Ныл утчаны малпало…

Удмурт Дунне
By Удмурт Дунне 21 июля, 2020 14:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Сыӵе семьяослы, кудъёсаз вуоно арын 1-тӥ январь бере вордскозы 3-тӥ яке со бӧрсьы нылпиос, одӥг пол сётӥськоз 240 сюрс манет.
Туспуктэм: udmdunne.ru

«Демография» нацпроект чотын бадӟым саклык висъяське трос нылпиё семьяослы. Соослы пӧртэм пумо юрттэт чакламын.

Сарапул ёросысь Мазунино гуртысь Никоноров кузпалъёс будэто 4 пиоссэс. Кыкез школае ветло ни, куинетӥез туэ 1-тӥ классэ вамыштоз. Нош ньылетӥезлы 1 но ӝыны арес — ӵапак таиныз декретын пуке Анастасия Никонорова. Со нылпи садын воспитатель луыса тыршемын, нош кузпалыз ужа мувӧй кыскон удысын. Анастасия Александровна серекъя: ныл утчаса, витетӥзэ но вайыны малпаськом на, вылаз ик, кунмы юрттэт висъя. Одӥг ласянь, аслыд кивоштӥсь будэтӥськод, мукет ласянь, демографиез ӝутӥськод.

— Та нуналъёсы вуиз 3 аресысен 7 аресозь 2 нылпиосы понна пособие. Тазэ тыро, семьяысь адямилы быдэ доход прожиточной минимумлэсь ичигес люкаське ке. Кузпалылэн уждунэз сокем пичи ӧвӧл ке но, иждивенецъёсмы кус­пын сое люкиськод ке, прожиточной минимум мында уг люкаськы, — веранзэ азьланьтэ трос нылпиё анай. — Та пособилэн быдӟалаез — туэ январьысен июнёзь котькуд толэзьлы быдэ прожиточной минимумлэн ӝыныез. Озьы 2-ез понна 60 сюрс манет пала вуиз. Ар пумозь но толэзьлы быдэ кыкезлы 10 сюрсэн вуоз на. Та пособиен мешок пызь, сакыр басьтӥмы. Со сяна, покчиез понна басьтӥсько 9 сюрс 964 манет. Шумпотӥсько: тамындаен тыриськоз толэзьлы быдэ, 3 арес тырмытозяз.

Никоноров кузпалъёс шедизы пандемия вакытэ висъяськись выплатаос улэ но. Июне но июле басьтӥзы 3 аресысен 16 аресозь пиналъёс понна одӥг пол сётӥськись пособиосты. Нялтас вераса, покчи пизы понна Никоноровъёс апрельысен июнёзь толэзьлы быдэ басьтӥзы вал ни быдэн 5 сюрсэн — таизлы угось 3 арес тырмемын ӧвӧл на.

— Покчиез вордскемын 2018-тӥ арлэн пумаз, — шуэ анай, — ӵап со арысен 1-тӥ январьысен висъяськыны кутскиз 3-тӥ яке со бӧрсьы пиналэз ваем понна пособие — семьялэн доходэз улыны тупатэм 2 минимумлэсь ичигес люкаське ке. Озьы мон декретын пукеме понна уж дурысьтым но пособие басьтӥ, элькун бюджетысь толэзьлы быдэ
9 сюрс 964 манетэн но вуылӥз. Таиз пособие тыриськоз, покчиезлы пиелы 3 арес тырмытозь. Кунлэн юрттэтэз туж иназ. Пиналъёсты вордыны ма но кулэ ӧвӧл!

Элькунысьтымы Калыкез улон-вылонын утён политикая но ужъя министерство ивортэмъя, та дырлы 9 сюрс 964 манетъем пособиез басьтӥсьёслэн лыдзы — 7 но ӝыны сюрс. Со нырысетӥ яке куинетӥ (яке со бӧрсьы) нылпизэс вордӥсьёс — ёрмись семьяос. Министр Татьяна Чуракова пусъемъя, та пособиез тыронлы висъяськиз 360 миллион манет. Кылем арын та пособие висъяськиз 6 сюрс 401 семьялы. Нош туэ ӝыны ар куспын лыдпус 1 сюрслы ятыргес луэмын ни. Озьыен, юрттэт сётон паськыта.

Никоноровъёслэн 3-тӥ пизы туэ нырысетӥ классэ мыноз. Кыӵе уксёен сое школалы дасялоз, анайлэн йырыз уг висьы: та ласянь но трос нылпиё семьяослы юрттэт висъяське.

— Коньдон чакламын школае 1-тӥ классэ мынӥсь пиналлы. Дӥськут, арбериос басьтӥськод, чекъёсты ёросысьтымы соцзащитае нуиськод — 3 сюрс 400 манет кисыям берытске. Шумпотӥсько мукетызлы но: 3-ез ик пиосы школаын дунтэк сиськозы. Угось тырме-а доходмы, уг-а — 1-тӥ мартысен лыдэ уг басьтӥськы. Валтӥсь курон — семья трос нылпиё луыны кулэ, — шуэ А. Никонорова.

Машинае 6 кузя мед тэрозы шуыса, юри бадӟымзэгес басьтӥзы. Одӥг интымы — нылмылы — кылиз ай, серекъяса шуо Никоноровъёс. Нялтас вераса, туэ арысен трос нылпиё семьяос понна транспортлы выт но 50 процентлы пичиятэмын. Со сяна, туэ 1-тӥ мартысен трос нылпиё семьялэн доходысьтыз куштӥське ипотекая тыриськонэз. Озьы доходэз ичи кыле, семья ёрмисьёс радэ шеде но кунлэсь юрттэт басьтыны быгатэ.

Калыкез улон-вылонын утён политикая но ужъя министр Т. Чуракова ивортэмъя, трос нылпиё семьяослы юрттэт сётон эшшо паськыталоз. Сыӵе семьяослы, кудъёсаз вуоно арын 1-тӥ январь бере вордскозы 3-тӥ яке со бӧрсьы нылпиос, одӥг пол сётӥськоз 240 сюрс манет. Сое кутыны луоз улон инты пуктонлы яке ипотекая нырысетӥ взносэз тырыны. Шаерамы та юрттэтэз басьтыны быгатозы
300-лэсь ятыр семьяос.

________

Елена Никитина

Удмурт Дунне
By Удмурт Дунне 21 июля, 2020 14:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<