Шаерамы «#МыВместе» акцие пыриськем волонтёръёсты данъязы

Удмурт Дунне
By Удмурт Дунне 13 октября, 2020 10:31

Пандемиен нюръяськон понна пӧртэм проектъёс улонэ пыӵало. Нырысь ик коронавируслы пумит султӥзы волонтёръёс, «#МыВместе» акция улсын соос арлыдоослы сиён-юон, эмъюм нуллӥзы.

«За бескорыстный вклад в организацию Общероссийской акции взаимопомощи «#МыВместе» медаль сётӥзы Дэбес ёросысь егитъёслэн «Вертикаль» центрысьтызы Александр Вахрушевлы.

Акция ужзэ мытӥз 21-тӥ мартэ, ӵапак соку Россиын самоизоляциез ялӥзы. Котькуд улосын ужаз нимысьтыз штаб, отын волонтёръёс телефон пыр арлыдоослэсь заявкаоссэс кутылӥзы но куронъёссэс быдэстылӥзы: ветлӥзы магазинэ, аптекае, поттылӥзы жагзэс. Собере ужаны кутскиз «ПоддЕРжка» проект: шуге-леке сюрем семьяослы сиён-юонэн коробкаос люкылӥзы.

Оглом та вакытэ 2 сюрс мурт волонтёр кариськиз, 117-зэ тужгес но мыло-кыдозэ 1-тӥ октябре данъязы Эшъяськон юртын. «За бескорыстный вклад в организацию Общероссийской акции взаимопомощи «#МыВместе» медаль сётӥзы Дэбес ёросысь егитъёслэн «Вертикаль» центрысьтызы Александр Вахрушевлы но.

Александр вордӥськиз Якшур-Бӧдья ёросын Сюровай гуртын. Дэбес политехникумын дышетскыкуз, кылдытӥз «Шунды» огазеяськонлэсь ёзэтсэ. Егитъёс пӧртэм ужрадъёс ортчытъязы, гуртъёсы, мукет ёросъёсы потазы.

«#МыВместе» акцие Александр пыриськиз «Вертикальысь» ӵош ужась эшъёсыныз. 16 кузя быдэс ёросысь 100-лэсь трос арлыдоос доры ветлӥзы.

— Мылкыд туж умой луэ, адямиослы юрттӥськод, тыныд тау шуо ке, — вераз Александр. — Та туж пайдаё акция, малы ке шуоно куд-ог пересьёслэн ӵыжы-выжыоссы ӧвӧл. Ми сяна, кин соослы юрттоз на?

— Пусйымон, акцие пыриськизы адямиос, кудъёсыз та дырозь волонтёрлэн уженыз тодмо ик ӧй вал, — вераз элькун Тӧролэн но Правительстволэн администрациенызы кивалтӥсь Сергей Смирнов. — Соос кылӥзы, юрттэт кулэ шуыса, но соку ик вазиськизы. Куд-ог адямиос пандемиен сэрен ужзэс ыштӥзы но, юнме пукытозь, мукетъёсызлы юрттыны потӥзы. Ваньзы сюлмысь ужазы, таӵе секыт вакытъёсы лыктэ валан: вормомы огазеяськыса гинэ.

— Тулыс валэктонъёслэсь трос юанъёс вал, — вераз Удмуртилэн Тӧроез Александр Бречалов, — нош волонтёръёс, номырлэсь кышкатэк, ужаны кутскизы, соос вируслэн вӧлмемезлы пумит султӥзы. Милемыз, кивалтӥсьёсты, вотэсын ӵем куарето: созэ уд лэсьтӥське, таизлы саклыктэс уд висъяське. Нош волонтёръёс асьсэос, нокинэ витьытэк, огазеясько но котырысь адямиослы юртто.

Ӝыны ар куспын Удмуртиын сюрслэсь трос адямилы юрттэмын, 30 муниципал кылдытэтъёсын штабъёс ужазы. «#МыВместе» акция али но ужзэ азьланьтэ.

________

Мария ЕМЕЛЬЯНОВА

Удмурт Дунне
By Удмурт Дунне 13 октября, 2020 10:31
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<