Ужаса шудо луо Пичи Пурга ёросысь Вуж Мӧнья гуртысь Егоровъёс

Удмурт Дунне
By Удмурт Дунне 10 июля, 2020 13:26
Светлана но Михаил Егоровъёс.

Писпу дано емышен, адями — ужен, шуо калыкын. Ӵапак тыршись луэмзы, ог-огзылы юрттӥськыса улэмзы понна гажало Пичи Пурга ёросысь Вуж Мӧнья гуртысь Егоровъёсты. Туэ соослэн арзы вормонъёсын узыр: «Арлэн семьяез» элькун конкурслэн «Гуртысь семья» номинацияз устоосыз луизы, Гурт удысъя но сиён-юон министерстволэсь хозяйствозэс азинтыны 15 миллион грант утӥзы. Со сяна, Светлана но Михаил ЕГОРОВЪЁС — 4 визьмо нылпиослэн анай-атайзы. 2018-тӥ арын семьязы эшшо 3 муртлы йылӥз: кузпалъёс бордазы 3 сузэръёсты басьтыны дӥсьтӥзы. Табере Егоровъёс одӥг липет улын лулысь-сюлмысь 11 кузя уло.

450 рулон турын

Егоровъёс семьяязы, уката ик гужем, муш палэпын кадь, гуж-ж вазе, телевизор азьын тэк пукисьёс ӧвӧл: кин ке кунян сюдэ, мукетыз турын куя, куинетӥез скал кыске. Егоровъёс — семьяен ужась фермеръёс, пичиез но, бадӟымез но хозяйствозэс азинтон понна сюлмасько, котькудӥзлэн аслаз ужез. Пичи дырысенызы нылпиоссэс ужез гажаны, ваньзэ ӵошен вормыны, вордӥськем шаерзэс гажаны дышето Светлана Александровна но Михаил Владимирович. Пиосмурт 2012-тӥ арын аслэсьтыз фермер хозяйствозэ усьтӥз. 2017-тӥ арын, Михаил Владимировичлэн тазалыкез лябӟем бере, кивалтон биньгозыез ас кияз басьтӥз Светлана Александровна, та бӧрсьы Егоровъёс фермер луизы быдэс семьяен. Бадӟым семья но бадӟым хозяйство — со бадӟым кыл кутон, но со ныпъ-етэз Егоровъёс ваньзы ӵошен, огкылысь ужаса, нуыны вормо.

— Азьвыл кин ке шуысал ке, фермер луоды, ӧй оскысал, — вераны кутске Светлана Егорова. — Но улон ачиз ваньзэ радъя, лэся. Вордӥськем гуртам, Кечолын, котьку скалэн улӥмы. Вуж Мӧньяла быземе бере но хозяйствоямы 2 скал возимы, собере соос 3 луизы. Гуртын тыро-пыдо уж ӧй вал бере, кузпалы 2012-тӥ арын биржае султӥз. Со вакытэ ужтэк пукисьёслы кун ласянь юрттэт сётӥське вал. Озьы картэлы 60 сюрс манет висъязы, со уксёен кунянано скалъёс басьтӥм. Озьы сюроосмы 8 кузя луизы, киын секыт но кема кысконо шуыса, аппарат басьтӥм на. Пичияк возьёсмы но вал, асьмеос ю-тысь кизьылӥм. 2017-тӥ арын бусыямы асьме кужымен гид ӝутӥм ни. Басьтэм ветылъёсмес отчы лэзим. Соку ай кун ласянь нокыӵе юрттэт ӧй вал, банкъёсысь пунэмаськыса, выримы.

Егит семья

Али Егоровъёслэн ог 50 пудо йырзы, 33-ез кысконо скалъёс. Соос ваньзы ӟеч выжыысь басьтэмын шаерысьтымы гурт хозяйствоосысь. Скалъёссэс нуналаз 2 пол кыско. Ваньзэ утялтыса вутто 2 кузя: ачиз Светлана Александровна но эшшо одӥг доярка, юрттӥськыло нылпиоссы но.

