Эгра ёросысь Мазьгиын 7 ар ӵоже 17 корка пуктэмын

Ангелина Снигирева
By Ангелина Снигирева 9 июля, 2020 09:24

Гуртэз азинтонъя программа тросаз ёросъёсын рос-прос улонэ пыӵа. Кылсярысь, кылем арын Эгра ёросын та программая 22 семья корка пыронзэ пусйиз. 

Мазьгиысь Надежда Русских
Туспуктӥз Ирина Кожевникова

Программа ужаны кутскемен, гуртъёсын тросгес пуктӥсько, палэнэ кошкемъёс но вордскем палъёсазы бертыны ӧдъязы. Эгра ёрос администрациысь гурт хозяйствоя управлениен кивалтӥсь Ольга Соловьёва ивортэмъя, та ласянь котькинлы адӟем карымон луо Зураын но Мазьги: котькудаз ог 20 пала выль коркаос путэмын. 
— Берло 7 ар куспын Мазьгиысь 17 егит семьяос выль корка пуктӥзы ни, — шуэ Ольга Соловьёва. — Гуртоос, ог-огзылэсь ивор кылыса, программае ӵошен пырисько. Муниципал кылдытэтэн но «Рассвет» хозяйствоен кивалтӥсьёс юрт пуктыны ӵекто. Озьы коньдонэн юрттэт басьтӥзы хозяйствоысь 4 специалистъёс, 3 механизаторъёс, пудо вордон удысын 6 ужасьёс но мукетъёсыз. 
Шудо семьяос пӧлы шедизы осеменатор Надежда Русских, клубын ужась Ольга Залотарёва, нылпи садэн кивалтӥсь Татьяна Завалина но мукетъёсыз.
— Мазьгиысь фермаын вазь ӵукнаысен бер ӝытозь ужано луэ, нош мон сьӧрлось, Нюнягуртысь, ветлӥ, — шуэ Надежда Ильинична. — Гуртысь вазь кошкисько, бер вуисько шуыса, быдэс семьяенымы огдырлы Мазьгие улыны интыяськимы вал, кӧня ке арзэ квартира снимать карыса улӥмы. Мужике Алексей Васильевич но колхозын ужа, 2 пиналъёсмы будо. Курадӟыса улэммес адӟыса, лэся, гурт хозяйствоен кивалтӥсь Сергей Анатольевич Балобанов юаз, пуктӥськыны уд малпаське-а шуыса.
Чебер корка сярысь Надежда Русских лушкемен малпаськылӥз ни вал, нош сое пуктыны луонлык ӧз шедьылы. Кышномурт верамъя, анай капиталэн ӝыны корка но уд пукты, нош ипотекае пырыны ӧз дӥсьтэ. 2009-тӥ арын Надежда Ильиничналэн семьяез. Гуртэз азинтонъя программае пыриськиз, лэсьтӥськисьёс гужем куспын корка пуктӥзы. Лэсьтӥськон 1 миллион манетлэсь ятыр усиз, Русскихъёс анай капиталзэс но уже кутӥзы. 
— Ку ай ми юрт пуктыны вырӟысалмы? Нош али милемлы кулэ документъёс гинэ бичано вал, — шуэ Надежда Русских. — Программае шедимы но, лэсьтӥськисьёс асьсэос ик вуоно коркамылы пӧртэм проектъёс возьматӥзы, ми огзэ бырйимы. Гужем куспын коркамы быдэсмиз. Бордаз мансардаез, верандаез вань. Гурез гинэ милем ӧз яра, газ плита быдӟа гинэ вал, соин ик юртмы вӧзы кочегарка лэсьтӥмы, гур пуктӥмы. Ӝыны ар но ӧз ортчы, корка пырон лэсьтӥмы ни. Нимысьтыз тау карисько гурт хозяйствоен но муниципал кылдытэтэн кивалтӥсьёслы.


Клубын ужась Золотарёв кузпалъёс но та программае шедемзылы шумпотӥзы. Леонид Апполосович 25 арлэсь ятыр клубын ужа, нош Ольга Алексеевна — 15 арлэсь кема. Корка пуктонэ анай капиталзэс кутӥллям, вӧзаз 250 сюрс тыр субсидия сётӥллям. 
Нылпи садэн кивалтӥсьлы Татьяна Завалиналэн семьяез корказэс программае шедемзылэсь азьло пуктыны кутскиллям. Соослы программае пыриськыны ӵектӥллям. Секыт вылэм вакчи дыр куспын документъёс люканы. Корказэс йылаз-пумаз вуттыны 800 сюрс манет пала субсидия басьтӥллям.
Чебер бадӟым коркаос Мазьги гуртэз шулдырто. Чагыр эстӥськон татчы вуэмын ӧвӧл на ке но, егитъёс вордскем гуртысьтызы кошкыны уг дырто, соос гурт удысэз азинтыны юртто, ӵуказе нуналлы оско. 

Валентина Емельянова

Ангелина Снигирева
By Ангелина Снигирева 9 июля, 2020 09:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<