Калыклы юрттэ ке, бурдъяське

Ангелина Снигирева
By Ангелина Снигирева 22 октября, 2020 16:59
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Надежда Михайловна ПЧЕЛОВОДОВА — Можга ёросысь дышетон удысын ужасьёслэн профсоюзэнызы кивалтӥсь. Туэ 65 арес тырмиз. Огъя ужам стажез 45 ар. «Удмурт Кенешлэн» но «Удмурт нылкышно кенешлэн» ёросысь ёзъёссылы юрттӥське, трос аръёс ӵоже ёросысь Быръёнъёсъя комиссилэн секретарез вал. Умой ужамез пӧртэм данъян грамотаосын, «За активную работу в профсоюзах» но «За развитие социального партнёрства» гадьпусъёсын пусъемын, туспуктэмез пыртэмын шаерысьтымы Данъян пул вылэ.

Н. Пчеловодова

Анаез ӵектэмъя

— Вордски но быдэ вуи Можга ёросысь Вуж Юбера гуртын, — веранзэ мытӥз Надежда Михайловна. — Семьямы сокем бадӟым ӧй вал: нэнэе, Анастасия Ивановна, кема аръёс ӵоже вуз карись луыса ужаз, атае, Михаил Ильич, колхозын механизатор вал, 2 агайёсы но мон. Со сяна, апаймы, вӧзамы улӥз на ӵужаймы, милемыз со нуныяса-вешаса гинэ будэтӥз.

Гуртысьтымы 8 классъем школаез умой йылпумъяй. Пичиысен синмаськемын вал тӧдьы халатэн ужасьёслы, туж потэ вал эмъясь луэме. Но мон нэнэелэсь кылзӥськоно кариськи. Ас вакытаз солэн потэ вылэм дышетӥсь луэмез. 1930-тӥ арын вордӥськем нэнэмы дышетскытэк кылемын. Секыт война аръёс трос егитъёслэсь соку малпанъёссэс куспетӥ каризы. Дышетӥсь луымтэысьтыз, туж ӧпкеле вал, соин, лэся, нылпиоссэ дышетыны выриз. Монэ одно ик дышетӥсь луыны куриз. Озьы мон 1970-тӥ арын мылпотытэк кадь Можгаысь педучилищее вамыштӥ. Экзаменъёс сётыны мыныкум, 
лушкемен малпасько вал, коть «2» мед басьтысал. Но вань экзаменъёсме «4» но «5» отметкаослы сётыса, студент луи. Педучилищеен артэгес ик мед­училище но интыяськемын вал, мон со шоры ялан вожъяськыса учкылӥ.

Но педучилищеын дышетскон туж кельшиз, эшъёсы но умоесь вал. Дышетсконмес йылпумъяммы дырысен 40 арлэсь ятыр ортчиз ни ке но, эшъёсынымы котькуд 5 ар ортчем бере пумиськылӥськомы, луонлык шеде ке, вордскем нуналъёсмес но ӵош ортчытӥськомы. Табере пӧлысьтымы тросэз нимо-дано адямиос ни, кылсярысь, Ижысь Роза Кузнецова но Глазовысь Маргарита Ильина педагогика наукаосъя кандидатъёс луэмын, Можга ёросысь школаосын трос аръёс ӵоже ужамын Тамара Попова но Римма Рылова. Группаямы пиос 4 гинэ вал ке но, соосын котьку данъяськылӥмы. Пичи Пурга ёросысь Пуро гуртысь Михаил Бектуганов но Можга ёросысь Быдӟымсурд гуртысь Виктор Боткин ас вакытазы школаен кивалтӥзы.

1974-тӥ арын, педучилищеез йылпумъяса, ужаны ыстӥзы аслам дышетскем школаям ик. Удмурт кылъя но литературая, ӟуч кылъя но литературая урокъёсты нуи. Со аре ик, ужелэсь люкиськытэк, Удмурт кун университетысь филологияя факультетэ дышетскыны пыри. Педучилищеын ӵош дышетскем эшеным Римма Рыловаен эшшо 6 арзэ ӵош тодон-валан люкамы на.

