«Тулкым» но «Шундыкар». Мар вылез луоз удмурт лагерьёсын?

Удмурт Дунне
By Удмурт Дунне 6 июля, 2020 12:35
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Туэ лагерьёс июльлэсь вазь ужаны уз кутске, июнь ӵоже соос программаоссэс йылаз-пумаз вуттозы, юртъёссэс дасялозы. «Тулкым» но «Шундыкар» удмурт лагерьёслэн сменаоссы августэ ортчозы.

Туспуктӥз Максим Егоров
Кылем арын «Шундыкарын» пинал дизайнеръёс дӥсязы суредаськисьёслэсь отрядзэс. Туспуктӥз Максим Егоров

Трос нылпиос — выль удысъёс

«Тулкым» 2013-тӥ арысен трос нылпиё, ёрмыса улӥсь семьяосысь пиналъёсын ужа. «Шунды» сяна, Удмуртиысь одӥг общественной огазеяськон но уг радъя та выллем сменаосты. Гуртъёсысь пиналъёс, «Тулкыме» вуылыса, асьсэ школаязы, ёросазы азьмынӥсьёс луо.

Лагерьын творчестволы гинэ саклык уг висъяло: дышето видео лэсьтонлы, крезьгуро инструментъёсын шудонлы, эктонлы, ӟеч вожатой луыны, нырысетӥ медицинской юрттэт сётыны. Трос саклык висъяське профессиосын тодматонлы но. Пиналъёс доры пӧртэм удысъёсысь адямиос вуыло — ужбергатӥсьёс, артистъёс, министръёс… Ужзы сярысь верало, пиналъёслэн юанъёссылы валэктонъёс сёто.

— Туэ но дорамы трос куноос вуозы, — вераз Эграысь «Нефтяник» культурая юртысь методист, «Тулкым» лагерьлэн кивалтӥсез Лариса Ускова. — Кылем арын сямен ик, онлайн пумиськонъёс ортчытъяломы. Пиналъёслы со туж тунсыко. Тани Эграысь нылаш Юля Поздеева Ирландиын улэ, Дублинлэн ульчаостӥз ортчыса, видео пыр пиналъёслы пӧртэм синпелетъёсты возьматӥз. Кылсярысь, тани, пе, Ирландиысь вашкалаез библиотека, ӵапак отын Гарри Поттер сярысь кино пуктӥзы. Туэ потэ Австралиен, Финляндиен но Америкаен герӟаськеммы.

Анай-атайёс пиналъёслэн шутэтскемзы понна коньдон уг тыро, соин ик лагерез радъяны бадӟым юрттэт сёто ужбергатӥсьёс. Эграысь Татьяна Феоктистова 5-тӥ арзэ ини «Тулкымлы» блокнотъёс, ручкаос, фломастеръёс кузьма.

Та дырозь котькуд гужем лагерьын 40 пинал гинэ шутэтскылӥз, арысь аре татчы шедьыны мылкыд карисьёслэн лыдзы будэ, соин ик туэ чакламын 80 пиналэз пумитаны. Азьло смена «Ёлочка» лагерьын ортчылӥз, нош туэ со 16-тӥ-26-тӥ августэ «Дзержинецын» радъяськоз.

Усьтӥськозы выль отрядъёс: «Туризм», «Арт-удмурт», «Эко-стиль». Егит туристъёс быдэс турполоса дасялозы. «Арт-удмурт» отряд удмурт лулчеберетэз пӧртэм туала удысъёсын герӟалоз: крезьгурен, литератураен, суредэн… Туала улонлы матын луись темаос, кылсярысь, инкуазез утён, палэнэ уз кыле. «Эко-стильысь» пиналъёс басма пуйыосты пӧртэм амалъёсын чеберъяны дышетскозы, нош собере асьсэос сумка вурозы, кутсконысеныз пумозяз дизайнзэ малпалозы.

Дауръем юбилей но пандемия

Туэ улон интызэ воштоз «Шундыкар» но. Смена ортчоз 22-тӥ-31-тӥ августэ «Берёзка» лагерьын. Элькунысьтымы но мукет улосвылъёсысь 120 удмурт пиналъёс пӧртэм удысъёсын пыр-почгес тодматскозы: фольклор, крезьгур, театр, журналистика, суредаськон, литература но мукет.

Кылем арын выль отряд кылдӥз — программирование. Пиналъёсты дышетӥз андроид телефонъёсы приложениос лэсьясь Григорий Григорьев, туэ но та отряд аслэсьтыз ужзэ азьланьтоз.

— Пиналъёсын лэсьтӥмы вал «Шунды чат» ватсэт, — вераз Григорий, — отын пиналъёс ог-огенызы лагерь бере вераськылӥзы. «Шундыкар» азьын трос малпанъёсы вал, мар ярасал лэсьтыны, но лагерь куспын ваньзэ сое улонэ пыӵатыны шуггес вылэм, соин ик ваньзэ быдэстыса ӧм вуттэ. Пиналъёсын нырысьсэ ужай бере, секытгес вал, но табере валанэ кылдӥз ни. Малпасько, таяз аре телефонъёсы кыӵе ке удмурт шудон лэсьтомы.

Туэ смена юн герӟаське-мын луоз историен, Удмуртилы 100 ар тырмонэн.

«Шундыкаре» шедён понна конкурс огазеяськонлэн сайтаз, «ВКонтакте» бамаз, газетъёсын печатласькоз.

Дизайнерлэн Полина Кубисталэн тунсыко малпанъёсыз, туэ «Дӥськут дизайнысь» нылпиосын ӵапак со ужалоз.

— Мода юн герӟаськемын улонэн: политикаен, экономикаен, — вераз Полина. — Соин ик пандемия дӥськутамы но «пытьы» кельтоз: адямиос доразы пуко, висёнлэсь кышкало… Утиськыны юрттэ дӥськут. Но маскаос уг сёто адямилы вань мылкыдзэ, эмоциоссэ возьматыны, таӵе учыре дӥськут коммуникацилы но кызьы ке юрттыны кулэ. Тани вашкала удмурт дӥськутын но сӧзулъёс, пужыос адями сярысь троссэ верало, котькуд пужылэн аслаз пуштросэз. Потэ куреме пиналъёсты та сярысь малпаськыны, пусъёсын, кылъёсын дӥськут коллекция кылдытыны.

Огыр-бугыр дасяськон вите вожатойёсты но. Котькуд ар уно егитъёс лагерьын ужаны мылкыд каро, соос понна конкурс радъяське, угось «Шундыкаре» 10-эз гинэ мынэ.

Туэ ассэ вожатой сямен эскеремез потэ Лена Тыбановалэн, азьло со лагерьын «Видеоискусство» отрядын тодон-валан бичаз.

— Нырысь ик лагерь бордаз кыске аслаз пуш дуннееныз, сое пиналъёс асьсэос кылдыто, — вера Лена. — Мыным кельше пиналъёсын ужаны, соосын вераськыны. Татын тодон-валан нылпиос гинэ уг, вожатойёс но басьто. Со улонын туж кулэ луись опыт.

Мария Емельянова

Удмурт Дунне
By Удмурт Дунне 6 июля, 2020 12:35 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<