Шӧкыч: Веднаськись ӝӧккышет

Удмурт Дунне
By Удмурт Дунне 24 июля, 2020 16:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Кышно клёнкалэсь ӝӧккышетэз выльдӥз. Вужзэ куштыны дасям — корказе сэрпалтэм. Тае адӟыса, кема ӧй малпаськы. Бакча берысь садамы ӝӧк вылэ вӧлдӥ. Ну, кышно паймоз ни, адӟиз ке. Кыӵе тон, Ондӥ, шырыт вылэмед, шуоз.

Но ӟеч ужме возьматыны ӧз кылды. Ӝытозь садысь ӝӧк вылмы бушам — ӝӧккышет чиптэм-чаптэм луиз.

Пудо бертон вадес кин ке пырись луиз. Корказе потӥ но, бускеле Сандра Нюрка сылэ. Синъёсыз ӝуало, ымнырыз гордэктэмын, кунулаз маке но ӝикыт пачкатэмын.

— Пыр, пыр, Нюрка, — шуыса ымме усьтӥ вал.

Нош бускеле мукет номыр вераны ӧз ни сёты:

— Вань-а тынад правоед, Ондӥ, милям азбартӥмы ветлыны? Оло, монэ серем кариськод, карттэк улэмме шӧдыса? Малы уд шокаськы? Оло, кылдэ ньылӥд? Ноку но веднаськон сямдэ ӧй тодылы! Валамтэ улсы эн кариськы. Тани та клёнкаеныд курег тусьме шобыртэмед. Ӵапак та ӝӧккышет вӧлдэмын вал ӝӧк вылады, 3 ар талэсь азьло мемейдэ ватыкуды. Табере курегъёсы пузамысь дугдозы, ява.

Тазьы вераса, Нюрка кунулысьтыз маке поттӥз но вӧлъяз. Соку гинэ тодмай ышем ӝӧккышетме. Мар шуыны валатэк, серектӥ:

— Зэм, та милям ӝӧккышетмы. Только вераны уг бы­гатӥськы, кызьы азбарад курег тусь вылэ вуиз. Ойдо, та клёнка понна йыркуръяськыса ум улэ.

Тазьы серекъямысьтым, Нюркалэн тусыз ыштӥськем кадь луиз.

— Иське, ӧд веднаськы?

— Какой веднаськом? Мон ведӥн кылэз уг тодӥськы. Собере, ведӥн луон понна вень пасетӥ потаны дышетсконо, пе. Нош мон та вышкы мугорыным коргид сиге но ёркасько.

Нюркаен кенешыса, одӥг малпанэ вуим: ӝӧккышетэз тӧл пельтыса кенер йылтӥ поттэм но тусь вылэ уськытэм, дыр. Эшъёс, бускельёсыныды тупаса улэ. Веднаськыны муг
эн утчалэ.

________

Алексей Трубачев

Удмурт Дунне
By Удмурт Дунне 24 июля, 2020 16:30 Updated