Воспитатель, дышетӥсь, методист

— Вордскем гуртам одӥг арзэ гинэ ужаса вуттӥ, отӥяз бызи. Вуоно картэмын, Гришаен, тодматски, 3-тӥ курсын дышетскыкум, агаелэн сюаназ. Артысь Алнаш ёросысь Кузьыли гуртэ юмшаны ветлӥмы, декабрь толэзь вал соку. Армиысь адскыны бертэм пияшлы кызьы уд синмаськы: чебер, йӧно, моряк дӥсен. Отӥяз арзэ гожтэт пыр кусып возимы. Армиысь бертыса, Гриша артысь Туймыйыл гуртэ ужаны интыяськем. Колхозын сое шумпотыса уже кутӥллям.

Егит специалист

Туймыйыл школаын ужасьёс монэ туж шуныт пумитазы, вуж тодмозэс кадь. Анае ӵектэмъя дышетӥсь луи ке но, пиналъёсын ужаны кельшиз. 9 ар ужаса, дышетскон арлэсь йылпумъяськемзэ витьытэк ик, Можга городэ улыны выжимы. Вот соку мон ӧпкели, ялан тодам гурт школа улӥз: со чебер но выль вал, коллективез умой, пиналъёс кылзӥськисесь. Городын милемыз нокин ӧз возьма. Пиналъёсмес нылпи садэ уг басьто, школаосын ужан интыос ӧвӧл. Нылпиосмес садике интыян вылысь 8 толэзьзэ нылпи садын ужай. Бадӟым классъёсты дышетэме бере тэшкылиосын ужан туж секыт потӥз. Отӥяз 1 арзэ 6 номеро школаын ужай, бадӟым классъёсын ӟуч кылъя но литературая урокъёс нуи. Нош йырысьтым гурт пиналъёс ӧз кошкылэ. Ар сяна ужаны ӧй чида — роное вамыштӥ. Нош отын ӵапак «запасной дышетӥсь» ставказы бушам. Буйгатӥзы, ёросысь школаосын дышетӥсьёс кулэ дыръя, пе, дышетыны ветлод. Оски.

Толэзь но ӧз ортчы, монэ колоние ыстӥзы, ӟуч кылъя но литературая урокъёсты нуыны. Отын 2 сменаен дышетскизы: ӵукнаосы но ӝытъёсы. Класс интыяськемын вал 2-тӥ этажын. Нырысетӥ нуналаз ик туж кышкатски. Мыным соку 28 арес гинэ вал ай, нош классын 36 воргоронъёс пуко. Ваньзы шорам дол-л учко, синъёсынызы сиё кадь потылӥз. 1-тӥ смена дыръя вань урокъёсме умой ортчытылӥ, нош ӝыт сменаын зол куалектылӥ. Одӥг пол урок нуон куспам тыл тёпак кысӥз. Ма кароно, кытын мон? Классысь кызьы потэмме 
уг тодӥськы ни, коридорын сылӥсь дежурной буйгатӥз: Надежда Михайловна, йыромиды шат, вамыштэ сьӧрам. Кӧня ке минут ортчыса, 1-тӥ этажысь офицер но школалэн директорез бызьыса дорам вуизы. Тыл сётэмзы бере нош ик со классэ пыроно. Ачим туж кышкай ке но, куалекъямме возьматыны ӧй тыршы. Озьы ке но котькуд урокысь пиж-пиж гордэктыса потӥсько вал.

«Запасной дышетӥсь» луыса ар ужаме бере методист, инспектор вал на. Пермь но Москва городъёсы тодон-валанме будэтыны ветлӥ. Отысь вуыса, дышетон удысме ӧй аналты: роноын ужасьёслэн луонлыксы вал арняяз 6 час урокъёс нуыны. Ма малпаськоды, эшшо 6 арзэ колониын дышетӥ. Со сяна, ӟуч кылъя но литературая, дуннеысь калыкъёслэн литературазыя урокъёсты нуи на ветеринарияя но медициная колледжъёсын. Дышетӥсьын ужам стаже огъя 22 ар люкаськиз.

