Улон сётӥсь шапык

Удмурт Дунне
By Удмурт Дунне 3 сентября, 2020 15:18
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Россиын ортчиз «Улонлэн шапыкез» акция.
Туспуктӥз Максим Егоров

2004-тӥ арын Бесланын теракт дыръя бырем адямиосты буре вайыса, Россиын ортчиз «Улонлэн шапыкез» акция. 3 ар талэзь азьло сое малпазы но кутскон сётӥзы Удмуртиын.

Ижысь интернационалист-ожгарчилы сӥзем синпелет дорын люкаськизы десантникъёс, ожысь ветеранъёс, кадетъёс но вань мылкыд карисьёс, соос буре вайизы Бесланын быремъёсты, сяськаос вылэ ву киськазы. «Улонлэн шапыкез» акциез 3 ар талэсь азьло малпазы шаерысьтымы «Вместе» огазеяськонысь егитъёс. Озьы соос буре вайыны дэмлазы Бесланын бырем адямиосты. Террористъёслэн ки улазы шедем нылпиос, анай-атайёс, дышетӥсьёс 3 нунал кышкыт югдурын, вутэк-сиёнтэк улӥзы.

— Шумпотӥсько: арысь аре акцие тросгес но тросгес калык пыриське. Туэ, кылсярысь, та ужрадэз доразы, Крымын сяна, вань улосвылъёсын ортчытӥзы, собере туспуктэмъёссэс келязы «ВКонтакте» группаямы. Удмуртиын буре ваён ужрад ортчытӥзы но азбаръёсысьтызы сяськаоссы вылэ ву кисьтазы школаосын но нылпи садъёсын, — вера Эшъяськон юртысь методист Любовь Широбокова.

— 16 ар ортчиз ни та кышкыт нуналысен, но суред али но син азьын на. Таӵе учыръёс историямы медам луэ ни, — вера Кун Кенешысь Наукая, дышетонъя, лулчеберетъя, калыкъёсын но егитъёсын ужан политикая ялан ужась комиссилэн тӧроез Татьяна Ишматова. — Та буре ваён нунал огазея пиналъёсты но, арлыдоосты но, асьмемыз утись ожгарчиосты но. Тау кареме потэ со геройёслы, кин уг жаля аслэсьтыз улонзэ ми понна. Шумпотӥсько, асьмеос сайкыт инбам улын улыны быгатӥськомы шуыса.

2005-тӥ арысен 3-тӥ куарусён Россиын терроризмен нюръяськон нуналэн ялэмын. Арлы быдэ ми тодамы вайиськомы терактъёсын бырем ас пал адямиосмес, геройёсты. Кылсярысь, 1970-тӥ арын самолётэз киултыны турттӥсь воргоронъёслы пумит султӥз бортпроводница Надежда Курченко.

Мария Векшина

Удмурт Дунне
By Удмурт Дунне 3 сентября, 2020 15:18