Удмурт нимъёс — федерал программаын

Удмурт Дунне
By Удмурт Дунне 14 июля, 2020 15:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

«Улон инты но городэз радъян» федерал проект улсын кунамы быдэсъяське «Улыны тупась город» программа. Со чакламын 2022-тӥ арозь.

Пичи Пурга ёросысь Вуж Мӧньяысь
шудон интызы Луд нимаське.
Туспуктӥз Ирина КОЖЕВНИКОВА

Берло аръёсы та программа чотын шаерысьтымы городъёсын но гуртъёсын трос лэсьтэмын ни. Кылсярысь, тупатъямын сюресъёс, тротуаръёс, пуктэмын нылпи площадкаос но мугорез кыдатон интыос, выльдэмын синпелетъёс но трос мукет. Пусйыны кулэ: та программа улсын юрттэт сётӥське 1 сюрслэсь ятыр улӥсен гуртъёслы.

Пичи Пурга ёросысь вуж мӧньяос но та программалэсь пайдазэ ас вылазы шӧдӥзы. Гуртсы бадӟым, 1 сюрс 400-лэсь ятыр адями улэ. Семьяос кылдо, нылпиос вордско, нош соослы шудыны гуртын нимаз интызы ӧй вал. Пиналъёс вожъяськыса учкылӥзы городысь нылпи площадкаос шоры. «Улыны тупась город» программа быдэсъяськыны кутскем бере гуртоос, нылпи площадка пуктыны курыса, вазиськизы. Мылкыдзы санэ басьтэмын вал, кылдӥз пиналъёслы шудон-бызьылон площадка. Городъёслэн кадь мудрон ӧвӧл ке но, нылпиос солы но туж шумпото.

Площадка одӥг минут но буш уг улы, отын ваньмон дырзэс ортчыто Вуж Мӧньяысь но, бускель гуртъёсысь но нылпиос: ӟечырало, великен, роликен ворттыло, бызьыло, шудо.

Площадка интыяськемын гуртлэн вашкала синпелетэз дорын — ӝужыт но зӧк пужым вӧзын. Кыдёкын ик ӧвӧл кызьпуосын, кызъёсын пичи гинэ тэль, отын вӧсяськылӥллям вашкала удмуртъёс. Гуртоос сое вакчияк Луд шуо. Тазьы ик нылпи площадказэз но нимазы, удмурт сямен ик пусъемын со федерал программаын но.

Туэ гужем вуж мӧньяос басьтӥськозы мукет кичӧлтонзэс пыӵатон борды — рос-прос радъялозы Гыронбыдтон праздниклы чаклам интызэс. Тазэ но проектсэс озьы ик удмурт сямен нимазы.

— Гыронбыдтон возьмы школалэн стадионэз вӧзын ик интыяськемын, — шуэ Вуж Мӧнья муниципал кылдытэтлэн йырыз Виктор Сергеев. — Отын Гыронбыдтон дыръя кӧжыен-сӥльын шыд пӧзьтӥськом, трос калык люкаське. Сое табере рос-прос радъяны малпаськомы. Стадион вӧзы ик пичияк сцена лэсьтыны
чакласькомы, со липет улын луоз. Гыронбыдтон дыръя концертъёс возьматыны, выпускникъёсты данъяны но 9-тӥ Майлы сӥзем ужрадъёсты ортчытыны тупалоз. Вылаз ик, гуртамы ӵем ортчыло куасэн бызьылонъя ӵошатсконъёс. Вормисе потэмъёсты та сцена вылын ӟечкыланы туж умой луоз. Со сяна, выльдомы стадионлэсь покрытизэ, пуктомы баскетболэн, волейболэн шудон интыос. Стадион котырмы копак выльдӥськоз, шуыны луоз. Туж шумпотӥськом, угось отын ваньмон дырзэ ортчытэ быдэс гурт.

«Улыны тупась город» программая ик Вуж Мӧнья поселение пырись гуртъ-ёс выльдыны быгатӥзы Быдӟым ожын быремъёслы синпелетъёссэс. Кылиз на одӥгез гинэ — Вылӥ Иж-Бобьяысез. Таиз но туэ чеберскоз.

________

Елена ТУГАШОВА

Удмурт Дунне
By Удмурт Дунне 14 июля, 2020 15:20 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<