Профсоюзысь адямиосын пӧртэм ужрадъёсы пыриськыло

Кивалтӥсь

— Ялан маке выльзэ но тунсыкозэ утчасько вал. 1989-тӥ арысен монэ бырйизы Можга ёросысь дышетон удысын ужасьёслэн профсоюзэнызы кивалтӥсе. Шутэтскон нуналъёсыз тодытэк, ужано луылӥз ке но, ваньмыз туж кельше вал. Мон котьку но дышетӥсьёс пӧлын, ёросысь вань школаостӥ ортчемын, котькуд визьнодасез нимын-тулын вераны тодӥсько, валэктон уж нуисько, быгатэмея юрттэт сётӥсько.

Бен, тросэз адямиос проф­союз сярысь трос ик уг тодо, куд-огез воксё но коньдон гинэ бичаськом яке Выль ар кузьым люкылӥськом кожало. Профсоюзлэн валтӥсь ужпумез — ужасьёслэсь правооссэс утён, калык пӧлы ивор вӧлмытон, пӧртэм проектъёсты уже пыӵатон, ваньмон дырез пайдаё ортчытон но мукет.

Туннэ ёросысь дышетон удысын ужасьёслэн профсоюзазы 43 первичной организациос. Профсоюзэ быдэс коллективен пыремын Тылой школаын, Вуж Юбера но Ӟуч Пыӵас нылпи садъёсын ужасьёс, трос кузя Быдӟымсурд, Бадӟым Уча, Вуж Какся, Вылын Юри школаосысь, Горняк, Кватчи но Бадӟым Уча нылпи садъёсысь но мукет интыосысь ужасьёс. Ӵем дыръя дорамы юрттэт курыса вазиськисьёс луо. Кылсярысь, пенсие потыны дасяськемъёслэн ужам нуналъёссы уг тырмо. Берло 5 ар куспын 32 мурт юристлы сямен дорам вазиськиз, Пенсиосъя фонд соослы льготной пенсия тырыны пумит луэм. Огъя стажзы люкаськемын кадь, нош документъёсъя лыдъяны-чотаны кутскиськод ке, мар но уг шараяськы. Куд-ог дышетӥсьёслэн тодон-валанзэс будэтон курсъ­ёсы, армие ветлэм дырзы, заочно амалэн дышетскем толэзьёссы яке воспитательын ужам дырзы ужам стажазы пырытэк кылемын. Ваньзэ нимаз эскероно, лыдъяно луэ. Уждун басьтэмын, Пенсиосъя фондэ коньдон келямын ке, со аръёс одно ик стаже пырыны кулэ. Документъёс люкаса, судэ вазиськиськомы.

Кылем арняе одӥгез ды­шетӥсь шумпотэмзэ вераз. Со­лы ар но ӝыны ужано на шуиллям вылэм, судэ вазиськимы но — 7 толэзь гинэ ужанэз кылемын на. Документъёсын вырон уж мыным туж кельше. Ганяк пукыны но быгатысал, нош мынам адямиослы юрттэме потэ. Ӵем дыръя, визь-кенеш курыса, кенешисько Ижысь профсоюзъёслэн огазеяськонысьтызы правоосъя инспекторен Елена Масловаен, ёросысь юристъёсын. Озьы арлы быдэ ёросысьтымы трос дышетӥсьёслы судэ вазиськыны юрттӥсько. Шумпотыса вераны быгатӥсько, берло 10 ар куспын 2 ужмес гинэ келямы, кылемъёсаз вормимы.

