Музъем бордысь уг ишкалско. Гуртэз ӝутыны юртто грантъёс

Удмурт Дунне
By Удмурт Дунне 14 июля, 2020 14:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Семьяен ужась но али гинэ асьсэды эскерыны кутскись фермеръёслы ӝутӥськыны Гурт удысъя но сиён-юонъя министерство 82,6 миллион манет тыр грант люкылӥз.

Алнаш ёросысь Вуж Шудьяысь егит фермер А. Петрушина.
Анастасия Петрушиналэн архивысьтыз

Грант понна вожмаськон

Туэ грант понна вожвылъяськизы пыд йылазы йыг-йыг сылӥсь, быдэс семьяен ужась 11 фермеръёс. Удалтӥз 5-езлы гинэ — таослэн проектъёссылы ог 15 миллион манет висъяськиз. Озьы ик ӵошатскизы гурт улонлэсь секытсэ но капчизэ али гинэ валаны кутскись 19 фермеръёс. Таос радысь 5 муртлы быдэн 5 миллион манетозь грант басьтыны шуд усиз. Гурт удысъя но сиён-юонъя министр Ольга Абрамова пусъемъя, бырйизы сыӵе бизнес-проектъёсты, кудъёсыз азьланяз гуртъёсты ӝутыны, ужан интыос кылдытыны, производствоез паськытатыны юрттозы.

— Арысь аре грантлы тросгес но тросгес куриськонъёс вуо. Конкурсэ но арлы быдэ кужмогес но кужмогес фермеръёс пырисько, проектъёссы но золэсь. Фермеръёслы грант бадӟым юрттэт сётэ. Хозяйствозы выльдӥське бере, гуртлэн тусыз но воштӥське. Ӵемысь фермеръёс гуртэз быронлэсь утисьёс луо, — шуэ Ольга Викторовна.

Пыӵамын вире

5 миллион манет тыр грант утэмъёс пӧлысь огез — Алнаш ёросысь Вуж Шудья гуртысь Анастасия Петрушина. Солэн бызем юртэз татын. Нош ужез ёрослэн мукет палаз — Мукшурын: татын вордӥськиз но будӥз, татын фермер хозяйство кылдытӥз. Анастасиялы 27 арес гинэ ай. Куд-ог ёзъёсыз сямен, гуртысь кошкон, секыт ужлэсь кышкан малпанэн ноку ӧз улы.

— Ижысь гурт удысъя академиын технологлы дышетскыса, городысь пегӟи: шоканы отын секыт, — вера егит фермер. — Ачим куке-соку фермер луо шуыса, ноку ӧй малпалля. Анай но ӧз, вылды. Мар со фермер луон, ми, 4 нылпиос, пичиысен ас выламы шӧдӥмы. Атаймы банкрот кылем «Большевиклэн» музъемъёсыз вылын 2009-тӥ арын фермер хозяйство ӝутыны ӧдъяз. Соку Мукшур котырын музъем но уг гыриськы ни вал. Вань фермаос качамын, выжыеныз порылэмын. Атай гид пуктӥз, ог 250 гектар музъемез кизьыны кутскиз. Сомында животэз утялтыны ваньмы юрттӥськимы. Бергатӥсь, косӥсь, лӥятӥсь атай вал. Но со 3 ар сяна ужаса ӧз вутты — кулӥз. Быдэс дунне быриз кадь соку. Али ке но паймиськомы, кызьы атайлэсь мытэм ужзэ утьыны но азинтыны ваньмы чидамы. Анайлы луыса но со. Атай весь шуэ вал: нылпиосылы мар ке но кельтэме потэ. Быдэс хозяйство кельтӥз. Сое аналтоно ӧвӧл, шуиз анай. Родняос но юрттӥськизы ни. Соку скал кыскон но, пудо сиён пыртан но — ваньмыз киын вал. Отӥяз рос-прос кариськиз ни агае. Проект гожтыса, министерстволэсь грант басьтӥз, соин быгатӥз выль гидъёс пуктыны, техника басьтыны. Пичи вынмылы но ужаны инъет кулэ, та ваньмыз солы кылёз, шуэ со. Вынмылы 10 арес гинэ ай. Сузэрмы Ижысь медакадемиын дышетске, со анаймылэсь сюрессэ бырйиз. Анаймы Мукшур гуртын фельдшер луыса ужа.

Пунэме пырыса

Анастасия Петрушина ачиз но агаез вӧзын ужаны кутскоз шуыса ӧз малпалля. Кыкетӥ образование басьтыса, Грак ёросысь «Вылнуд» хозяйствое бухгалтере кутскиз вал. Но агаез нодъяз: отын но, татын но ужаса вуттод, огнам со быдӟа хозяйствоез нуыны уг вормы, дыр вуэмын астэ фермерын эскерыны. Озьы егит нылмуртлы 20 гектар пай музъем но пу гид висъяз. Анастасия амалтэк люцерна кизьыны, ош вордыны кутскиз. Калык но оскыса пайёссэ сётыны ӧдъяз. Мукшурын угось мукет производство ӧвӧл. Нош калык пудо трос вордэ на. Йӧл вылын гуртоос уксё потто. Пайёссы понна егит фермер адямиослы турын, ю тысь висъя. Гуртын улӥсез ог 80 сяна ӧвӧл ни — колхоз бырем бере егитъёс пумен пазьгиськизы. Пинал фермеръёслы луыса гуртлэн тусыз воштӥське ни ай. Уката Алнаш черкогурт матын.

— Агае грант понна вожмаськыны ӝутъяз. Картэ но шуиз: ойдо ош вордыса утчаломы. Проект гожтод ай, нош кытысь грантлэн быдӟалаезлэсь 10 процентсэ уксё люкалод? Вань ошъёсмес, люцернамес вузамы, пунэме пыримы. Озьы мырдэм но кызьы 1 миллион 700 сюрс манет люкаськиз. Сотэк 5 миллион манет грант ӧй басьтысалмы, проектмы ӟеч ке но луысал, — шуэ Анастасия.

Министерствоысь уксё вуыны кутскиз ке, Петрушинъёс гидзэс выльдон борды басьтӥськозы. Отчы 35 ош пыртыны медо. Али котыртэмын 5 ошсы будэ. Сӥльлы ярась симментальской выжыысь пудо басьтэмзы потэ. Анастасиялэн технологлы дышетскемез но татын яралоз: сӥльлэсь сиён лэсьтон борды кутскемез потэ. Скалэз сярысь, ошез утялтыны капчигес, шуэ.

Али Анастасия пиналыныз декретын пуке. Пуктӥськон ужъёсты кузпалыз бергатэ ни.

— Коронавирусэн сэрен пудо басьтыны мылпотэмъя уг луы ай, — шуэ Анастасия Петрушина. — Асьме ёросысьсэ гинэ гидэ пыртыны яра, шуо. Таяз толэзе басьтоно ни вал. Вазь басьтэмез ӝог будэ. Тросэз скал но вордыны дэмлало. Озьы нуналлы быдэ уксё поттыны луоно. Йӧлэз кытчы келяны но шуг-секытъёс уг кылдо. Кин тодэ, оло, скал но вордыны кутскомы ай. Фермер ужлэн капчиез трос ӧвӧл. Но самой секытэз али ортчемын ни. Кин ке капчиен уксё поттыны быгатэ. Милям озьы уг луы — вань доходмы потэ асьме бордысь. Нуналлы быдэ атаймес малпасько, солэсь ужзэ азьланьтыны быгатӥськомы шуыса.

Елена Сараматова

Удмурт Дунне
By Удмурт Дунне 14 июля, 2020 14:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<