Икча-кукча, чимали!

Удмурт Дунне
By Удмурт Дунне 5 августа, 2020 09:47

Вавож ёросысь Партчи (Гурезь-Пудга) гуртэ пырем бере ик кылӥськод пиналъёслэсь куараоссэс, юр-яр каремзэс. Гужем нылпиос доразы уг пуко — педло дэмен шудыны пото.

Вавож ёросысь Партчиысь пиналъёсты котыразы люкало клубын ужасьёс.
Туспуктӥз Максим Егоров

Пиналъёсты 15-тӥ пӧсьтолэзьысен котыразы люкало культурая юртысь но библиотекаысь ужасьёс. Доразы 6 арескысен пиналъёс ветло. Гуртысь нылпиосын ӵош шудэмзы потэ песянай-песятайёссы дӥне городысь вуэм покчиослэн но. Зоре-а, шунды-а пыже — нылпиос котькыӵе куазен люкасько. Доразы пукыса акыльтэмын ини, шуэ культурая юртлэн кивалтӥсез Екатерина Смирнова.

— Нуналлы быдэ ог 25 пинал лыктэ, — вера Екатерина Александровна. — Ми педлон шудӥськом, олокыӵе но ужен выриськом. Котькуд нуналлы программамы дасямын, сое быдэстыны волонтёръёс но юртто. Али ми пиналъёсты инкуазез гажаны но утьыны дышетӥськом. Кылсярысь, ошмесъёсты чылкытатӥм ини. Алигес вуылӥм кузьыли муӵ дуре, сое пичи кенерен котыртӥм. Огнуналэ «Чылкыт шудонъёс» марафон ортчытӥмы — пиналъёс ульчаысь жуг-жаг бичазы. Кулэтэм арбериослэсь тунсыко киужъёс лэсьтыны но дышетӥськом. Ваньмыз та шудон кадь ортче, озьы пиналъёс уг мӧзмо.

Матысь дыре нылпиос понна культурной ужрадъёс ортчытъялозы. Со сяна, нылпиос асьсэос но малпало, маин соослэн шудэмзы потэ. Талы нимысьтыз дыр висъяське. Пиналъёслэн яратоно интызы — клуб вӧзысь шудон площадка. Со трос муртлы чакламын, татын пӧртэм пумо лэйканъёс, тренажёръёс вань. Бызьылыны но, берганы-ӟечыраны но, эшъёсын гань-гань пукыны но луэ. Та инты 3 ар талэсь азьло лэсьтэмын, Вавож ёрос администрация юрттэмен. Кылем арын выль ӟечыранъёс пуктӥзы на, азьланяз но шудон интызэс паськытатыны малпало — угось татчы трос калык люкаське, уката ӝытъёсы но шутэтскон нуналъёсы.

Партчиысь площадкаез пуктыны юрттӥзы школаын дышетскись пиналъёс но — быдэ вуымтэослы гужем ужаны луонлык сётэ Вавож черкогуртысь «Югдон» центр. Туэ но ёросысь 14-17 аресъем 25 пиналъёс ужалозы «Нылпиос — нылпиослы» программа улсын. Соослэн тыршеменызы, ёросысь 5 гуртысь нылпи площадкаос выльдэмын луозы.

— Удмуртиысь Мугорез кыдатонъя, спортъя но егитъёсын ужан политикая министерство арлы быдэ юрттэ гужем каникулъёсты радъяны. Таяз арын, министерство юрттэмен, 2 программаез улонэ пыӵатӥськом, — вера «Югдон» центрлэн кивалтӥсез Елена Чернова. — Пиналъёс шутэтско но, ужало но. «Нылпи планета» проект улсын 560 нылпиос понна шудон интыос усьтэмын. Эшшо 150 пиналъёслэсь шутэтскон дырзэс радъяны юрттэ ёрос администрация.

Кырын шудӥсь пиналъёсты адӟыса, шумпотоно. Гужем гуртъёсын мед кема чузъяськозы на пиналъёслэн мусо куараоссы, «чима-чима-чимали», «икча-кукча, чия-бура» верамъёссы.

________

Анастасия ШУМИЛОВА

Удмурт Дунне
By Удмурт Дунне 5 августа, 2020 09:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<