Тӧро синмаськиз «Чеберайлы»

Удмурт Дунне
By Удмурт Дунне 2 июля, 2020 15:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Удмурт Кенешлэсь» кыӵе проектъёссэ дунъяз Александр Бречалов

Кылем арняе Удмуртилэн Тӧроез Александр Бречалов «Удмурт Кенеш» огазеяськонысь азьветлӥсьёсын онлайн амалэн кенешиз. Вераськон сӥземын вал удмуртлык удысын быдэсъяськись ужрадъёслы.

Элькун кивалтӥсьёс но «Удмурт Кенешлэн» ёзчиосыз пумиськизы онлайн.
Туспуктэм: «Удмурт Кенешлэн» «ВКонтакте» бамысьтыз

Усьтӥськозы гимназия классъёс

Нырысь интыын — дышетон. Берлоез ӧтчам дырысен кӧ­ня ке ар ӵоже вераськон мы­нӥз Глазовын но Можгалан удмурт гимназиос усьтон сярысь. Но малпанэз улонэ пыӵатыны кутскем бере пӧр­тэм шуг-секытъёс кыл­дӥ­зы, тужгес но — калыкен, анай-атайёсын ужан ласянь. Туннэ вераны луэ ни кӧ­ня ке классъёс сярысь — туэ 1-тӥ сентябре Глазовын усьтӥськыны кулэ удмурт кылэз ды­ше­тӥсь 2 класс, Можгалан — 4.

Трос саклык висъяське К. Герд нимо гимназилы — уксё висъямын юртлэсь липетсэ, укнооссэ вошъяны, выльдэмын актовой зал, басьтэмын выль тӥр­лык но мебель.

Калык сямо, туала шӧмо

Тӧро «кенешчиослэн» улонэ пыӵась проектъёсынызы тодматскыны мылкыд кариз. Ксения Широбокова пыр-поч мадиз нылкышно творчестволы сӥзем «Чеберай» марафон сярысь — кылем арын со утӥз Президентлэсь грантсэ, ужрадъёс ортчо ни арлэсь кема, йылпумъяськыны кулэ туэ сӥзьыл. Проектэ Удмуртиысь гинэ ӧвӧл, кунгож сьӧрысь но чеберайёс пырисько. Та вие «Чеберай» удмуртлыклы сӥ­зем одӥгез яркытэз но паськытэз проект луэ. Проектлэн ки­вал­тӥсез Ксения Широбокова ас вакытаз, та конкурсэ пыриськыса, вормись луиз. Бӧрысь, жаляса верано, та тунсыко ужрад аналтэмын вал, но миым Ксения сое улӟытыны быгатӥз. Табере со нылкышно чеберлыкъя конкурс гинэ ӧвӧл, проект чакла туж трос пӧртэм ужрадъёс: творчестволы, лулчеберетлы, ужбергатонлы сӥзем лекциос, мастер-классъёс, ӵошатсконъёс…

Александр Владимирович презентациез туж сак учкиз но озьы ик аслэсьтыз синмаськемзэ вераз — пуштросэзлы гинэ ӧвӧл, проектлэн дизайнэзлы но.

Туспукиэм: «Удмурт Кенешлэн» «ВКонтакте» бамысьтыз

— Туала амалъёсты уже кутытэк, туннэ аслыд уд синмаськыты ни. Тӥляд ужды синмез бордаз кыске, тунсык кылдытэ, сое быдэс дуннелы возьматыны кепыр ӧвӧл, — шуиз со.

Элькун Тӧро озьы ик умоен пусйиз «Шундыкар», «Тулкым» лагерьёсты, «Куара» огазеяськонлэсь анайлыклы, нылпи будэтонлы сӥзем ужъёссэ.

Будозы тодосчиос

«Удмурт Кенеш» юн кусып возе школаосын но, вузъёсын но. Удмурт кун университетысь Удмурт кылосбуръя, финно-угроведениея но журналистикая институтэн ӵош арлы быдэ ортчытъя «Наукае нырысетӥ вамышъёсы» научно-исследовательской конференция. Отчы пыриськись данакез пиналъёс азьланяз улонзэс удмуртлыкен герӟало.

3-тӥзэ ортчиз ни Юрий Перевощиков нимо визьбур (интеллектуальной) многоборье. Юрий Семёнович — асьмелэн одӥгез яркытэз удмурт кизилимы, ӵошатскон кылдӥз солэн кичӧлтонэзлы луыса. Озьы 7-тӥ-11-тӥ классъёсын дышетскись нылпиос удмурт кылъя, экономикая но обществознаниея тодон-валанъёссэс эскеро. А. Бречалов бадӟым тунсыкен юалляськиз та визьбур ужрад сярысь, аслэсьтыз юрттэтсэ ӵектӥз.

