Малы таджиклы удмурт кыл?

Удмурт Дунне
By Удмурт Дунне 7 июля, 2020 10:14
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Шаерысьтымы пӧртэм калыкъёслэн огазеяськонъёссы пӧлын аслаз интыез таджикъёслэн «Ориён-Тадж» центрзылэн. Кылдытэмын со 2000-тӥ арын, ёзъёсыз усьтэмын Вотка, Сарапул, Ува ёросъёсын. Центрен кема аръёс ӵоже ни мыло-кыдо кивалтэ Мирзо Умаров.

«Ориён-Тадж» центрлэн ужаз пыриськисьёс М. Мамадалиев, М. Умаров, З. Бурибоев.
Туспуктӥз Элина Кумачёва

Национальной политикая министерствоен соку кивалтэ на вал Владимир Завалин. Мирзо Умаровлэсь со исаса юаз: шат удмурт кылэз дышетыны кужымед уг тырмы?

Мирзо Мирзоумарович вылысьтыз вылаз удмурт кылъёсты вераса сётӥз ук! Кытӥ-отӥ быдэс предложениос но кылдытӥз. Нош аръёс ортчемъя со чебергес но чебергес вераське ни удмурт кылын. Удмурт шаерын улӥськом ук, соин ик татысь калыкъёслэсь сям-йылолъёссэс, культуразэс ми гажаны кулэ, кылзэс тодэм но мултэс уз луы, шуэ.

— Удмурт шаере мон нырысьсэ 1980-тӥ аръёсы вуи, — тодаз вае таджик воргорон. — Вузаны сугон вайисько вал, берлань картошка нуисько. Картошка гуртэтӥ бичаса ветлылӥ бере, удмурт песянай-песятайёсын вераськылӥ. Соослы луыса ик нырысь удмурт кылъёсты дышетӥ: «ӟечбуресь!», «тау!». Собере туж ӵем кылӥсько вал верамзэс: «Осто, Инмаре!» Шорам вазиськылӥзы «пие» шуыса.

Совето Союз куашкам бере Мирзо Умаров Россие улыны выжоно кариськиз. Кытчы — кема ӧз малпаськы. Удмурт музъемлы со синмаськыса вуттэмын ни вал. Татын калыкез, пе, вордскем палъёсаз кадь ик: туж зӥбыт, юрттыны котьку дась. Одӥг пол но шорам кырыж учкемзэс ӧй шӧдылы, одӥг урод кыл но пумитам ӧй кылылы на, шуэ со.

Удмуртиын Мирзо Умаровлэн уно эшъёсыз кылдӥзы ни — ӟучъёс, удмуртъёс, бигеръёс… Но уг вунэты выжыоссэ но. Кызьы вера, шаерамы ог 2 сюрс 500 пала таджикъёс лыдъясько. Со пӧлысь данакез вуыло ужаны гинэ, семьяоссы кылемын Таджикистанэ. Но вань пыраклы татчы кыльыны мылкыд карисьёс но. Озьы 900-лэсь ятырез Россилэн гражданинъёсыз луизы ни. Куд-огез татын семья но кылдытӥзы. Пӧлазы вань удмурт-таджик семьяос — уло, ог-огзэс валаса.

Мирзо Умаров лыдъя: Удмурт шаер сое шуныт пумитаз, табере сюдэ-вордэ бере, та понна одно ӟечен берыктоно. Озьы «Ориён-Тадж» трос дырзэ, мылкыдзэ сётэ шуге-леке вуэмъёслы юрттонлы. Одӥг пол Дэри черкогуртысен Мирзо Умаровлэн син шораз йӧтӥз бӧрдӥсь нылкышно. Нылкышно вань сюлэмзэ усьтӥз соку: кузпалыз, пе, алимент уг тыры, пиналъёссэ маин сюдоно? Озьы таджикъёслэн огазеяськонзы та нылкышнолы оскымон эш луиз. Со сяна, Мирзо Умаров Дэри ёрос администрациысь юаз: вань на-а, пе, районын пиналъёссэс оген будэтӥсьёс? Ӧжыт ӧвӧл.

Пиналъёссэс оген будэ-
тӥсьёсын сяна, «Ориён-Тадж» эшъяське нылпи юртъёсын, школа-интернатъёсын. Кылем арын, кылсярысь, ог 40 сирота пиналэз быдэсак дасяз школае — дӥсь но басьтӥз, ручка-тетрадьёс но.

Коронавирусэн секыт югдур кылдэм бере огазеяськон нош ик мыло-кыдо басьтӥськиз шуге-леке вуэмъёслы юрттыны.

— Пӧламы ӧжыт ӧвӧл бакча емышъёсын вуз карисьёс, — пусъе Мирзо Мирзоумарович. — Соин ик картошка, ӵужкушман, кубиста но мукетсэ мешокен ик вуттӥськом. Ми ум люкиське адямиосты выжызыя, юрттӥськом ӟучъёслы но, удмуртъёслы но, мукетъ-
ёсызлы но. Ӵемгес — трос нылпиен ёрмыса улӥсь семьяослы, студентъёслы. Национальной политикая министр Лариса Буранова туж юрттӥськыны мыло-кыдо, милемыз но сьӧраз кыске. Со ик ӵемысь вера но, кинлы юрттэт кулэ шуыса.