— Ужан нуналмы сокем вазь уг кутскы, 6 часлы фермае тубисько, 6 но ӝыныен скал кыскыны кутскиськом ни, — веранзэ азинтэ кышномурт. — Али 3 скал кыскон аппаратмы вань, но молокопроводмы ӧвӧл ай, йӧлмес киын нуллӥськом. Скаллэн йӧлыз кыл йылаз шуо, соин пудомес сюлмаськиськом ӟеч вож сиёнэн, посыпкаен сюдыны. Нуналаз 33 скаллэсь ог 800 литр йӧл басьтӥськом, со йӧлэз сӥятӥсь танкын возиськом. Йӧлмес кытчы вузаны ум ёрмиське, сое басьтэ «Ильинское молоко» предприятие. Азьло асьмеос доразы нуллӥськом вал, али соос асьсэос ми доры лыкто ни. Туэысен скалъёсмес пастуке ум поттаське. Кылем арын пастукам ик, но нимаз адями кулэ шуыса, туэ гидъёсын возёно кариським. Но животъёсмылэн загонын тӧлатскыны, поръяны луонлыксы вань.

Егоровъёс сюлмасько ужзэс капчиятон понна. Али турынзэс быдэсак техникаен окто-калто ни — тракторзы, турнан тӥрлыксы, мажессы, рулон лэсьтон аппаратсы вань. Нош кемалась ик ӧвӧл мажесэн, саникен уйшор берозь выроно луэ вал, тодаз вае С. Егорова.

— Пиосмес утялскыны, выж миськыны ӧй косылы, соос ялан атайзы бордын ужазы. Озьы 7-тӥ-8-тӥ классын дышетскыкузы ик, трактор нуллыны быгато ни вал. Соос гужемзэ атаенызы ӵош турын утялтонэн выро, ми, нылъёс, ум ик йӧтылӥське со борды. Туэ турынэз вожын ик ог 200 рулонэ бинялтӥм, эшшо 250 рулон кӧс турын карим, со сяна, 2 гуэ силос люкаськом на.

Скал кыскись но, бухгалтер но

Кӧня ке ар талэсь азьло Егоровъёс грант утон понна проект гожтӥзы вал, но соку коньдон басьтыны ӧз быгатэ. Ветлӥзы ёросысьтызы мукет фермеръёс доры ужзэс учкыны. Отысь
бурдъяськем мылкыдын бер-тӥзы, озьы выль мылкыдын грантлы проект гожтон борды кутскизы. Пӧрмиз — 15 миллион манет тыр грант утӥзы, бордаз эшшо 10 миллион манет кредит басьтӥзы на.
Али проектсэс улонэ пыӵатон сярысь сюлмасько, тани-тани вуж гид вӧзы выльзэ пуктыны кутскозы.

Ужзы пӧзе.

— Калык гуртын ужтэк пуке, кин ке биржаын сылэ ке но, скал кыскисе лыктэмзы уг поты, ужды секыт, пе, — шуэ кышномурт. — Соин ик мынам ужмес капчиятон понна молокопроводэн ферма пуктэме кемалась потэ вал ини. Грантлы луыса малпанмес улонэ пыӵатыны быгатом ни. Вылез ферма 100 йырлы чакламын, отын кысконо скалъёс луозы. Вужаз ветылъёсты, кунянъёсты возём. Гид ӝутэм сяна, трактор, ӟеч выжыысь скалъёс басьтом на. Ужмес паськытатыса, бордамы эшшо 4 ужась кутэммы луоз. Малпасько, молокопровод кылдӥз ке, гуртоос ужаны мыло-кыдогес лыктозы. Бадӟым тау поселенимылэн кивалтӥсезлы Виктор Сергеевлы. Тани ферма ӝутыны ужасьёсты ӧтёно, соосты кытчы ке улыны интыяно. Та пумысен юрттӥськыны басьтӥськиз Виктор Иванович.

Ужаку час шоры уг учко, шуо. Озьы ик вань. Светлана Александровналэн ужан нуналыз 6 часын кутске ке, дораз со пыре
23 час бере гинэ. Кышномурт покчи нылпиосты визьнодасьлы дышетскемын, но скал кыскись но, бухгалтер но, ветеринар но, агроном но луэ. Эшшо нунал ӵоже сое я Пичи Пургала,
я Ижкаре документъёсын ӧтё. Озьы огыр-бугыр улыса, нуналлэсь ортчемзэ ик уг валаськы, шуэ кышномурт.

