Тролль. Нина Дашевскаялэсь Норвегиысь выжыкылзэ берыктӥз Анатолий Вахрушев

Удмурт Дунне
By Удмурт Дунне 8 июля, 2020 17:29
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

— Учке, учке! Тролль! — соку ик быдэс семья машинаысь тэтчаса потӥз. Зэм но, гурезь бамын сылэ тролль — мӧзмыт тусо, пулэсь мугорыз кык адями ӝужда. Пиос пӧлысь бад­ӟы­мез туж шаплы, маймыл кадь, тролльлэн пельпум вылаз тубиз но, быгатэмзэ возьматыса, солэн бадӟым чилясь ныраз чабылӥз.

— Эн усьы! — сюлмаське мемеез.

Нош дядяез ушъя:

— Ӟечок, шаплыгес! — пумен дася фотоаппаратсэ. ­— Я-я.

— Мон но тубо, — шуиз пичиез пизы, но, анаезлэн юрттэменыз, каръяськиз тролльлэн кипыдсаз. Тролльлэн шоре учкемез небыт ӧй вал, но со вылтӥ нюжтӥськыны-ветлыны усто. Дядяйзы со вакытэ фотоаппаратсэ гинэ зӥбылэ на.
Зор шапыкъёс усьыны кутскизы но, вань семья, капюшонъёссэс золтыса, уллапала, сюрес доры, дыртӥз. Зор ведра дурын кисьтыны кутскиз. Солэсь ортчемзэ сюрес дурысь пичи сиськонниын витьыны малпазы. Нимаське но со «Тролльлэн карез». Секыт бадӟым ӝӧкъёс сьӧрын пукизы, пӧсь вафлиен но шоколадэн утялскизы.

— Тролльёс зэмен но вань-а? — ым тросаз сиёнэн юа покчиез пизы. — Тролльёс улонын но луо-а?

— Одно ик, — мукетъёсызлы кырмыштыса, вера дядяйзы.

— Бен-бен, вань! — бадӟы­мез пизы итӥське. — Соос татын уло, Норвегиын. Гурезьёсын но, выж улын но. Изъёсты сиё. Соосыз адӟыны секыт, малы ке шуоно шундылэсь кышкало, — пияш татчы лыктон азяз ма но со лыдӟем.

— Огкылын вераса, тролльёс югытлэсь ватско, калык син азе уг потало.

— Нош анайлэсь брюкизэ шоколадэн наштась пиналлы возьматскыны но быгатозы, — ватсаз мемизы.

Ваньзы серектӥзы. Но, зэмзэ вераса, пӧлазы вал серекъясьтэмез но. Угось агай-вынъёс пӧлын вал на шоретӥез. Туннэ со укыр чалмыт. Со ӧз туба тролль вылэ, лэсьтӥз изъёслэсь гурезь-пирамида (отын ог 5-6 сыӵе пирамидаос сыло вал ини). Али но вераськонэ уг пыриськы (шонерзэ вераса, аслыз ачиз ик уг кельшы кадь), чалмытак гинэ кизэ шунтэ пӧсь шоколадэн стакан борды.

— Эшшо тролльёс изэн лэзь­яськыны ярато на, — бадӟым агайзы азинтӥз.

— Малы? — покчиез паймиз.

— Угось соос лекесь! Визьтэмесь но. Йырвиымзы — кӧжы быдӟа!

— Ачид тон кӧжы быдӟа, — шуак вазиз шоретӥез пияш.

— Пети, мар тонэн туннэ сы­ӵе? — паймиз мемизы.

— Номыр но, — шуиз Петя.

— Монэн номыр ӧвӧл… мон, — ныпъетсэ кутыса, со ульчае шумприч потӥз.

— Петя! Зоре ук!

Йыр­зэ зорлэсь ватыса но изъёс выл­тӥ кроссовкиеныз гыл­ӟы­лы­са, пияш кошкиз.

— Нош ик пыдъёсыз котмозы ини, — нукыртӥз мемизы.

— Эн мерскы, — киы­ныз шон­тӥз дядяйзы. — 
Шудыку-шутэтскыку но кӧс мед луозы-а, мар-а?

Петя утыр ик берытскиз, кот­мемын ке но, мылкыдыз умой.

Ӝоген семья машинае пуксиз. Машина, тылъёссэ ӝуа­ты­са, ышиз гурезь кузя кошкись сюрес пуме.

— О-о, о-о, — Тролль куи­не­тӥ ползэ ини озьы малпаз но мычиськиз карысьтыз. — Шунды уз пишты ни, дыр, — ватскемысь потоно.