Мукет сюлмаськонъёс но тырмо, туж сак эскерисько выль дышетскон ар кутскон азьын школаосын тарификация ортчытонэз. Котькуд дышетӥсьлэн ставкаез быдэс мед луоз, часъёссы уг тырмо ке, бордаз одно ик заявленизы мед луоз. Куд-ог дыръя кивалтӥсьёс вунэто нылпиен пукись дышетӥсьёс сярысь. Шекъёсты шараясь­ко ке, ӝегатскытэк школаосы жингыртӥсько. Оло, куд-ог дыръя профсоюзлэсь ёзчиоссэ школаен я нылпи садэн кивалтӥсьёс уг но ярато, нош ми ваньмы огкылысь ужаны тыршиськомы. Коллективной договоръёс но гожтыны юрттӥсько, нимысьтыз дышетсконъёс радъясько.

Удмуртилэн Тӧроез дорын

Дышетӥсьёслэн трос юанъёссы кылдо коммунальной услугаос пумысен. Алигес нош ик кышномурт вазиськиз. Куз­­палъёс дышетон удысын ужамын, пенсие потыкузы, льготаосты ас вылаз гожтэм вылэм картэз, нош со али ӧвӧл ни. Удмурт Республикалэн азьвыл постановлениезъя, семьяысь одӥгез кузпал улонысь кошке ке, льгота мукет кузпал вылэ выжыны кулэ нокыӵе бызьылонъёстэк. 
Али со постановление ӧжы­так воштэмын, «автоматически» кылыз басьтэмын. Кышномурт Ижысь специалистъёс доры но юалляськыны ветлэм — пайдатэм. Ёросысьтымы юристъёсын кенешыса, со кышномуртлы документ дасямы но судэ вазиськыны ӵектӥмы. Суд кышномуртлы дурбасьтӥз. Туж шумпотӥсько, адямиослы ӟеч уж лэсьтыны быгатӥсько ке, доре но бурдъ­яськыса бертӥсько.

Озьы тӥни профсоюз вераны луонтэм бадӟым но адскисьтэм ужез быдэстэ. Со сяна, уно аръёс ӵоже Можга ёросысь профсоюз огазеяськонъёслэн координаторзы луисько. Дышетон удысын ужасьёс сяна, отчы пыризы культура, медицина удысын ужасьёс. 1998-тӥ арысен 2016-тӥ арозь Быръёнъёсъя ёрос комиссилэн секретарез вал. Таиз но уж трос дырез быдтэ. Кылем арын профсоюз огазеяськонамы отчётно-выборной собрание ортчиз, уг ни ужа шуисько вал, нош ик асме кельтӥзы. Лушкем малпаськисько: 65 арес тырмиз ни, егитъёслы сюрес сётоно. Ачим интые егит дышетӥсез но дасяй ни. Нош дорын пукыны чидало-а, уг-а, соиз ини мукет ужпум.

Тазалык ке юн, мылкыд йӧн

— Профсоюзлэн эшшо одӥг удысэз герӟаськемын тазалыкез утёнэн. Профсоюзэ пырисьёслы «Варзи-Ятчи», «Металлург» я «Ува» санаторийёсын тазалыксэс юнматыны луонлык сётӥське. Азьвыл аръёсы путёвка дунлэсь 30 процентсэ гинэ тыризы, али котькудӥзлы со путёвка 5 сюрс 800 манетлы дунтэмгес сётӥське, ёросысь профсоюз но быгатэмезъя юрттэ. Куд-огез Сьӧд зарезь дурын тазалыксэ юнматэ. Азьвыл аръёсы 20-лэсь трос дышетӥсьёс тазьы шутэтскизы ке, туэ пандемия люкетӥз. Профсоюзлэн ёзчиосызлы луонлык сётӥське «профдисконт» картаен пичиятэм дунын вуз басьтыны, шуг-секытъёс дыръя проценттэк займ курыны.

