Шӧкыч: Такаез ворми!

Удмурт Дунне
By Удмурт Дунне 21 июля, 2020 17:38
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Огвакытэ мемилэн ыж уллёез кылдӥз. Соку гуртысьтымы ларгетӥсьёсты пастухе уг поттало ни вал, соин ик возь вылэ думылӥм.

Ыжпиос пӧлысь огез аслэсьтыз така луэмзэ шӧдыны кутскиз: сюръёс вуш-вуш бере, лекаськоно ук! Албасты така мемиез но дырын-дырын туздыръяз.

Огполаз та шайтанэн матысь тодматскыны «удалтӥз» мыным но. Меми уж сётӥз: ыжъёсты, пе, ваёно, соос совхоз складъёс палан думемын. Татчы вуыса, адӟисько: мумы ыжъёс гозыямын, ыжпиоссы вӧзазы бызьыло, така уг адскы. Эк, малпасько, та убир думетысь лэзиськем но «кышно» утчаны ышем. Шедьты на сое табере.

Одӥг мумы ыжлэсь ӵогзэ поттыса вуттӥ гинэ но, ӝужыт турынын ӵаштыртэм кылӥськиз. Синъёссэ питыръяса но сюръёссэ урдыса, шорам така потэ.

Шумпотӥ, та пыртосэз коть гурт кузя утчано уз луы шуы­са. Собере, такалэсь лек туссэ адӟыса, кросс сётӥ. Зол ик бызьылыны быгатӥсько вылэм: юнме физкультураен «3» сальылӥзы. Такалэсь пеганъям думетысь лэзем ыж пиосыныз ӵош гурт пала кыстӥськыны ӧдъяз. Нош мукет ыжъёсы озьы ик гозыямын, ыжпиос анайёссы вӧзын бызьыло.

Така ӟудӥз: оло уйылоно, оло бертоно? Остолоп кадь сылэ бере, мон вуттӥ эшшо одӥгзэ ыжез думетысь лэзьыны. Нош така вылам урдскиз ук! Мон бызьылӥсько, ӝыны уллё кыштыр кошке… Тазьы пеганы акыльтӥз. Осто, малпасько, такаез но уг вормы шат!

Вылаз тэтчи, сюръёсаз кырмиськи, турынэ ӵошен пезьдӥм. Кема погылляським ке но, ворми ведь изьверез. Така жуммиз, ӵыжаськыны кужымез быриз. Турынысь мынясь кион кадь потонъям синйылтӥ 2 колхозникъёсты. Таосыз нюръяськонэз кутсконысеныз пумозяз учкемын, лэся: зуркаса ик серекъяло. Пештырски но нырме урдӥ: мынялэ-мынялэ, мон такаез но ворми, колхозникез но пал чиньыеным пешкыто. Собере кылем-мылем ыжъёсме, кӧшкематӥсь такаме улляса, дыртӥ азьпалам кошкем уллёез сутыны.

________

Ирина Мулькина

Удмурт Дунне
By Удмурт Дунне 21 июля, 2020 17:38 Updated