Учке милесьтым дэреммес

Удмурт Дунне
By Удмурт Дунне 6 июля, 2020 16:13
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Пичи Пурга ёросысь Баграш-Бигра гуртысь Матвеев кузпалъёс синчеберзэс кадь утьыса возё Быдӟым ож вакытэ лэсьтэм туспуктэмез — отчы пуктэмын 7 нылпиё анай.

Пичи Пурга ёросысь Баграш-Биграысь Москвинъёслэн семьязы. 1941-тӥ ар.

— Та туспуктэм вылын — Нина кузпалылэн мемеез Васса Михайловна Москвина шальтыр-шальтыр нылпиосыныз, — веранзэ мытэ «Баграш-Бигра» книгаез люкась, та гуртлэн старос­таез Анатолий Матвеев. — Но кышное отчы шедемын ӧвӧл: туспуктэм лэсьтэмын 1941-тӥ арын, нош кузпалы вордскиз ай 1945-тӥ арын, атаез Андриян Александрович ожысь вуэм бере. Бур палаз сылӥсь нылашлы кема улыны кылдымтэ: 1932-тӥ арын вордскем маке 1944-тӥ арын кынманы шедем но висьыны усем, утьыны быгатӥллямтэ. Васса Михайловналэн кылемъёсыз нылпиосыз ваньзы калыке потӥзы, ужасесь вал.

Туспуктэмын нылпиос ваньзы тӧдьы дэремъёсын, соос юри вуремын кадь фотое пуксён понна.

— Озьы ик вань. Я, кылзэ ай, — веранзэ азьланьтэ Анатолий Яковлевич. — Васса Михайловна вордскемын 1901-тӥ арын. Быдӟым ож кутскыку, солэн 7 нылпиез
вал ни. Андриян кузпалыз эшшо вазьгес, 1898-тӥ арын, вордскемын вылэм. Ужам со Огырчиысь (Агрыз) чугун сюрес станциын, вагон тупатъям, путез чаклам. Война кутскем но, сое оже басьтӥллям. Но меӵак фронтэ ӧвӧл, чугун сюресъёсты эскерыны, паровозъёсты тупатъяны нуиллям. Озьы со Сталинград котырын
чугун сюрес техникаез чак­ласа воземын.

Васса Михайловна оже кошкем картсэ шумпоттыны малпам. Кунянзэ вузам, вань нылпиосызлы дэрем вурыны шуыса кӧня ке метр сатин басма басьтэм. Нылъёсызлы но, пиосызлы но быдэн дэрем вурем. Быдэс семьяеныз, Огырчие дэмен мыныса, туспуктэме пуксиллям, сое фронтэ гожтэтэн келяллям.
Мед, пе, адӟоз атайзы: курадӟыса ум улӥське, тани выль дэремъёсын ветлӥськом. Тус­пуктэм келямын вылэм 1941-тӥ арын, нош атайзы ожысь вуэм 1944-тӥ арын. Сьӧдкылен (тифен) висьыны кутскем но, комиссовать кариллям, дораз лэзиллям. Гурто­осыз паймиллям: лы но ку
бертэм, ӟигартэм. Тазалыкез ляб шуыса, Огырчиысь станцие но ужаны кутӥллямтэ ни. Нош семьязэ маин ке сюдоно ук, эшшо ке вордскиз на 8-тӥез пиналыз. Озьы со быдэс улонзэ гур лэсьяса, пуктӥськыса ветлэм ни, — шуэ А. Матвеев.

Нош Васса Михайловна пусъемын вылэм анайлык­лы сӥзем гадьпусэн. Вӧзаз эшшо ке вуриськон машина кузьмаллям на. Соин вуриськыса, сомында нылпиоссэ дӥсяны быгатэм. Но жаляса верано, мӧйымытозяз улыны кылдымтэ солы: секыт висьыса, кулэм 1956-тӥ арын. Нош Андриян кузпалызлы улыны кылдэм 10 арлы ятыргес, 1966-тӥ арозь.

Туспуктэм вылысь адямиослэн ӵыжы-выжызы луэ тодмо кибашлы, калык дӥсез улӟытӥсь Татьяна Москвина. Андриянлэн Ермолай вынызлэн кенэз луэ со. Солы но та туспуктэм туж дуно.

— Та туспуктэмен усьтӥм «Учкы мынэсьтым дэремме» фестивальмес, — шуэ Татьяна Никитична. — Со вакытысь кӧня ке сатин дэремъёс­ты шедьтӥм, нылъёс, соосты дӥсяса, сцена вылтӥ ветлӥзы. Залын пукисьёс синкылияськизы. Туспуктэм вылысь нылъёс улӟизы, кожалод…

________

Елена ТУГАШОВА

Удмурт Дунне
By Удмурт Дунне 6 июля, 2020 16:13 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<