Чигиськон ӧвӧл та…

Удмурт Дунне
By Удмурт Дунне 13 июля, 2020 16:35
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Соос туж егитысен ас интызэс утчазы. Дуннелэн чылкак пӧртэм сэрегъёсаз вордӥськем адямиос, вылтуссыя гинэ ӧвӧл, культуразыя, улон шоры учкемзыя чылкак пӧртэмесь вал. Но Ижкар соосты пыраклы огазеяз, удмурт музъем номырин воштонтэм дор луиз. Асьсэлы но, 5 нылпиоссылы но.

Туспуктӥз Максим Егоров
Удмурт музъем огазея пӧртэм выжыысь калыкъёсты.
Туспуктӥз Максим Егоров

Инбам но музъем выллем…

Университетын ми Таняен ӵош дышетским. Горд бабля йырсиё, тӧдь-тӧдь куо, векчи мугоро нылаш Удмурт кун университетэ дышетскыны Киров улосысь Сибирь гуртысь лыктэм. Тодматским картошка бусыын. Вань студентъёсты сямен ик, милесьтым группамес но 1995-тӥ арын картошка октыны келязы. Соку туж зол паймим Танялэн шаплы ужамезлы. Ваньмы ми — гуртоос, но со кадь жадисьтэмез, син куспын ведразэ тырмытӥсез, оп шуытозь машинае ӝутӥсез, со кадь секытэз но ӝокытэз, тузонэз чидасез ӧй вал. Нош ми шораз кырыжак учкылӥм: малы со аслыз сокем секыт каре?

Таня сирота шуыса, тодӥм дышетскыкумы ни. Но пыр-поч ӧз юалляськы нокин. Егит дыръя ваньмыз сыӵе капчи, улонын сомында тунсыкоез!

Университетын Таня мыло-кыдо дышетскиз. Но 3-тӥ курсысен Пакистанысь пияшен тодматскиз но… шӧдтэк шорысь бызиз. Ми ӧм оске, ваньмыз со зэмзэ шуыса. Яратоно муртэз — Ижысь медакадемиын дышетскись Талха — инди киноосысь актёр кадь, пеймыт куо, чиль-чиль сьӧд йырсиё. Инбам но музъем выллем пӧртэмесь ук та кык адямиос!

Быземез бӧрсьы нокудмы но ӧм адӟылэ ни Танялэсь бабыльскись горд йырсизэ, ваньмыз тач-тач пачкатэмын кузь кышет улэ, нылаш суйёссэ но пыдъёссэ ватӥсь дэремъёсын ветлыны кутскиз, ачиз ик со дэремъёссэ вурылӥз. Нош синъёсыз шудэн пачылазы.

Юн сямо, куддыръя ӝотрак карыны быгатӥсь Таня быдэсак картэзъя кариськиз, мусульман осконъя вӧсяськыны, нуналлы быдэ кӧня ке пол намаз лэсьяны кутскиз, огъя-
улонниысь висъетаз куное пырасьёсты шундыӝужан палась сиёнэн (ваньмыз вераны луонтэм курыт!) куноялляз. Ӝӧк вылаз возиз картэзлэн анаезлэсь — инди киноосын выллем сарие бинялскем кышномуртлэсь — чебер туспуктэмзэ. Та туспуктэмез, пе, студент картэз котьку сьӧраз нуллэ, угось соослэн осконзыя анай-атай кышнолэсь но дуно, Инмар чотын, пе…

Егитъёслэсь улэмзэс ми кыӵе ке инди киноысь суредэз сямен чаклаллям. Йырамы но ӧй вал, соослэн кыӵе ке шугъяськонъёссы вань шуыса.

Атайлэн осконэз ӧз быдэсмы

Танялэн картэз выжыезъя рохинджа калык пӧлысь вылэм. ООН-лэн лыдъямезъя, дуннеын, пе, со тужгес ултӥям калык. Рохинджаос Мьянма кунын уло. Кыӵе дауре соос отчы вуиллям, историкъёс пӧртэм сямен верало. Оглюкетсэ татчы вайиллям секыт ужез быдэсъян понна, мукетъёсыз, ожъёслэсь пегаса, вуиллям.