Дышетон удысын ужасьёс куспын быдэс ар ӵоже спартакиада ортче. Спортысь 7 амалъя вожвылъясько. Волейболэн, дартсэн, шашкиен, шахматэн шудэм сяна, куасэн но пыдын бызьыло, чидатэк витё турслётэз. Котькуд ар трос командаос люкасько, ӵошатскон ортчем бере ик вормисьёсты грамотаосын но коньдон кузьымен пусйиськомы, нош Дышетӥсьёслэн нуналзы азьын данъяськомы вормисе потэм командаосты. Со сяна, ар ӵоже кыстӥськись ужрадэ мыло-кыдо пыриськись визьнодасьёсты ёрос грамотаен кутскыса, Россиысь Данъян грамотаосын пусйиськомы. Кылсярысь, кылем арын Россиысь профсоюзъёслэсь данъян грамотазэс басьтӥз Комак гуртысь дышетӥсь Георгий Яковлев. Жаляса верано, бадӟым вожвылъяськонмес туэ радъяны пандемия люкетӥз, одӥг амалъя гинэ ӵошатскон ортчытыса вуттӥмы.

Таза улонэн эшъяське

Спартакиада ортчытӥсько бере, аслым но спортэн 
эшъяськоно луэ. Пинал дырысеным волейболэн шудыны, бызьылыны яратӥсько вал. Ӵош ужась эшеным Римма Рыловаен, Вуж Юбера гуртын улыкумы ай, 1 килограмм конфет понна но ӵошатскылэммы вань. Та вакытэ гужемзэ ӝытлы быдэ великен ворттылӥсько, мылкыды капчи дыръя 20 иськемез но ортчисько. Нош бер сӥзьылысен кутскыса, тулыс асфальт потытозь, эшеным ӵош бодыосын вамышъяны потаськомы. Мугорез кыдатыса, тазалык юнма, йыр шутэтске, мылкыд капчигес луэ.

Ёросын ортчылӥсь ужрадъёсмес шулдыртыны юртто культура удысын ужасьёс. Вордскем нуналъёс, юбилейёс ортчытъяськомы, кулэм муртъёс сярысь но ум вунэтӥське. Озьы шутэтскон нуналъёсты тодытэк, ялан сюрес вылэ потоно луэ. Котькудӥз сярысь маке вераны быгатоно. Котькыӵе дырыд мед луоз, нош калык азе тон капчи мылкыдын потыны кулэ.

Кузпал, анай, песянай

— Мон сярысь эшъёсы серекъяса верало: дышетӥсь, организатор, спортсмен но юрист, — шуэ Надежда Михайловна. — Ужын мон кивалтӥсь ке, дорын уг кузёяськиськы. Бадӟым тау кареме потэ кузпалэлы Григорий Алексеевичлы. Юртъер котырысь вань ужез быдэстэ, тэк пуконэз уг тоды. Куд-ог дыръя, ӵемгес шутэтскон нуналъёсы, дорын ужаломы шуыса кенешиськомы гинэ, нош мыным кытчы ке мыноно луэ. Таня но Коля нылпиосмес будэтыны юрттӥз анаймы Соломанида Тимофеевна. Ӝыны арзэ бадӟым нылыз дорын Свердловск улосын улэ вал, ӝыны арзэ — ми дорын. Табере 4 нуныкаосмы будо. Городын улӥмы ке но, егит дыръямы пудо но чипы-курег вордӥмы, али шутэтскиськомы. Нылпиосмы нимаз коркан уло, курегпуз гинэ но милемлы ваё табере. Шумпотӥсько, быдэстытэк кельтэм малпанъёсме нылпиосы быдэстӥзы шуыса. Нылы но кенэ эмъян удысын ужало, 2 внучкаосы Ижысь медициная академиын дышетско.

Ваньмон дыръям бакчаын бергасько, туж яратӥсько книга лыдӟыны, пӧртэм буёло розаосты но астраосты будэтыны. Соос ӝужытэсь но, лапегесь но медаз луэ. Сылалтӥськемъёс, компотъёс трос дасясько, нылпиосылы но мед тырмоз. Огкылын вераса, адямиос мар лэсьто, соослэсь бере уг кылиськы кадь.

Валентина Емельянова

Ангелина Снигирева
By Ангелина Снигирева 22 октября, 2020 16:59