Алла Кузнецова вордскем дырысен — 80 ар

Ангелина Снигирева
By Ангелина Снигирева 29 ноября, 2020 09:46
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
А. Кузнецова
Тулыс шор

Куакатолэзь берпум нуналъёсаз
Ортчыт шырыт шунытъёссэ киська
Нуныяськись музъем вылэ...
Турын-куарлэн
Небыт вож веньёсыз
Кыро муэз,
Бакакуарлэн
Зарни инӟыосыз
Пазяськемын ини ошмес дуре...
Кечсин чимыоссэ усьтэм нюлэс шорын.
Тюрагайёс Шунды-мумызылы шудзэс усьто.
Куазьлэсь
Ӧс кусыпсэ лёге гырон-кизён.
Улос котыр выльме,
Вордске вылез улон!

Бен, со но вордӥськиз таӵе дыре
Югыт дунне вылэ.
Куакатолэзь сое шунды сияз веттаз.
Тодӥз, вылды: та пи
Выль тулысаз вуттоз ас вакытаз,
Вужмем инмысь пересь кизилилы
Выль тылсизэ сётоз...


* * *
Пичи писпулэн
Вужерез но пичи.
Бадӟым писпулэн
Вужерез но бадӟым.
Пичи визь муртлэн
Йыружез но — янгыш.
Бадӟым визь муртлэн
Янгышез но — йыруж.
Оло, соин-а, эше,
Кенэм быдӟа янгыше
Тонэ бадӟым изэн пачкатэ?..


Маиз кельшымтэ?

Малы бакчаез кенерен котырто?
Пудо медам пыр шуыса.
Малы юртъерез тунгонэн ӵогало?
Урод адями медам пыр шуыса.
Гадяд но сюлмыд со понна ватэмын,
Котьма но кыре медам пот шуыса.
Мар вань сюлэмад,
Мар ӧвӧл сюлэмад,
Урод кыл йылэ медам шедь шуыса.

Нош мон бакчаме кенертэк возисько.
Ӧсэ но вӧлак усьтэмын.
Мар вань сюлэмам,
Мар ӧвӧл сюлэмам,
Ваньмыз калыке поттэмын.

Пудо но уг лёга мерттэм сяськаме.
Урод адями но уг кожа дорам.
Нош малы-о тон тэргаськод улонме?
Маиз кельшымтэ улонам?


* * *
Мон вордӥськи дунне вылэ
Салкым сӥзьыл уе.
Нордӥ выллем
Будӥ каллен.
Ож тыл сямен сутӥз монэ ӟырт тӧл.
Вӧсь луэмлэсь
Кӧдэктылӥз, оло, толэзь —
Урмылыса
Соку поръяз война.
Нош мон кыли улэп.

Мыным май гудыри
Данъя ошмес палме.
Кам шур секта кужым люкась вуэн.
Мон улӥсько,
Нылме, пиме будэтыса,
Сюлмысьтызы ӟеч мылкыдзэс
Шӧдэменым буйгатскыса.
Одӥг малпан гинэ
Уг сёт буйгатскыны:
Кулэ-а мон калыкелы?
Дунне вылын улэмелэн
Бадӟым-а пайдаез?
Кинлэсь-о юано?


* * *
Ӟоскыт дэремед.
Кымысад виштыос.
Чагыр вужеръёс синулад.
Куамын арлыдозь тон огнад улӥськод.
Ӝоген тод уд лу ни огнад.
Венез но секыт ук оген ӝутыны.
Шимес
Дуннеын нылпитэк улыны.
Соку кышномурт шудбуро ни —
Куке
Кулэ со луэ кинлы ке.
Чылкак воштӥськиз ни
Ветлон манеред...
Тыныд шумпотэ быдэс гурт!
Малы? Валамон.
Чеберлэсь но чебер
Нуны ваёно кышномурт.


* * *
Шудбур тӥлед!
Югыт дунне вылысь нылкышноос!
Шудбур гинэ медло тӥлед.
Шудлы сюрес медам луы сюбег.
Мед тӥ понна воректозы кизилиос.
Шунды-мумы мед тӥледлы юрттӥсь луоз.
Пыд улады мед сяськаос пурӟылозы,
Вуюисьёс серектозы...
Чебер улон гинэ тӥлед, нылкышноос!
Чагыр инэз гинэ медам сайя шимес губи!
Пересь Дунне котьку медло егит.
Нылдэс-пидэс гинэ дейтерий* медам ньыл.
Мед Волга жильыртоз, Евфрат но Нил.
Ӟеч тупаса улон гинэ
Ваньзэ-ваньзэ утёз...
Ӟеч тупаса улон тӥлед!
Юн тазалык тӥлед!
Шудбур тӥлед,
Сьӧд, горд, тӧдьы но ӵуж куо нылкышноос!


* * *
Быжо кизили
Югдэ ӝамдэлы.
Югдэ но усе тэль сьӧры кыдёке.
Вож ныл сюлмыным оскылӥ:
— Югдӥз шудбурез кинлэн ке.

Кысэ кизили —
Вакчи улонэз,
Нош солы вожъяськи мон, эке:
Со быжо кизили кадь ке но
Кылбуре
Мед югдоз улоназ кинлэн ке.

Нянь

Пичи нылы
Нянь юдэссэ
Куштэм музэ.
Нош мон ӧй ӝут.
Ӧй шӧды куштэмзэ.
Бӧрсям мынӥсь пересь песянае
Дугдӥз.
Мырдэм-мырдэм мыкыртӥськиз.
Юан сётӥ солы:
«Песянае, йыбырттӥськод кинлы?»
«Няньлы, —
шуиз песянае, —
Няньлы».


* * *
Лымы усе...
Усе лымы.
Поръя, берга капчи.
Укыр шулдыр туннэ мыным.
Малы? Тодо ачим.

Мон лымылы шумпотӥсько,
Лымы мунё выллем.
Сюлмысь толэз ӟечкыласа,
Вамышъясько каллен.

Ваньзэ чылкытатэ лымы,
Миське синдэ, бамдэ.
Ӧд ке но вера тон мыным,
Тодӥ яратэмдэ.
________

Дейтерий* — бомбаосын кутӥськись
секыт водород
Ангелина Снигирева
By Ангелина Снигирева 29 ноября, 2020 09:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<