1942-тӥ арын Мьянмаын улӥсь буддистъёс но мусульманъёс-рохинджаос ваче вуиллям, уно сюрс мурт бырем, уноез кин кытчы, вӧзысь кунъёсы, пегӟем. Та бӧрсьы но ваче вуонъёс ӧз бырылэ, кыкналасянь дасо сюрс адямиос быремын, эриктэмамын, юртъёс сутэмын. Мьянмаысь правительство рохинджаосты Бангладеше улляны выриз, выжыдыя, пе, тӥ отысь. Но сомында калыкез кутыны Бангладеш пумит луиз. Соин ик рохинджаос (600-700 сюрс пала адями) Мьянма вӧзысь лагерьёсы интыямын вал…

Талхалэн анай-атаез войналэсь пегӟиллям Саудовской Аравие. Атайзы — врач. Солэн туж потэ вылэм, пиосыз но эмъясь мед луозы шуыса. Угось врач отын туж дано профессиен лыдъяське, врачъёс трос коньдон потто. Но мурт кунын соос озьы ик беженецъёс радын улӥзы, пыд йылазы султыны луонлыксы ӧй вал. Соин атайзы пиналъёссэ Пакистанэ песянай-песятайзы доры лэзиз. Нылпиос отын школае ветлыны кутскизы.

— Враче дышетскыны отын туж дуно. Россиын со коньдонэн ик улыны но, дышетскыны но дунтэмгес усе. Соин Талха враче дышетскон понна Россие лыктэ, Ижысь медициная кун академие пыре, — шуэ Таня. — Тодам на, дышетскон понна со араз 800 доллар тыре вал. Пичиез братэз Турцие мынэ, отын враче дышетске. Атайзы пиоссэ дышетон понна туж сюлмаськиз, ваньзэ сямен коньдонзэ соослы келялляз, пунэмаськоно но луылӥз. Пиосыз асьсэос но берганы выризы, но враче дышетскыны капчи ӧвӧл ук, кема но. Огпол кин ке чагиськем, Талхалэн атаез висисьёсты дораз но эмъя шуыса. Атайзылы бадӟым штраф тупатӥзы.

Табере Россиын но Турциын дышетскись пиосыз атайзылэсь штрафъёссэ тырыны кулэ вал.

— Талха туж куректӥз. Дышетскон висказ уксё поттыны выриз, таксистын ужалляз, — тодаз вае Таня. — Улӥмы стипендие вылын, мон сирота бере, стипендие бадӟым вал, улон инты сярысь сюлмаськоно ӧз луы: общежитиын сэрегмы вал. 1990-тӥ аръёслэн пумазы нокинлы капчи ӧй вал, дыр. Мон но ялан маке ужаны ӝутъяськи, но картэ ӧз лэзьылы. Шуылӥз: милям нылкышноос уг ужало, соос дорын пукыны, семьяез утьыны, нылпиосты будэтыны кулэ. Талха котьку паймыса но жаляса учкылӥз ужась нылкышноосмы шоры.

Уйёсы таксистын ужась картсэ нылкышно, кӧлыны вормытэк, возьмалляз. Нош огпол ӵукна 5 час ини, 6 час — Талхаез ӧвӧл. Секытэн Таня, кытчы пырон инты шедьтытэк, эшъёсыз доры дыртӥз. Вазиськизы милицие, больницаосы. Нокытын ӧвӧл. Пиосмурт 8 часын бертӥз — жуммемын, коньдонтэк. Егит йыртэмасьёслэн компанизы, машинаяз пуксьыса, быдэс уй ӵоже городэтӥ ворттылытэм.

— Талха лякыт сямо, гань-гань. Оло, соин но шуге-леке ӵем шедьылӥз. Олома но вал, йыртэмасьёс, йыраз пистолетэн мертаськыса, кышкатъязы но, — тодаз вае кышномурт…

Ӝоген Танялэн пиез вордӥськиз. Собере бӧрсьысь бӧрсе эшшо кыкез. Ижын 2000-тӥ аръёслэн кутсконазы 3 пиналэз будэтыны туж секыт вал. Ваньзэс сюдоно, дӥсяно, асьсэлэн улон сэрегзы ӧвӧл, патерысь патере кыстасько. Талха весь кошкон мылкыдын улӥз, семьязэ вордӥськем палъёсаз, шуныт, шундыё палъёсы, нуыны малпалляз, атаезлы тырмыт юрттыны быгатымтэез понна но ассэ ялан пыкылӥз. Мукет ласянь, со быдӟа семьяен шуак кунсьӧры кошкыны соослэн коньдонзы но, дӥсьтонзы но ӧй вал. Кин тодэ, мар отын возьма? Кыӵе ке кужым соосты татын возиз кадь. Соку Таня картэзлы ӝот-ӝот вераз: малы ялан астэ курадӟытӥськод, йырдэ тӥяськод? Берты атаед доры, юртты солы! Атаед тыныд оскиз, тӥляд сямъёстыя тон кулэ солы пунэмзэ берыктыны! Ми понна эн сюлмаськы, ваньзэ вормом…

