Оскон сётӥсь юрт. Огназы кылемъёслы висъяське улон сэрег

Удмурт Дунне
By Удмурт Дунне 24 июля, 2020 13:36
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Оскон сётӥсь юрт. Огназы кылемъёслы висъяське улон сэрег

Шуге-леке сюрем мӧйыос, инвалидъёс понна шаерамы пересьёслэн юртъёссы ужало. Соос пӧлысь огез адӟем карымонэз — Кияса ёросысь Подгоройноын.

Туспуктӥз Ангелина Снигирёва
Е. Красимова комнатаезлы шумпотэ.
Туспуктӥз Ангелина Снигирёва

Шуныт липет

Шаерамы 25 пересьёслэн юртъёссы ужало, отын 532 мурт улэ. Уноез юртъёс интыяськемын гуртъёсын.

Подгорнойысь нылпи садлэсь огпалзэ 2007-тӥ арын тупатъязы но пересьёслы юрт усьтӥзы. Со 44 муртлы чакламын, отын пӧртэм ёросъёсысь 40 пересьёс асьсэлы шуныт улон сэрег шедьтӥзы.

— Татчы кутӥськом улон интытэк кылем пересьёсты, инвалидъёсты, озьы ик курисько огназы улӥсь арлыдоос, асьсэлэсь хозяйствозэс нуыны уг ни вормо ке, — вера Кияса ёросысь Калыклы улон-вылонын юрттонъя центрлэн кивалтӥсез Тамара Новосёлова. — Таӵе юртъёс мӧйыослы ӵуказе нуналлы оскон сёто, шуыны луоз, угось арлыдоос аналтэмын ӧвӧл, соос сярысь сюлмасько, чаклало, утялто. Татын соосты син азязы возё эмъясьёс, психологлы, юристлы вазиськыны луонлык вань, котьма ласянь социальной ужасьёс юрттыны дась.

Али Подгорнойысь пересьёслэн юртазы улӥсь 40 адями пӧлысь 10-эз 80 ареслэсь бадӟымгес, 16-ез — инвалидъёс. 65 процентэз татчы шедемъёс юрт усьтӥськем дырысен, 10 арлэсь кема, уло ини. Со ик возьматэ, татын соос понна сюлмасько, тазалыксэс эскерыса, возё шуыса.

Подгорнойысь юрт 2010-тӥ арын эмъяны лэзись лицензия басьтӥз, нимысьтыз кабинет усьтӥз. Нялтас вераса, мукет та выллем учреждениосын эмъяськон кабинетсы ӧвӧл, отын улӥсьёс тазалыксэс эскеро ёрос больницаын, медпунктын. Нош Подгорнойысь юртэ эмъясь нимаз тупатэм нуналъёсы вуылэ, вань кулэ луись процедураосты юртын ужась эмсузэръёс лэсьто.

Пересьёслэсь юртын улэмзы понна коньдон уг басьто, но дун тыроно луэ коммунальной услугаос, социальной ужасьёслэн тыршемзы, эмъясьёслэн ужзы понна.

Тамара Новосёлова верамъя, юртэ вуэм котькуд адямилы секыт югдурысь потыны нимысьтыз программа лэсьтӥське. Кулэ ке, со программаез азинтыны луэ. Но улон возьматэ, огдырлы вуэмъёс пересьёслэн юртазы кемалы кылё.

Туспуктӥз Ангелина Снигирёва
Кияса ёросысь Подгорнойысь пересьёслэн юртысьтызы улонэз шулдыртэ П. Никитин
Туспуктӥз Ангелина Снигирёва

Улонзы майбыр

Юртлэн азбарез чылкыт утялтэмын, котькытын сяськаос будо. Котырзэс ӝикыт возьыны дышемын асьсэос арлыдоос, юрттӥсько татын ужасьёс но. Татчы сюремъёслэн котькудӥзлэн аслаз секыт улонэз: кин ке улон интытэк кылиз, мукетызлэн пересьмыса тазалыкез лябӟиз, куинетӥез пичи дырысен инвалид. Но татчы лыктыса, ваньзы эшъёс шедьтӥзы.