— Агрономлы но, бухгалтерлы но нимаз дышетскеммы мынам но, кузпалылэн но ӧвӧл, — азинтэ С. Егорова. — Но уж ачиз котьмалы дышетэ. Мынам атае вордӥськем Кечол гуртам агроном луыса тыршиз. Кузпалылэн но атаез Вуж Мӧнья хозяйствоын агроном, бӧрысь председатель вал, ужаны быгатэмез понна трос данъетъёсын пусъемын. Шуыны луоз, анай-атайёсмы милемлы пичи дырысенымы гурт ужез гажан мылкыд пыӵатӥзы, ужаны дышетӥзы. Соослэсь юалляськиськом вал, мае ку кизёно, маин пазяно, кызьы утялтоно. Со ваньмыз йыре кылемын. Али со ужамы туж юрттэ. Пудолэн тазалыкез ласянь сюлмаськонъёс кылдо ке, вазиськиськом ёросысь яке гуртысь ветеринаръёсмы доры. Озьы пумен-пумен та удысъёсын но тодон-валанъёсмы паськытало. Собере асьме коже но дышетскыны выриськом, али луонлыкъёс трос — Интернетын бугыръяськиськом, ёросысьтымы гурт удысъя управление дышетон семинаръёс ортчытъя. Нылпиосмы но гурт удысъя, техникая тодон-валанзэс муромыто, котьма ласянь милемлы юрттӥськыны выро. Соосты гурт ужез гажаны пичиысен дышетыны выриськом, но косыса-курыса ум. Пиналъёс анай-атайёссылэсь адӟем каро ук, соин ик кузпалыным мае ке лэсьтыны кутскиськом ке, бордамы нылпиосмы но чортытэк итӥсько. Озьы пичиен-пичиен ужез яратон мылкыд пыӵа, дыр.

Семьязы бадӟым.

Бадӟым семья

Котькуд анай-атай шудо, нылпиоссы шудоесь, тазаесь, азинлыкоесь ке. Светлана Александровналэн но Михаил Владимировичлэн бадӟымез Марина нылзы ачиз анай ини, со Ханты-Мансийскын улэ, эколог. Вордскем гуртаз ӵем вуылыны уг кылды, но куное бертэ ке, семья понна со бадӟым праздник луэ ни. Евгений пизы Ижысь техникая кун университетэз йылпумъяз. Уноез егитъёс сямен городэ улыны ӧз кыльы — семьязылэсь ужзэ азинтыны анай-атаезлэн бурд улазы берытскиз, Ильинскысь Маша кузпалзэ но сьӧраз вайиз. Пичи нылзы вань. Маша кензы дышетскемезъя агроном, Ижысь гурт удысъя академиез йылпумъяз. Мария — Светлана Александровналэн нырысетӥ юрттӥсез, со дышетскись нылъёссэс учке, урок лэсьтыны юрттэ, фермер хозяйствозэс нуыны документъёсты дася, сиён пӧра.

Вячеслав Ижысь гурт удысъя академиын дышетске, спортэз гажа, гитараен но арганэн шудэ. Виталийзы Ижысь лэсьтӥськонъя техникумын тодон-валан люка, вуоно механик. Нунал вордске ке, пияш атаезлэн гаражаз ыше, ялан мае ке сэрттэ, бича. Чыры-пырыослэсь но хозяйствоын кулэ луись арбериос пӧрмытэ, шумпото пизы понна анай-атаез. Егоровъёслэн бордазы улэ на Михаил Владимировичлэн анаез, Анастасия Ивановна. Мыло-кыдо кышномурт ноку ужтэк уг пукы, я бакчае потэ, я чипы-курегъёс котырын, я керттӥське, я пужыятске, я пӧраське.

2018-тӥ арын семьяын кылдӥзы Настя, Алина но Злата сузэръёс — мумызылэсь анай луон правозэ талам бере Егоровъёс соослы приёмной семья кариськизы. Туэ нылашъёс 7-тӥ, 8-тӥ, 9-тӥ классъёсты йылпумъязы.

