Удмурт адмирал

Удмурт Дунне
By Удмурт Дунне 24 июля, 2020 09:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Кронштадтын улӥсь запасысь контр-адмирал, 77 аресъем Александр Викторович Спешилов 30 арзэ сётӥз зарезь флотлы. Нош вордӥськиз со Кез ёросысь удмурт гуртын.

Александр Викторович Спешилов пыриське мерлыко уже.

Александр Спешиловлэн пичи вакытэз ортчиз Кез ёросысь Кабалудын. Пичи дырысеныз А. Спешилов ёросысьтызы кужмо куасчиос радын вал. Югуртысь (Юски) школаез йылпумъяса, Ижысь механикая институтэ пыриз, инженер луыны малпа вал.

— Огпол практикае заводэ келязы, быдэс нуналъёсын станокъёс сьӧрын ужамы, — тодаз вае Александр Викторович. — Мыным, гуртын будэм пияшлы, заводын сыӵе ӧз яра, татын ужатозь, сикын кор дасяны умойгес, малпай ас поннам.

Оло, соин но егит пияш, кема малпаськытэк, учыр тупаку, военное мынӥз: 3-тӥ курсын дышетскыкуз, студентъёс пӧлысь военной училищее келяны 10 муртэз бырйизы, шудоосыз пӧлы сюриз Александр Спешилов но. Удмурт пияш Севастопольысь П. Нахимов нимо вылӥ военно-морской училищеысь курсант луиз, тодон-валан люказ ракетно-артиллерийской удысъя.

— Романтика сьӧры уйиськыса, флотэ мынӥ вал, но дисциплина, командиръёслэн чурыт кылзы, дорлэсь мӧзмон – кӧня пол пегӟыны мугъёс кылдылӥзы, — веранзэ азинтэ воргорон. — Но чидай. Али валасько, макем ӟеч профессиез бырйи. Шуисько: флотын служба — со улонысьтымы тужгес шудо вакытэ. Армия монэ кыдатӥз, дышетӥз вордӥськем музъемме гажаны, тупаса улонэз дунъяны.

Александр Викторович, училищеез йылпумъяса, Санкт-Петербургысь военно-морской академиын тодон-валан люказ. Службазэ нуиз Сьӧд но Балтийской зарезьёсын, ракетной ож тӥрлыкен ужась группалэн командирез бордысен кутскыса, луиз «Красный Крым» противолодочной корабльлэн командирез. Солэн кивалтэмез улсын военной корабльёс эскеронъёс ортчылӥзы, бӧрысь гинэ соосты Обороная министерство бордаз кутылӥз.

Военной службаысь кошкемез бере Александр Викторович Санкт-Петербургысь военно-морской академиысь одӥгеныз кафедраен кивалтӥз. Пенсие потыса, Санкт-Петербургысь водоканалысь одӥгеныз управлениен кивалтӥз. Со вакытэ солэн кичӧлтэмезъя предприятизы бордын Вулы сӥзем музей усьтэмын вал. Отын экскурсиос дыръя чылкыт вуэз утьыны но дунъяды дышето, вуэз чылкытатон амалъёсын тодмато. Музее лыктэмъёс ас синмынызы адӟыны быгато, кызьы ву калык дорозь гумыос кузя вуэ.

2003-тӥ арысен А. Спешилов мыло-кыдо пыриське общественной уже. Тэк пукыны уг быгатӥськы, аслым уж уг шедьтӥськы ке, мылкыды урод луэ, тазалыке лябӟе, калык пӧлы кыстӥськон мылкыдзэ валэктыса, вера Александр Викторович. 2003-тӥ арысен Александр Викторович быръемын «Кронштадтское морское собрание» огазеяськонлы кивалтӥсе. Отысь адямиос вордӥськем музъемез гажан мылкыд пыӵатон понна сюлмасько, кадетъёс пӧлын валэктон уж нуо.

Александр Викторовичез зарезь бордысьтыз уг лэзьы – отчы со уйвӧтъёсаз но вуылэ. Арлы быдэ воргорон чидатэк вите Военно-морской флотлэсь нуналзэ, туэ сое 26-тӥ июле пусъё. Та нуналэ Александр Викторович дуно куноос пӧлын луэ, учке военной корабльёслэсь парадзэс.

Александр Спешилов Севастопольысь училищеын курсант дыръяз кузпалъяськиз Балезино ёросысь Ида Игнатьеваен. Кузпалъёс туэ 55 ар ӵошен улэмзэс пусйизы ни, соос 2 нылъёссэс будэтӥзы, али Спешиловъёсты внукъёссы шумпотто ни.

Ангелина Снигирёва

Удмурт Дунне
By Удмурт Дунне 24 июля, 2020 09:20 Updated