Дэри ёросысь Андрей Головкин кылдытӥз ӝажыосын ферма

Удмурт Дунне
By Удмурт Дунне 10 сентября, 2020 11:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Туала фермеръёс теплица пукто но отысь убооссэс вӧлдэтозь ӝуто.

Туспуктэм: Гурт удысъя но сиён-юонъя министерство

Дэри ёросысь Андрей Головкин ассэ сити-фермеръёс пӧлы пыртэ. Город вӧзын ӝыны ар ӵоже 70 квадрат метр вылын со кылдытӥз ӝажыосын ферма. Кыӵе материал шедьтӥз, солэсь ик теплица ӝутӥз. Ву кисьтан тӥрлык, субстрактэн материал басьтон понна 1,5 миллион манет быдтӥз. Табере толэн-гужемен урожай бичаны быгатоз. Пуктӥськонэ понэм уксёез 2,5-3 ар ӵоже берыктӥськоз, шуэ. 1 квадрат метръем таӵе теплица ӝутыны 30-35 сюрс манет тырме, пе.

— Москва котырын кемалась сыӵе фермаос ужало ни, нош асьмеос йырмес тӥяськомы, кызьы меда узы-боры, бака сиён пичи интыын трос будэтоно, — вера Андрей Головкин. — Утчаськиськод ке, олокыӵе но амал сюре вылэм.

Егит фермер шпинат, руккола, мангольд турын-куар бордысен кутскыны малпаз. Нырысетӥ урожайзэ бичаз ни. Культураослы югыт мед тырмоз шуыса, котыр светодиодной лампаос пуктылӥз. Будосъёс нимысьтыз гидропонной установкаос вылын будо, музъем борды уг йӧто бере, соку ик сиыны ярамон чылкытэсь луо.

— Фермеръёс дышем сямъя ужало, выль культураос борды басьтӥськыны туж ик уг дӥсьто, урожайтэк кылёзы шуыса, — пусъе гурт удысъя но сиён-юонъя министр Ольга Абрамова. — Нош таӵе теплицаосын толалтэ но урожай бичаны луэ. Озьыен, бакча сиён будэтонын ик кӧня-кӧня луонлыкъёс усьтӥсько. Емышен асьмемыз асьмеос сюдыны мед быгатомы, олокытысь вайытэк. Соин ик Андрей Головкин кадь фермеръёслы министерство азинтӥськыны одно ик юрттоз.

__

Елена САРАМАТОВА

Удмурт Дунне
By Удмурт Дунне 10 сентября, 2020 11:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<