— Нылпи басьтыны далайгес малпамы вал ини, ачим но
кузпалы приёмной семья луон понна нимаз дышетскыны ветлӥм, — валэктэ Светлана Александровна. — Соку пичи пиналэз басьтыны ӧдъяськомы вал, но ӧз пӧрмы. Мылкыдмы, оло, буйгаз вал ини… Но огвакыт ёрос администрациысь опекая ёзэтысь адямиос жингыртӥзы. 3 сузэръёсты, пе, бордады уд-а басьтэ? Мумызылэсь сокугес гинэ анай луон правозэ басьтӥллям, нылъёсты, пе, детдоме келяны дасясько. Мон соку ик басьтом шуыса малпай. Но нырысь-валысь та пумысен семьяеным кенешим. Нокудмы пумит ӧй вал. Сӥзьыл нылъёсты нырысьсэ дорамы вайимы. Али ке но тодӥсько на: бакчаысь яблок бичаны кури. Соос паймизы: малы, пе, ми бичаны кулэ? Секыт ужез лэсьтыны курем сямен емышез бичазы соку. Соос ужаны чик дышемын ӧй вал. Мукет дыръя выж миськыны кури. Нош соос, мучолоез умой-умой пызьыртыны кулэ шуыса, уг валало вылэм. Озьы 2 толэзь ӵоже дышетским ай мучолоез пызьыръяны,
котькуд сэрегысь тузонзэ ӵушылыны, койка улъёсты
миськыны. Нош али нылъёс асьсэос дорам лыкто ини, мама, маин юрттоно шуыса.

Удмурт сям-йылолъёсты гажало.

Нырысь монэ тётя шуо вал, бӧрысь — мама Света, али мама шуыса вазисько ни. Ас понназ озьы пӧрмиз, ноку ӧй курылы монэ озьы шуыны. Нылъёсмы воксё ӟучесь вал ке, табере, гурт нылпиосын ӵош шудыса, удмуртомизы ни. Умой-умой предложениосын вераськыны быгато.

Нылъёслы котькыӵе ужез оскыны луэ ни. Фермамы гурт сьӧрын. Корка вӧзамы кунянъёсты возиськом на. Фермаысь доре куддыръя бер ӝыт гинэ вуыны ваньмисько яке ужъёсъя кытчы ке кошкисько ке, тодӥсько, дорын ваньмыз умой, нылъёс кунянъёсты сюдӥзы, гидэз сузязы шуыса. Шутэтскон нуналъёсы нылъёс кунян сюдонэз ас вылазы басьто, мынэсьтым ужме капчиято.

Егоровъёс бусыысь лумбытъёсын уг пырало ке но, котьку но шедьто дыр быдэс семьяен шутэтскыны. Пельнянь кутоно ке, ваньзы ӵошен ӝӧк сьӧры пуксё, огез пушкес лэсьтэ, мукетыз ыльнянь нырке, куинетӥез погыльтэ. Шутэтскон нуналъёсы дэмен шаньга пыжо. Гужемзэ ваньмон дыръя пыласькыны, чорыганы ширто, толалтэ гурезьысь нискылало, коньки вылэ султо. Вордос нылъёс нырысьсэ тодӥзы, мар со вордӥськем нунал. Ӵукнаысен котькудзылэн именниказ пӧраськыны кутско, ӝыт эшъёссы быдэс корка тыр люкасько, шашлык пыжо, праздник туж шулдыр, шуныт мылкыдын ортче. Уж висказы Егоровъёс пӧртэм пумо вожвылъяськонъёсын семьязы сярысь вераны дӥсьто. 2019-тӥ арын «Успешная семья Поволжья» конкурсын лауреатъёс луизы, нош туэ соосты устоосыз шуизы «Арлэн семьяез» конкурслэн «Гуртысь семья» номинацияз.

Гуртоос уз алдаське, Егоровъёслэн семьязы бадӟым ке но, котькытын чылкыт, утялтэмын, азбаразы сяськаос пушъё. Михаил Владимировичлэн киосыз зарни, вазенгес со пу вӧлонэн выриз, кортэз чебер вандылӥз, та ужлы пиоссэ но дышетӥз. Светлана Александровна вуриськыны, чильпаськыны, пужыятскыны, керттӥськыны усто, семьяосыз ушъяло пӧраськемзэ
но, кылдэ ньылод, пе.

________

Ангелина СНИГИРЁВА

Удмурт Дунне
By Удмурт Дунне 10 июля, 2020 13:26
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<