Ӟезьы вылын — искусство

Удмурт Дунне
By Удмурт Дунне 21 июля, 2020 11:29

Юкаменск ёросысь Палагай гуртлэн тусыз воштӥське. Татысь ӟезьыос Марат Абышев суредасьлы луыса чеберско.

Юкаменск ёросысь Палагай гуртысь ӟезьыос суредамын.

Палагай гуртын 7 ульча, отын 405 кузя улӥсез. Глазовлы матын луэменызы, калык городэ улыны кыстӥське. Соин но туннэ школае 3 гуртъёсысь 70 мурт сяна ветлӥсь ӧвӧл, нош нылпи садын 15 пиналэз визьнодало. Палагай поселениен кивалтӥсь Зульфия Невоструева пусъемъя, «Куркан» хозяйствоын механизаторъёслы, дояркаослы ёрмо. Араз 1-2 корка сяна пуктӥськисез гуртын уг шедьы ни.

— Гуртмы туж улоно кадь. Ас вакытаз Центральной ульчаямы асфальт но кисьтэмын. Мукетъёссэ но утялтыса возиськомы. Гуртоос асьсэос но сюрес ӝутыны юртто. Гулекшурозь пырак асфальт. Фельдшер-акушер пункт ужа культурая юртэн одӥг липет улын. Но туэ модульной ФАП усьтыны медӥськомы. Со сяна, Палагай школае спорт объектъёс ӝутыны чакласькомы. Гулекшуре нылпиослы шудон площадка лэсьтон вылысь гуртоос коньдон бичазы. Отын 25 коркан 93 улӥсез, но нылпиоссы 20 пала люкасько. Та гуртэ ик Быдӟым ожын ожмаськемъёслы но быремъёслы мемориал комплекс ӝутомы. Ву гумыосмы гинэ уродэсь, но соосты воштыны ӝог уг луы: артэ газопровод кошке. Котьма ке но гуртъёслы бырыны ум сётӥське. Палагайын арлыдоос ансамбль но кылдытӥзы ни. Нырысьсэ асьме калыкез асьмеос шулдыртӥськомы, — шуэ Зульфия Невоструева.

Гуртоослэсь мылкыдзэс ӝутон борды басьтӥськиз Марат Абышев но. 1962-тӥ арын вордӥськем пиосмурт Москваын улэ. Но вордскем палъёсаз арлы быдэ бертылэ. Ачиз со военной. Пенсие потэмез бере кияз кисточка но краска кутӥз. Нырысь Палагайысь ӵыжы-выжыезлэсь ӟезьызэ суредаз. Калык синмаськиз: милесьтым но буя, шуизы. Озьы гуртысь ӟезьыос вылын животъёс, сяськаос, батыръёс кылдӥзы. 1 ӟезьыез лэсьтыны кутске ке, вазь ӵукнаысен бер ӝытозь 2-3 нунал тырше. Мыным турын пыртылоно, бакча учконо ӧвӧл ук, шуэ. Гуртоослэсь но зол абдрало Палагае вуэм куноос. Мукет гуртъёсысь таӵе чеберез адӟылэмзы ӧвӧл угось.

Елена Сараматова

Удмурт Дунне
By Удмурт Дунне 21 июля, 2020 11:29