Ӵапак озьы тупаз: ог толэзь ӵоже мусульманъёслэн Рамазанзы, кӧсутёнзы, ортчиз. Йылпумъяськиз 24-тӥ мае. Мирзо Умаров верамъя, Рамазан вакытэ соос тодазы ваё, кинэ ӝожомытыны шедьтӥзы — доразы ӧпкельыса мыно. Эшшо лыдъяське, та вакытэ ӟеч лэсьтэмзы 10 поллы тросгес ӟечен берытске. Озьы ик мед луоз.

— Удмуртия милемлы сям-йылолъёсмес утьыны луонлык сётэ. Котьку но паськыт пусйиськом Навруз, Ураза-байрам, Курбан-байрам но мукет праздникъёсты. Радъялляськом таджик кыллы сӥзем нуналъёс, концертъёс. Но ноку нимаз ум висъяськиське. Шаерын ортчись вань ужрадъёсы пыриськиськом, — шуэ Мирзо Умаров.

Удмуртиын кылдӥзы ни эшъёсыз

Мамур Мамадалиев дышетске Ижысь медициная кун академиын 3-тӥ курсын. Таджикистанысь Душанбеын вордскем но будэм пияш чик уг жаля, Удмурт шаере вуиз шуыса.

Школа бере Мамур пыриз вал Душанбеысь одӥгаз вылӥ дышетскон заведение химик-биологлы дышетскыны. Но туж ӝог валаз: эмъясьлы дышетскысал ке, трослы умойгес луысал. Визь-кенеш сётӥсьёс луизы: Россиысь вузэ пырыны луэ.

— Москваысь институт-университетъёсын дышетскон туж дуно усе, — шуэ Мамур. — Ижын кӧнялы ке дунтэмгес. Соин ик бырйи ИГМА-ез. Туж умой, общежитие комната соку ик сётӥзы шуыса. Мед-
академия но кельшиз — тодон-валан басьтыны вань луонлыкъёс кылдытэмын.

Мамур — трос нылпиё семьяысь пинал. Со сяна, вань 3 сузэръёсыз. Анаез дораз пуке. Атаез Москваын ужа пизэ дышетон вылысь. Мамур ачиз но пичи-пичи коньдон поттыны выре. Но талы дырыз туж ӧжыт, пе. Угось вазь ӵукнаысен бер ӝытозь дышетско.

— Удмуртиын одӥг тодмое но ӧй вал, — вера М. Мамадалиев. — Но дышетскыны пыреме бере ик валай: татын калык туж зӥбыт. Студентъёс пӧлын но эшъёсы соку ик кылдӥзы. Собере, медакадемиын мукет кунъ-
ёсысь лыктэм студентъёс трос вылӥллям — 100-лэсь ятыр. Таджикистанысь сяна, Узбекистанысь, Туркменистанысь, Казахстанысь, Киргизиысь, Азербайджанысь, Армениысь, Украинаысь, Молдоваысь, Палестинаысь, Ганаысь, Индиысь, Анголаысь, Йеменысь, Кот-д’Ивуарысь. Общежитиын ваньмы дэмен улӥськом.

Самоизоляция кутскем бере палэнысь студентъёс
Иже ик кылизы. Лумбытэн комнатаосазы пукизы, ульчае ӧз поталлялэ. Трос дырзы кошке дышетсконлы — дистанционной амалэ выжизы. Но соос асьсэ понна, ас сюлмаськонъёсынызы кельтэмын ӧвӧл.

— Медакадемилэн ректорез Алексей Евгеньевич Шкляев котькуд нунал юалляське дышетскеммы, улэм-вылэммы сярысь. Туж умой ужа дышетскон заведениысьтымы калык кусыпъёсъя отдел. Ӵапак со сюлмаське ваньмон дырмес радъян сярысь. Онлайн амалэн пӧртэм пумо конкурсъёс ортчизы ни. Кылсярысь, бырйизы медакадемилэн общежитиосысьтыз тужгес чылкыт комнатаосты. Конкурсэ пыриськон понна жюрилы келяно вал улон интыосысьтымы туспуктэмъёсты. Вормисьёсты пусйизы синпель кузьымъёсын.

Ӧз вунэтэ Быдӟым Вормонлы 75 ар тырмон сярысь но — «Тодэ ваёнъёс улэпесь» стенд лэсьтӥзы. Кунгож сьӧрысь студентъёс отчы асьсэ ветеранъёссы сярысь гожтӥзы. Со сяна, радъямын вал пӧртэм странаослэн вормонэз матэктыны юрттэмзылы сӥзем конференция. Кунгож сьӧрысь студентъёс озьы ик мыло-кыдо пырисько студентъёс, егит тодосчиос куспын ортчылӥсь пӧртэм онлайн-конференциосы, кужмоесь тодон-валанъёссэс возьмато.

— Дышетскон ар йылпумъяськем бере гужемлы мон Душанбее бертылӥсько, — азинтэ веранзэ М. Мамадалиев. — Отын ик практикаме но ортчисько. Туэ но озьы ик карыны малпасько. Таджикистанысь больницаосы Россиын дышетскемъёсты мыло-кыдо басьто.

Мамур вераны уг тоды на, медакадемиез йылпумъямез бере кытчы улыны-ужаны интыяськоз. Но али ик вала ни: Удмурт шаер, татын пумитам эшъёсыз пыраклы сюлэмаз кылёзы.

Элина Кумачёва

Удмурт Дунне
By Удмурт Дунне 7 июля, 2020 10:14 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<