Талха кошкиз. Таня куинь пичи пиналъёсын, юрттӥсьтэк, ӵыжы-выжыостэк кылиз Иже. Зэмзэ вераса, со ачиз но мурт шаере кошкыны дась ни вал: тани Талхаез отын рос-прос интыяськоз, уж шедьтоз, пумен-пумен быдэс семьязы выжоз. Но Талха анай-атаез доры 9 толэзьлы чуказ, рос-прос уж шедьтыны таки ӧз быгаты, Саудовской Аравиын регистрацилы, лицензылы туж трос уксё, пе, тыроно, соин, отын-татын ужаса, атаезлы юрттыны выриз, висказ берен Россие лыктон вылысь уксё люказ.

Музъемед ке вань — тон шудо!

Картэз бертэм бере Таня дораз пукыны ӧз чида ни, нылпи утись шедьтыса, базаре вуз карыны потӥз. Ачиз ик Москвае вузлы ветлӥз. Нылпиос анайзэс ӧз ик адӟылэ, соосты утьыны атайзы выриз, висказ таксистын ужалляз. Туж юрттылӥз нылпи утисьсы — мӧйыгес ӟуч кышномурт.

Пумен ваньмыз радъяське ни вал кадь, но кутскиз кризис. Танялэн вуз каронэз куашказ. Со нош ик ужтэк кылиз. Та вакытэ кышномурт нырысьсэ чигиськиз кадь. Со дась вал Ижысь но, Россиысь но воксё кошкыны. Но кытчы? Кытын солэн дорез? Кин сое но солэсь нылпиоссэ возьма?

Ӝоген картэзлэн анай-атаез улонысь кошкизы. Талхаез вордӥськем интыосаз кыскись сӥньыс чигиз…

Тодмозы Таняез Ижысь шаурма лэсьтӥсь лавкае ужаны ӧтиз. Егит кышномурт уй но нунал, жадёнэз валатэк, тыршиз. Нош кӧня ке ар ортчыса, аслэсьтыз лавказэ усьтӥз ни.

— Куд-огез шуоз: мар со шаурма? Созэ-тазэ бинялтӥд но — дась. Но зэмос ческыт шаурма лэсьтыны дышон понна тодӥськод-а, кӧнязэ аслыд эскероно-веръяно ай! Ваньзэ эсэпсэ валаса тырон понна мыным толэзьёс кулэ луизы. Но куддыръя ӝож луылэ ик: та ужен вырон понна-а мон университетын дышетски? Талха но врачлэсь дипломзэ басьтӥз, нош удысэзъя ужаны ӧз кылды. Уждунъёс укыр пичиесь вал ук. Юрттӥсьмы, улон сэрегмы ӧвӧл, пунэмъёсты тыроно. Али ас удысмыя ужаны мыноно на ке, тодон-валанъёс вунэмын ни. Соин вань кужыммес сётӥськом нылпиосмес будэтон, дышетон понна. Милям ӧз пӧрмы, тӥляд мед пӧрмоз, тӥ осконмы, шуиськомы.

Танялэн 5 пиналыз — 3 пи но 2 ныл. Ваньзы пеймыт куо, сьӧд йырсиё. Туж шулдыр уло, ог-огзэс валаса, гажаса. Бадӟымез пиез школазэ азвесь медален йылпумъяз, ИжГТУ-ын дышетске. Нош пиезлэн яратоно нылашез, пе, копак удмурт тусо — востэм гинэ, горд… Егитъёс шоры учкыса, Таня ассэ тодаз вае, пальпотэ. Мукетъёсыз пиналъёсыз школаын дышетско на, ваньзы «витьёслы» гинэ.

Кышномурт дуннеысь, Россиысь югдурез чакласа возе, лыдӟиське.

Нош 2015-тӥ арын Танялэсь шудоез быдэс дуннеын ӧй вал, дыр! Улон интылы ёрмись трос нылпиё семьялы шуыса, соослы Ижкар вӧзысь Октябрьский посёлоке музъем сётӥзы.

