ДаУР: Удмуртия — Ижкар гинэ ӧвӧл

Удмурт Дунне
By Удмурт Дунне 11 сентября, 2020 10:05
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Мылкыд секыт дыръя сюлэм куриськыны кутске Вотка ёросысь Сидоровы горы нимаськись интые. Татӥ бызись Кам шурлэн ярдуръёсаз выль кужым пыре. Ижысь Крючковъёслэн семьязы понна но со огез яратымон инты луэ.

Мария Крючковалэн архивысьтыз
Сидор гурезь йылысен синйылтыны луэ Каме Сива шурлэсь усён интызэ. Мария Крючковалэн архивысьтыз

Сю пӧлысь — ньыльдон сизьым

— Быдэс семьяенымы дуннеез котыръяны яратӥськомы, — шуэ Мария Крючкова. — Машинае пуксиськомы но я Нижний Новгородэ, я Татарстанэ, я Марий Элэ вуиськомы. «ДаУР» квест сярысь тодэммы бере картэ но пие шуизы: мурт улосъёстӥ ветлытозь, асьме палъёсмес адӟоно. Сайтын пусъем 47 интые вуылӥмы ни. Матысь дыре Эгра палъёсты котыръяны малпаськомы. Оглом квест улсын 75 интые вутскыны тыршомы. Вань 100 интыосты адӟы вылэм, но ваньмаз машинаен пырыны уз луы. Квест возьматӥз: Удмуртия — со Ижкар гинэ ӧвӧл. Мон угось ачим Таймыр палась, татчыозь Удмуртилэн шоркаретӥз гинэ котыръяськисько вал. Табере валасько: лычсузьымон чебересь интыосмы лачак. Тужгес яраз Вотка ёросысь Сидор гурезь. Табере Кам дуре шутэтскыны огпол гинэ ум вуылэ, малпасько.

Сидор гурезь

Та палъёсы сюрес толэн-гужемен уг бырылы — Кам шурысь кӧльыез уен-нуналэн потто, сое бадӟым машинаосын ялан кытчы ке нулло, соин сюрес котьку лёгемын. Зэм, Гольян тракт вылысь Сидоровы горы пала кожем бере со нюко-гопо луэ. Машина бере тузон инмозь ик ӝутӥське, музъем ик зурка кадь. Сыӵе дыръя малпаськод: кызьы меда тапалан адямиос уло?

Воткинсклэсь ог 40 иськемлы, Ижлэсь ог 53 иськемлы гинэ пуксем Сидоровы горы гуртын 160 корка лыдъяське. Интыен-интыен музъемзы пильылӥськыны кутскемын ке но, уноез улӥсьёс юртъёссэс дача чот возё. Интыосыз туж чебересь уго. Кам шурлэн бур пал ярдураз нюлэс, отын омыр чылкыт. Котыр син сузёнтэм ӝужытэсь гурезьёс, соосты Сидор гурезь шуо Сидор лесниклэн нимызъя. Со татысь писпуосты кораны лэзьымтэ, дунзэс валаса.

Сидоровы горы нимаськись инты Удмуртиысь паймымон синпелетъёс пӧлы пыре. Ог 150 гектар вылын Горд книгае пыртэм будосъёс но будо, кылсярысь, луковичной калипсо.

Ӝужыт но меӵ гурезь йылысен учкиськод ке паськыт Кам шоры, ыркыт пельтӥсь тӧлъя тылобурдо сямен лобӟем потыны ӧдъя — сокем эрико татын. Вань жадем ик веська кадь. Кин ке ӝӧкен пуконъёс но пуктэм, сӥль пыжон мангалзэ кельтэм. Эстӥськы но гань-гань пук, вераськы, малпаськы кадь. Дыр татын зэмен ик дугдэ, кожалод.

Тужгес шулдыр татын гужем но сӥзьыл. Меӵ гурезь йылысен дунне ик паськытгес луэ кадь. Выжыяз пӧртэм писпуос, куакъёс будо. Икыр-кукыр, позыръяськись кый кадь лёгем сюрес кузя уллань, Кам шур доры, кызьы уд
питраськы, озьы васькиськод. Ярам, гурезьлэн нялмыт «лёгетъёсыз» вань. Кин ке татчы но ӟусъёс йыгам, тэтчась сюлэмез буйгатыны, кӧня ке шутэтскыны ӧтьыса кадь. Улмо, легезьмульы бичаськод. Шур дуре васькем бере гинэ, йырез вылӥе урдыса, валаськод: писпуос сьӧрын гурезьлэн вылӥыз уг адӟиськы. Но улӥысен гурезь воксё мукет вылэм. Борддорез вӧлэм кадь. Интыен-интыен со борддор
пилиськылэмын, бадӟым изъёс ярдуре усьылэмын. Тодосчиос верамъя, татын вашкала животъёслэн лысьӧмъёссы шараяськыло. Кылсярысь, Сидоровы горы палась шедьтэмын 230 миллион ар талэсь азьвыл улэм дейноцефал ящер. Сыӵе животъёслэн кузьдалазы 3,5 метр, ӝуждалазы 1,5 метр вылэм.

Зэмен но, усьылэм изъёс шоры учкыса, вашкала дуннее вуэм кадь потӥськод, неужто шаерамы таӵе интыос вань шуыса, паймиськод. Вырйылэ тубонэз, васьконэз сярысь, трослы секытгес. Ог 80 метрез, куакъёс борды кутӥськылыса, дугдылыса-дугдылыса тубоно. Шокан ик пытсаське кадь. Но вылӥе вуыса, аслыд ачид гурезез вормем кадь потӥськод, таин валче улонысь шуг-секытъёсты но.

Гурт бервылысь монастырь

Тапалан ик мукет паймымон но бордаз кыскись интыос вань на. Кылсярысь, Паздеры урочище. Татын, гурезьёс улысь нялмыт
интыын, шур валлин ог 3 иськем кузьда кыстӥськись гурт вал. Отчы 1795-тӥ арын черк пуктыны кутскизы, Инмар анайлэн Тихвинской мудорезлы сӥзьыса. 1846-тӥ арын, куашкан калэ вуэмын шуыса, сое пытсазы. 1855-тӥ арын гуртоос выль черклы уксё бичазы. 1861-тӥ арын со ужаны кутскиз. Жаляса верано, 62 ар ортчыса, со ӝуаз. Отӥяз гуртэз но быдтӥзы. Нош черк тодмо вал чудотворной мудоръ-
ёсыныз. Али со интыын пуктэмын воргорон монастырь. Отын улӥсьёс бакча сиён будэто, скал вордо, Кам шурын чорыгало. Паздеры гуртысь потэмъёс ӵемысь вуыло та палъёсы. Черк ванен но гурт бервылъёсмы возисько на, шуо. Эмезьпуоссы, сутэрпуоссы али ке но калыкез емышен шумпотто.

________

Елена САРАМАТОВА

Удмурт Дунне
By Удмурт Дунне 11 сентября, 2020 10:05 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<