ёросысь луисько, бесерман гуртъёсысь колхозъёс малы ке ваньмызлэсь вазь быризы, табере тросэз гуртъёс но карта вылын ӧвӧл ни.

Сергей Антуганов та дыре Глазов карын улэ, ог 4 ар талэсь азьло Юкаменск черкогуртысь атай юртаз «Бесерман улос» музей кылдытыны кутскиз. Адямиос, пе, корка котырысьтызы вашкала тӥрлыкъёссэс кушто, нош кузпалъёс Нина Семёновна но Сергей Серафимович соосты доразы люкало. Азбаразы пырыса ик, бесерманъёслэн улэм-вылэменызы тодматскыны луэ. Юртъер котырын кутӥськись тӥрлык, дӥськут нимаз-нимаз висъетъёсын лачак люкамын.

Валентина Емельянова

Ангелина Снигирева
By Ангелина Снигирева 11 ноября, 2020 09:35
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<