— Ижын яке Ижлы воксё матын нимаз корка пуктон сярысь трос аръёс малпаса улӥм, — тодаз вае Таня. — Музъеммес адӟеммы потыса, толэз мырдэм чидамы. Лымы шунаса вуттӥз гинэ, учкыны мынӥмы. Та дуннеын табере милям асьмелэн интымы, музъеммы вань!

Зэм, Октябрьский посёлокын сюрес ӧвӧл, тулыс-сӥзьыл нӧдэз лёгано луэ. Но Таня оске: ӝоген сюрес но лэсьтӥськоз.

Вуоно коркалэсь проектсэ нылпиосынызы ӵош суредазы, пичиен-пичиен 5 ар ӵоже ӝутӥзы. 300 квадрат метр юртэз, нокин юрттӥськытэк, асьсэ киосынызы пуктӥзы.

— Пиналъёсы, пиосы туж юрттӥзы. Асьмеос ик фундамент кисьтӥм, кирпич нуллӥм, тырим. Куддыръя нылпиосы туж жадьылӥзы, эшъёссы шудыса ветло ук, но мон мылкыдзэс ӝутыны тыршылӥ: тани коркамес пуктом, котькуддылэн нимаз висъетты луоз.

Малпасько, улонын олома но луэ, нылпиосы мукет азе кошкизы, асьсэ семьязэс кылдытӥзы ке но, мед тодозы: татын соосты котьку возьмало…

Пуш дуннемес адӟим

Нош ассэ Таняез вордӥськем гуртаз, Киров улосысь Сибирь гуртын, нокин уг возьма ни. Аслаз будэмез сярысь со нокинлы ӧз мадьылы. Ма, ачиз но вунэтыны тыршиз, вылды. Семьяязы соос 2 нылъёс вал. Атайзэ Таня рос-прос уг ни тоды. Танялы 8 арес дыръя мамазы кыкетӥзэ бызиз. Но таиз атайзы туж лек вал. Нылъёс, ляльчиос кадь, вань ужез син куспын быдэсъяны кулэ вал.

— Лек сюратаен улыса ик, мон вань ужез ӝог но ӟеч лэсьтыны дыши, дыр, — шуэ Таня, — мае ке дыраз ӧд лэсьты ке — шедёз. Нош юыса бертэ ке, кытчы пырон инты шедьтоно ӧй вал…

Таня ӝоггес будон но кытчы ке кыдёкегес кошкон сярысь гинэ малпаськыса улӥз. Но шӧдтэк шорысь пыраклы кошкиз анайзы. Ошиськиз. Танялэн верамезъя, мамазы картэзлэсь ултӥямзэ ӧз чида. Ачиз Таня соку 10-тӥ классын дышетске ни вал, апаез палэнэ кошкемын.

Ӧйтӧд, кызьы радъяськысал нылашлэн улонэз, Сибирь гуртысь клубен кивалтӥсьсы Елена Квашина солы ӧй ке юрттысал. Таняез со сьӧраз, Удмуртие, нуиз, университетэн тодматӥз. Ӵапак со вакытэ палэнысь удмуртъёслы УдГУ-ысь удмурт филологияя факультетын дышетскыны ӟеч луонлыкъёс сётӥсько вал. Таня, удмурт кылэз школаын дышетэмын ӧй вал ке но, экзамензэ умой сётӥз.

— Удмуртия мон понна зэмос рай потӥз, — тодаз вае Таня. — Сыӵе эркын! Татын монэ нокин уг ултӥя, татын мон анай кылыным вераськыны быгатӥсько — вань улонме мон Инмарлэсь та интыез кури кадь! Удмуртиын выль тодмоосы, эшъёсы кылдӥзы. Но мынам уг поты вал соослы азьвыл улонэ сярысь мадеме. Ваньмызлэн анай-атайёссы вань, ваньзы шутэтскон нуналъёсы гуртазы бертыло… Нош Талхаен ми кык сирота муртъёс кадь пумиським. Со но аслаз, нокинлы валантэм дуннеяз, мон но. Паймисько: со сыӵе чебер, малы меда монэ бырйиз? Кӧня чебер нылъёс сьӧраз мыныны дась вал… Но ог-огмы борды кызьы ке кыстӥським, оген мӧзмись пуш дуннемес адӟим кадь…

Вордӥськем гуртаз Таня берпуметӥзэ бертылӥз 2005-тӥ арын. Ӧз, сюлэмыз ӧз ни вырӟы, берен ӧз ни кыстӥськы. Берло аръёссэ буйгаз Талхаез но, вордӥськем палъёсысьтыз верантэм чебер инкуазез тодаз вайылэ ке но. Луысал-а соослэн шудзы Азиысь кудаз ке кунын? Кин тодэм.

