Кизнер каргуртын кылдӥз «Геройёслэн ульчазы»

Удмурт Дунне
By Удмурт Дунне 14 октября, 2020 09:45
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кизнер каргуртысь 4-яз ульчаосын кылдӥзы буре ваён интыос. Лэсьтэмын соос «Геройёслэн ульчазы» проект улсын.

Туннэ нуналлы 4-ез ик буре ваён интыос дасесь.

Быдӟым тылож вакытэ Совето Союзлэн Геройёсыз луизы Кизнер палась 4 ожгарчиос: Павел Кривокорытов, Николай Савин, Степан Кузнецов но Фёдор Дербушев. Соослэн нимъёссы сётэмын каргуртысь ульчаослы. Ӵапак отын туэ гужем ӵоже кылдӥзы буре ваён интыос.

Соосты лэсьтыны кичӧлтонэн потӥзы Кизнерысь Кибашлыослэн юртазы ужасьёс но кивалтӥсьсы Валентина Рассомахина. Соос дасязы «Геройёслэн ульчазы» проект, соин «Лукойл» огазеяськонлэн социальной но культурной проектъёслы сӥзем 19-тӥ конкурсаз вормисе потӥзы.

— Вормеммы понна 140 сюрс манет сётӥзы, — шуэ проектлэн авторез Валентина Рассомахина. — Озьы котькуд буре ваён интымес лэсьтыны быдэн 35 сюрс манетэн усиз. Валамон, со тырмыт ӧй вал. Но юрттӥськизы спонсоръёс: кин ке уксё сётӥз, кин ке — транспорт, материал. Та ульчаосын улӥсьёс но мыло-кыдо луэмзэс возьматӥзы.

Уж пӧзьыны кутскиз май толэзьысен. Буре ваён интыосты лэсьтон борды Кибашлыослэн юртысьтызы быдэс коллектив гижысь-пиньысь басьтӥськиз. Одӥгъёсыз турынэз турназы, музъемез ӵошкатӥзы. Мукетъёсыз буре ваён интыослы кизили лэсьтыса, сяськаос будэтыса дасязы. Куинетӥосыз мемориал пул бичаны кутскизы…

— Куазьлэн укыр ӝокыт луылэмез но, зор-кот усем но ӧз люкетэ, — коллективезлэн тыршемезлы шумпотэ Валентина Витальевна. — Угось ӝоггес адӟеммы потэ ни вал, мар пӧрмоз шуыса. Кужым сётӥз Атыкай музъеменымы, геройёсынымы данъяськон мылкыд но.

Туннэ нуналлы 4-ез ик буре ваён интыос дасесь. Но гуртоос табере таин гинэ буйгатскыны уг медо ни. Каргуртысь оже пыриськем но ож мышкын ужамъёс сярысь материалъёс люканы мылкыдзэс верало — соослэсь нимъёссэс гожтоно, пе, буре ваён интыосы. Кылсярысь, Галина Домарацких тодаз вайиз С. Кузнецовлэн урамаз улэм троссэ ожгарчиосты но ож мышкын ужамъёсты. Одно шедёзы, пе, мукет ульчаосысь но Вормонэз дуремъёс. «Геройёслэн ульчазы» проектэз кылдытӥсьёс ужзэс азинтыны соглаш луо.

__

Элина КУМАЧЁВА

Удмурт Дунне
By Удмурт Дунне 14 октября, 2020 09:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<