Арлыдоос общежитиын сямен уло: нимаз комнатаосын, сиён пӧзьтыны кухнязы вань, фойенын небыт диванъёс пуктылэмын, ӝажыос вылын книгаос вань. Комнатаос пичиесь – валес, ӝӧк, шкаф тэрымон гинэ, но таизлы но шумпотоно ни.

82 аресъем Елена Красимова татын 7-тӥ арзэ улэ ини. Татчы Дэри черкогуртысь вуиз. Кышномурт дышетскемезъя бухгалтер-ревизор, пӧртэм интыосын ужаса вуттӥз, пенсие потӥз ёрос больницаысь, отын трос аръёс санитарка луыса тыршиз.

— Нэнэ, тятя колхозын ужазы, 13 пинал вордӥзы, мон берпуметӥез. Но улэпен кылизы 3-ез гинэ. Братэ Быдӟым ожын быриз, апае но ӧвӧл ни, — вера кышномурт.

Елена Красимова пичи дыръяз ай пыдзэ зол вӧсь кариз, но инвалид луон сярысь документъёссэ берло гинэ, пенсие потэмез бере, лэсьтӥз. Инвалид муртэз кин уже кутысал, пе.

Е. Красимовалэн Дэриын бадӟым коркаез, хозяйствоез вал. Но арлыдыз люкаськемъя ветлыны секыт луиз. Кыкез ик пиосыз улонысь кошкемын, нош

кенъёсызлы секыт ныпъет луэмез ӧз поты. Озьы социальной службаос пыр тодӥз пересьёслэн юртъёссы сярысь. Подгоройысьсэ ушъяло шуыса, татчы лыктӥз. Корказэ внукъёсызлы кельтӥз, асьсэос, пе, тодозы, мар соин карыны.

— Майбыр улӥськом, бадӟым семья кадь луимы ни, — азинтэ Е. Красимова. — Котькудмылэн быдэн комнатамы, пичи ке но, тырме. Кин быгатэ, ачиз сиён пӧра, бордамы медсестра ужа, кулэ ке, укол но пуктоз, массаж но лэсьтоз, эмъюмлы Киясае фельдшер ветлэ, мар кулэ, список гожтыса, сьӧраз келяськом. Бакчаосмы но вань, кӧня ке картошка, помидор, кубиста мерттӥськом, асьмеос убоосмес утялтӥськом. Огнамы ноку ум улӥське, бордамы уй-нуналэн чакласьёс вань. Лавкае но ветлӥськом. Пӧламы кӧня ке удмуртъёс вань, куспамы удмурт сямен вераськиськом.

Подгорнойысь Пётр Никитинэз 2015-тӥ арын инсульт шуккиз. Соин воргорон та юртэ улыны куриськиз, нылпиосыз вань ке но.

— Хозяйствое бадӟым, я соиз, я таиз куашка, нош тупатъяны кужмы ӧвӧл ни, — вера пиосмурт. — Соин коркаме Ижын улӥсь пиелы кельтӥ. Татын мыным туж кельше, татын мында гурт клубамы но ужрадъёс уг ортчыло, дыр.

Пётр Борисович та юртын 3-тӥ арзэ улэ ини. Пиосмурт 35 ар школаын математикалы визьнодаз, дышетон удысысь ветеран. Татын со ас мылкыдызъя уж шедьтӥз – ужрадъёсты ортчытъян борды басьтӥськиз. Солэн сюлмаськемезъя арлы быдэ 8-тӥ Мартэз, Пересьёслэсь нуналзэс, Выль арез шулдыр пумитало. Кылем арын Пётр Борисович 8 муртлэсь юбилейзэс радъяз, валлян арын 14 адями котырес лыдпуссэ пусйиз. Ужрадъёсты ортчытыны сценариез со быдэсак ачиз дася, ӝытэз нуись сяна, куддыръя артист но кариське.

Ангелина Снигирёва

Удмурт Дунне
By Удмурт Дунне 24 июля, 2020 13:36