Надежда Курченколы сӥзьыса Ижын 19 пужымъёс мерттэмын

Удмурт Дунне
By Удмурт Дунне 5 сентября, 2020 12:56
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Надежда Курченко стюардессаез буре вайыса, Ижын 19 пужымъёслэсь аллея мерттэмын.

Аллеяе мерттэмын 19 пужым, ӵапак сомында арес вал Н. Курченколы.
Туспуктэм: izh.ru

Надежда Курченколэн террористъёслы пумит кышкатэк султэмез дырысен туэ 15-тӥ октябре 50 ар тырме. Глазов ёросысь Пониноын дышетскем нылмурт улонзэ ӧз жаля, Батумиысь Краснодаре лобись самолётын теракт медаз луы шуыса. Кышкасьтэм луэмез понна Надежда Курченко пусъемын Горд Знамя орденэн.

Пужым мерттонэ пыриськизы политикъёс, калык огазеяськонъёслэн ёзчиоссы, егит лётчикъёслэн школаязы дышетскисьёс, кадетъёс, МВД-ын ужасьёс но ветеранъёс.

— Мон 5-тӥ классын дышетскисько вал, куке артэ Глазов ёросысь Понино гуртысь егит нылмуртлэн Надежда Курченколэн подвигез сярысь тодмо луиз, — тодаз вайиз Кун Кенешлэн Тӧроез, Юкаменск ёросысь Палагай школаез йылпумъям Владимир Невоструев. — Ми соку туж паймим: шат сыӵе кышкыт учыр луыны быгатэ туала вакытэ, асьме кунын? Данакмылэн Н. Курченко кадь луэммы, улонмес авиациен герӟаммы потыны кутскиз.

В. Невоструев пусйиз: терроризмез вормон понна асьмелы огазеяськоно. Аллеяе мерттэмын 19 пужым, ӵапак сомында арес вал Н. Курченколы. В. Невоструевен ӵош одӥг пужымез мерттӥз Ижысь 91-тӥ школаын дышетскись Айнура Багирова. Со оскытӥз: выжыятэм писпуэз со эскерыса-утялтыса возёз.

«Аллея Надежды» элькун акция борды итӥськизы Глазовысь школьникъёс но. Н. Курченколэн подвиг лэсьтэм дырысеныз 50 ар тырмонлы сӥзьыса, отын митинг ортчиз. Собере 7 но 17 номеро школаосысь юнармеецъёс 19 писпу но ог 40 куак мерттӥзы.

__

Элина КУМАЧЁВА

Удмурт Дунне
By Удмурт Дунне 5 сентября, 2020 12:56