Ӝокыт куазен йӧл 2,2 литрлы усиз

Удмурт Дунне
By Удмурт Дунне 23 июля, 2020 14:35

Кызьы чидало окыт куазез животъёс? Журналистъёсын пумиськылӥз Правительстволэн Тӧроезлэн воштӥсез, гурт удысъя но сиён-юонъя министр Ольга Абрамова.

Гуртоос июне котькуд скаллэсь шорлыдын 20,6 килограмм йӧл басьтӥзы.
Туспуктэм: udmdunne.ru

Шаерамы берло 2 арнязэ 30 градус котыр пӧсь возиськемен, скалъёс нуналлы быдэ 2,2 литрлы ичигес йӧл сётыны кутскизы. Ольга Абрамова пусъемъя, таин сэрен котькуд хозяйство шорлыдын 1,5-2 миллион манетсэ ыштэ. Пудолы 20 градусын ик урод луэ ни: сиемез уг поты, шоканэз пытсаське. Думетын но ялан коргидын улӥсь скалъёслы уката шуг. Куд-ог хозяйствоосын пӧсьлэсь скалъёссы но кунянъёссы кулӥзы. Таӵе ик шуге-леке вуэмын парсь но курег вордӥсьёс но. Пӧсь кариськемлы быдэ гуртоос шугадӟонэ вуо, угось фермаосын огкадь температура возьыны ваньзылэн луонлыксы ӧвӧл, шуэ министр.

Котьма ке но ушъяськымонэз но вань. Гуртоос июне котькуд скаллэсь шорлыдын 20,6 килограмм йӧл басьтӥзы. Табыдӟа лыдпусозь ноку ӧз вуылэ на вал. Кылем арын сярысь со, 2 поллы тросгес.

— Туэ ӝыны ар куспын гурт хозяйствоосын ог 900 йыр скалъёссэс вандӥзы ке но, кылем арын сярысь, йӧл уногес люкаськиз, — шуэ Ольга Викторовна. — Вань гурт предприятиос но фермеръёс дэмен кыскизы 406,3 сюрс тонна йӧл. 2019-тӥ арен ӵошатыса, со 23,2 сюрс тонналы уногес, мукет сямен вераса, 6 процентлы ятыргес. Фермеръёс берло дыре мыло-кыдо кутскизы скал вордыны. Озьыен, тазьы чырмыт ужамы ке, ар пумозь оглом 860 сюрс тонна йӧл кыскомы. Арысь та заводъёс уногес но уногес йӧллы кулэясько бере, хозяйствоос асьсэос но валало, производствоез йылтоно шуыса. Со бордысь барышсы но потэ. Али котькуд килограмм йӧлзэс заводъёс ог 24 манетэн басьто.

Ольга Абрамова пусъемъя, тужгес трос йӧл кыске, котьку сямен, Вавож ёрос. Татын 38,7 сюрс тонна йӧл поттӥзы. 2-тӥ интыын Шаркан ёрос — 35,4 сюрс тонна. 3-тӥын Можга ёрос — 28,3 сюрс тонна.

Елена Сараматова

Удмурт Дунне
By Удмурт Дунне 23 июля, 2020 14:35