Ижысь 77 сюрс 500 пала пиналъёс школае вамыштӥзы

Удмурт Дунне
By Удмурт Дунне 2 сентября, 2020 15:33
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Нырысетӥ сентябре Ижысь 77 сюрс 500 пала пиналъёс школае вамыштӥзы, пӧлысьтызы 9 сюрслэсь ятырез нырысетӥ классэ мынӥзы. Усьтӥз ӧсъёссэ 16 номеро школа но.

Нырысетӥ классэ мыно.

Кема дыр ӵоже чус улэмез бере школа азбарез шулдыр каризы жингрес куараос, сяськаос, шаръёс, пиналъёслэн горд галстукъёссы. Пиналъёслэсь палэнынгес сылӥсь анай-атайёс, песянайёс но песятайёс пальпотыса учкизы нылпиоссы шоры. Школьникъёс ог-огзэс ӟечкылазы, Ижкарлы, шаермылы сӥзем кырӟанъёс быдэстыса, эктыса. Коронавирус сярысь сценка пуктӥзы: со азьтэм, школаез адӟонтэм карись пиналъёслэн эшсы кадь возьматэмын вал. «Кӧшкемыт через» пиналъёс линейкаысь чаляк уллязы.

Коронавирусэз пиналъёс уллязы.

Пиналъёссэс 1-тӥ классэ лэзись анай-атайёслэн пушсы тыриз.

— Школае мыныны рос-прос дасяським, номырлэсь ум кышкаське, — вера егит анай Елена Кирпичникова. — Малпасько, котькуд ар кыӵе ке аспӧртэм учыр кылдэ, таиз тодэ кылёз коронавирус вӧлмемен, чакласьконъёсын.

Нырысьсэ школае.

Тодон-валан нуналэн нылпиосты но соослэсь ӵыжы-выжыоссэс ӟечкылаз школалэн директорез Жанна Таранникова:

— Та арез секыт шуэм уг поты — со мукет, со йӧспӧртэм. Шумпотӥсько ӝыны ар пала адскытэк улэммы бере пумиськеммылы. Номыр шоры учкытэк, туннэ вань школаос усьтӥськизы, оскисько, дышетскон армес шуг-секытъёстэк, ӵошен ортчытомы шуыса. Валтӥсез — тазалык, сое утён понна ми ваньзэ лэсьтомы.

Дышетӥсен артэ.

Пиналъёсын пумиськылыны вуылӥз Иж город думалэн тӧроез Олег Гарин:

— Котькулэсь тросгес кужым понӥм школаосты усьтон понна. Вань ужрадъёс ортчытэмын, вань луонлыкъёс кылдытэмын, анай-атайёс пиналъёссэс школае кышкатэк мед лэзёзы шуыса.

Пиналъёслэсь температуразэс ӵукналы быдэ мерталозы. Кабинетъёсын омырез чылкытатӥсь рециркуляторъёс пуктэмын. Покчиос но бадӟым классъёсы ветлӥсь пиналъёс школае пӧртэм интыостӥ пыраны-потаны кулэ. Коридоръёсын, столовойын трос калык медаз люкаськы шуыса, нимысьтыз дышетскон но шутэтскон графикъёс дасямын. Жанна Таранникова вазиськиз Ижлэн йырызлы Олег Бекмеметьевлы, сентябре-октябре школаослэсь ужзэс нимысьтыз группа мед чаклалоз шуыса.

Пиналъёсты пӧсь сиёнэн сюдон, кышкытлыклэсь утиськон пумысен юанъёссэс Ижысь анай-атайёс сётыны быгато 41-45-69, 41-45-60 телефон номеръёсъя.

Виктория Крамова
Туспуктэмъёсыз авторлэн

Удмурт Дунне
By Удмурт Дунне 2 сентября, 2020 15:33