Зэмос Тролль чик уг кельшы кафе кузёлэн пулэсь лэсьтэм сульдэрезлы. Тролльлэн зэмос улонын сыӵе вольыт пу кадь куэз но ӧвӧл, пальпотонэз но, пельёсыз но сыӵе шӧтэм ӧвӧл, нырыз но вакчигес. Со быдэсак музъемлэсь кадь лэсьтэмын, ӝуйлэсь но излэсь. Огкылын вераса, гурезь сульдэр интые, золгес укша пичи из гурезь-пирамидкаослы, кудъёссэ адямиос ярато туспуктылыны. Нош кылемез…

О-о, зэм вераз Петялэн агаез. Тролльёс лекесь но визьтэмесь. Нырысь валысь озьы кадь. Но асьмелэн Тролльмы кемалась улэ ини калык пӧлын, соин ик асэстэм адямилэсь тунсыко сямзэ — котьмае тодыны тырше. Нош кинлэн тодыны тыршон сямыз вань, со копак лек но воксё визьтэм уг луы. Кылсярысь, Тролль, адямиосын машинаез, одӥг пол тэшкыльтыса но, погыртыны быгатоз. Яке, шуом, со лёгасал та адӟемпотостэм сиськонниез: ним но бен шедьтӥллям ук — «Тролльлэн карез»! Улоз, пе, со сыӵе карын. Но Тролль туж ӟеч шӧдэ но вала, та пичи макеосты со йӧтылӥз ке, адямиос ноку но уз лыктэ ни. Татын, ньыль сю ар талэсь азьло сямен ик, мӧзмыт луоз…

Тролль лулӟиз. Бен, куке адямиос нырысьсэ татчы лыктӥзы, со пинал на вал. Сыл ай, мар ватӥз ай татчы адямилэн пиез? Тролль кизэ пасе месӥз но печення возён коробка шедьтӥз. Чиньыеныз сое паньгатӥз но, музъем вылэ усизы быгылес горд из но абдрано кадь пасё корт арбери. Тролль со паймымон арбериез ымаз донгиз, куртчиз — арбери каллен пискетӥз но Тролльлэн бадӟым ӝушаз кошкиз. Тролль ӝутӥз горд изэз — йӧспӧртэм, чилясь, быжо — но из, чиньы висъёсаз ӟукыраса, нелькиськиз. Излэн пушкыз тӧдьы, зыныз тодмотэм, но ческыт. Таӵе изъёс писпуын будо кадь, но отын пичиесь, вожесь… Тролль нюлыштӥз чиньыоссэ. О-го, ческыт. Но укыр голькыт. Пумен коробказэ но усьтыны быгатӥз. Отын кылле мукет из — зэмос — но гожтэт.
«Гажано Тролль! Мон тодӥсько, тон вань шуыса. Салам. Тон дорын туж шулдыр. Вождэ эн вай юаськытэк пыраммылы. Оскисько, кузьымъёс тыныд кельшозы: ымын шудон гармошка, улмо но кыдёкысь, лымшор зарезьысь, из. Бырйы, кудӥз ярамон. Ӟеч лу. Петя»

Зор уг дугды, букваос наш­таськизы ни. Ма, бен Тролль лыдӟиськыны уг быгаты. Малпаськись тусын зынъяз гожтэтэз, собере кутӥз кыдёкысь, лымшор зарезьысь, ваем изэз — кузялэс но чильпырась. Тролль сое ымаз понӥз. Соиз отын йӧӟузыри кадь шунаны кутскиз. Тролль лулӟиз — кӧт пушказ каллен гинэ шокыштӥз ымдур гармошка. Выльысь лулӟиз, табере ини мургес — гармошка но куаразэ золгес поттӥз. Нош из номырин ӵошатонтэм ческыт потӥз. Тролль серектӥз. Ньыль сю ар ӵоже нырысьсэ.

— Мар со — гурезь куаш­ка-а? — кышкатскиз мемизы.

— Эн сюлмаськы, огшоры гудыръя гинэ, — буйгатӥз дядяйзы.

— Ма, Тролль со серекъя, — пичиез вынзы ваньзылы ва­лэк­тӥз.

Петя ас понназ малпаз: ӵемысь пичиос бадӟымъ­ёс­лэсь визьмоесьгес луо.

Эшшо со тани ма малпаз на: «Тунсыко, улмо яке из? Оло, воксё гармошка? Кудӥз меда яразгес?»

Удмурт Дунне
By Удмурт Дунне 8 июля, 2020 17:29 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<