— Жаль, нылпиосы удмурт кылэз уг тодо, — шуэ Таня. — Мон соосты удмурт кыллы дышетыны ӧй ваньмылы. Талха бадӟымъёссэ ас кылызлы дышетыны выриз ик, малпалляз, вордӥськем палъёсаз бертоно луиз ке, мед тодозы. Но собере со но ӧз ни выры. Малпасько, валтӥсез — со кыӵе кылын вераськон ӧвӧл, валтӥсез — визьнодан, воспитание. Нылпиосы мукетъёсызлэсь номырин уг висъясько, озьы ик лӧптылыны ярато, озьы ик соцсетьёсын пуко. Но ми соослы атайзылэсь осконзэ, мусульман осконэз, пыӵатӥмы, Ижысь мечете быдэс семьяен вӧсяськыны ветлӥськомы.

Нылпиосты ӟеч будэтон понна семьяын ог-огдэ валан, яратон луыны кулэ. Пиос тросгес атайзы котырын, нылъёс — мон вӧзын. Кызьы ог-огдэ валаса улоно? Вань уждэ ӟеч малпанъёсын гинэ лэсьтоно, адямилы ӟеч мед луоз, сиён-а тон пӧзьтӥськод, дорысьтыд огшоры гинэ потӥськод-а. Ӟечез пыр гинэ шуд лыктэ, Инмар озьы тау каре.

Жалясько, ӧй ужа шуыса…

— Нош малы тон сокем пумит вал семьяды сярысь газетэ гожтыны? — юасько Танялэсь. — Тынад ортчем сюресэд, шуг-секытъёсыд, соосты вормыны быгатэмед, семьядэс утемды троссэ малпаськытоз, вылды.

— Тодӥськод-а, мон аслым кыл сётӥ вал, журналистъёсын ноку кусып уг возьы шуыса… Студент дыръямы ай милемыз Талхаен удмурт радиое меӵак эфире ӧтизы, вераськом, пе, кызьы пӧртэм выжы калыкъёс пӧлысь егитъёс семьяен уло, кызьы ог-огзэс валало. Ми соглаш луим. Передача туж умой мынэ вал, но шӧдтэк шорысь эфире кыӵе ке воргорон жингыртӥз но туж лекъяськиз: тӥ, пе, удмурт нылъёс, уксёлы, узыр улонлы вожъяськыса, кунсьӧры бызиськоды… Та веран монэ туж зол шуккиз. Кызьы луэ кинэ ке мар ке понна пыкылыны, зэмос югдурез уд ке тодӥськы? Кызьы луэ яратон понна пыкылыны? Кызьы луэ ваньзэс одӥг сямен дунъяны?

Зэм, улонын олокыӵе но адямиос вань. Мон туж умой валасько, журналист пичи но янгыш ӧй вал. Но со бӧрсьы пушкам маиз ке чигиз. Мон ворсаськи, одӥг сюлмаськонэ, малпаськонэ сярысь но палэнысь адямиос ӧз тодылэ. Али, трос аръёс ортчыса ни, тонэн пумиськыса, малы ке усьтӥськи…

— Нош маке сярысь жаляськод-а?

Огшап малпаськыса, кышномурт вазиз:

— Ужаны вазьгес ӧй поты шуыса.

Шонер-а валай меда, шораз паймыса учкисько:

— Вазьгес?..

— Бен, вазьгес. Шуисько ук, картэ монэ ужаны уг лэзьы, жаля вал, пичи пиналъёсын но уж трос, шуэ вал. Нош мон сое жалялляй, семьямес сюдыны ӟигарыз уг тырмы шуыса. Отысен ик вань шугъяськонъёсмы пото вал. Дорын пукыса, мон ӝокалляй. Али со адӟе: семьяямы мон двигатель. Мыным вань ужез али ик кутсконо, бергатоно, шуг-секытъёс монэ уг кышкато. Семьяын, малпасько, кышномурт пиосмуртлэн нырысетӥ визь-кенеш сётӥсез, эшез луыны кулэ.

________

Елена МИННИГАРАЕВА

Удмурт Дунне
By Удмурт Дунне 13 июля, 2020 16:35 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<