Ас улонэныз улэ

Ангелина Снигирева
By Ангелина Снигирева 29 ноября, 2020 10:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

«Анайлэн данэз» гадьпусэн пусъемын Вавож ёросысь Ӟамбай шор ёзо школаысь удмурт кылъя дышетӥсь, 4 нылпиослэн анайзы Вера Шихова.

Вавож ёросысь Ӟамбайысь Шиховъёс

Вера Андреевналэн быдэс улонэз герӟаськемын пиналъёсын. Аслэсьтыз-а, муртлэсьсэ-а — нокинэ уг висъя, ваньмызлы шунытсэ огкадь кузьманы тырше. Со милемлы ваньмылы анай кадь, шуо гуртысь нылпиос. Удмурт кылэз, сям-йылолъёсты пыӵатон бордын ужа. Ӟуч пиналъёсын нимысьтыз ужа, соос удмурт кылэз валаны ке но мед кутскозы шуыса. Вера Шиховалэн дышетэм пиналъёсыз гожъясько ёрос но элькун газетъёсы, олимпиадаосын но конкурсъёсын вормыло. Вера Андреевна ачиз но котыр ласянь адӟем карымон луэ: Гурт шудонъёсы мыло-кыдо пыриськылэ, вормонъёс басьтылэ. Творчество но спорт котыре со кыскыны быгатӥз аслэсьтыз вордэм нылпиоссэ но.

— Мамаенымы туж данъяськиськомы, — шуэ нылыз Ольга Краснова. — Милям ӧвӧл чупаськон-ӟыгыръяськон сяммы, озьы ке но тодӥсько, со милемыз ваньместы яратэ, котькудмы понна сюлмаське. Ялан паймисько: кызьы 1990-тӥ аръёсы милемыз будэтӥзы: ёрмыса, мисьтаськон машинатэк, подгузникъёстэк но мукет туала арбериостэк. Городэ дышетскыны кошкеммы бере шедьтылӥз луонлык сиён-юон-а, уксё-а келяны. Котьку но шӧдылӥ юрттэтсэ. Али но тодӥсько: котьмар мед луоз, маин быгатоз, ваньмыныз юрттоз.

Мама яратэ лыдӟиськыны. Книгаос котьку но дорын трос вал. Вань удмурт изданиослы котьку гожтӥське, соосты ужаз кутэ. Ярато папаен ӵош удмурт концертъёсы ветлыны. Бичаськыны яратэ. Куддыр уж дорозь но губияса вуттэ вал ини. Мамалы луыса мон ветлӥ: «Шундыкар» лагере. Весь со монэ ӝутказ, 7-тӥ классысен кутскыса, одӥг гужемез но ӧй кельты, сузэръёсы но собере мон сьӧры кыстӥськизы.

Уг тодӥськы кужмысь мар ке карыны косэмзэ. Вералоз, тазьы кулэ вал, озьы… Но ми, нылпиос, берпуметӥ решение асьмеос кутылӥм.

Семья кусыпъёсамы ноку но уг пыры, эмеспиосыз но кенэз сое гажало кадь потэ. Ваньмы ӵош бертӥськом ке, 18 кузя но люкаськом. Ваньместы быгатэ утялтыны, интыяны. Котьку но бертэм потыса бертӥсько. Тау шуэм потэ мамалы вордэмез, будэтэмез понна!

Бордаз итӥське Мария Репина нылыз но:

— Мон понна со лякыт, визьмо, ӟеч, ненег, но отын ик туж кужмо. Ноку но уг кесяськы вал, кесяськытэк валэктылӥз. Шуоз вал: мукет адямиос шоры эн учке, эн вожъяське, асьтэ улонэныды улэ.

Та куронъя Вера Андреевна ачиз но улэ. Гурт калык но Шиховъёсты туж гажа. Та семья гурт улонэ пыриське, ужрадъёслы мылкыд сётэ. Кинлы ке маке юрттоно ке, вань сюлмысьтыз юрттэ. Вера Андреевналэн туспуктэмез ёрослэн Данъян пул вылаз но ас вакытаз пыртэмын вал.

Елена Сараматова

Ангелина Снигирева
By Ангелина Снигирева 29 ноября, 2020 10:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<