Дано нимъёс

Асьсэлэн уженызы озьы ик тодматӥзы ёросъёсысь «кенешчиос». Кылсярысь, Глазов ёросын туж тыршо Иосиф Наговицынлэсь (Вотской автономной областьлэн облисполкомезлэн ны­рысе­тӥ председателез, бӧ­рысь — РСФСР-ысь соцобеспечениея нарком) нимзэ берыктыны, берло аръёссэ солэн нимыз вужере кыльыны ӧдъяз ни вал. Ёросын кылдӥз И. Наговицын нимо премия, удмурт азьветлӥсьлэн дышетскем школаез борды буре ваён пул юнматэмын. Туэ, Глазовысь «кенешчиос» туж сюлмаськемен, уйпал шоркарын усьтӥськозы удмурт кылэз дышетонъя гимназия классъёс. Ёросысь ёзлэн кивалтӥсез Инесса Рябова верамъя, азьланяз удмурт классъёс тросгес усьтыны мылкыдзы вань, кин тодэ, оло, быдэс гимназия пӧрмоз, умой луысал школалы И. Наговицынлэсь нимзэ сётыны.

Дэри ёросын трос сюлмасько калыксылы тодмо адямиосынызы данъяськон мылкыд пыӵатыны. 2005-тӥ арын юнматэмын Эрик Батуев нимо премия, сое сёто ёросысь удмуртлыкез утён но азинтон удысын мыло-кыдо тыршись адямиослы. Арлы быдэ ортчыло Э. Батуев лыдӟонъёс. Ӟеч кичӧлтонэз азинтыса, 2011-тӥ арын элькунысьтымы журналистъёс пӧ­лын Эрик Батуев нимо премия юнматӥз «Удмурт Кенеш» огазеяськон. Туж умой, пизэ сӥлы каремзэс адӟыса вуттӥз на солэн анаез Анна Филипповна, нош со улонысь кошкем бере ёросысь ёзэн ки­вал­тӥсь Лидия Биянова асьсэ вылэ басьтӥз Батуевъёслэсь шайгуоссэс утялтонэз — «кенешчиос» соосты ӝикыт возё, отын буре ваён нуналъёс ортчытъяло.

Дэриос озьы ик туж данъясько тодмо удмурт кылбурчиен Алла Кузнецоваен — солэн нимыз сётэмын Октябрьской гуртысь библиотекалы. Тодосчилы Людмила Христолюбовалы но ёросысь тодмо шаерчилы Дмитрий Петровлы буре ваён пулъёс усьтэмын.

Шаркан ёросысь ёзлэн кивалтӥсез, Шаркан поселенилэн йырыз Елена Перевозчикова мадиз калыкен ужамзы сярысь. Дуннеын но кунамы коронавирусэн йырин шуг югдур кылдэмен, гурт калык но туж ӝог дышиз мукетъёслэсь палэнскыса, ас корказ ватскыса сямен улыны, политикаен тунсыкъяськемысь дугдӥз, куд-огез уг но тодо, мар понна куара сётоно та нуналъёсы. Соин нимысьтыз валэктон уж нуоно луэ, асьме калыклы удмурт сямен валэктӥськом, табере валай, шуо, вера Елена Леонидовна. «Кенешчиос» ужало быръёнъёсъя комиссиын но, наблюдательын но.

«Удмурт Кенеш» огазеясь­конлэн тӧроез Татьяна Ишматова вакчияк вераз мукет ужрадъёс сярысь но. Азьветлӥсьёсмы, зэмзэ но, быгато туала улонлэн куронъёсызъя ужаны, пӧртэм конкурсъёсы пыриськыса, грантъёс утылыса, тыршо ӟеч малпанъёссэс улонэ пы­ӵа­ты­ны, калык понна пайдаё ужрадъёс ортчытъяны, шуиз со. Элькунмылы 100 ар тырмонлы сӥзем куд-ог ужрадъёс, жаляса верано, пандемиен валче ортчытэк кылё, но огъя мылкыдын улыны со уг люкеты — туала вакытэ кусып возьыны луэ, пӧртэм амалъёсты кутыса.

________

Зинаида КИРИЛЛОВА

Удмурт Дунне
By Удмурт Дунне 2 июля, 2020 15:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<