«Лыдӟиськы, Удмуртия!» викторинае пыриськемъёс литература сярысь малпанъёссэс гожтӥзы

Удмурт Дунне
By Удмурт Дунне 21 июля, 2020 16:12
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Лыдӟиськы, Удмуртия!» викторинае пыриськемъёс литература сярысь малпанъёссэс но гожтӥзы. Кыӵе туала произведениос мылкыдзэс бугыртӥзы, сюлмазы пыраклы кылизы?

Викториналы валэктонъёсын трос гожтэтъёс вуизы.
Туспуктӥз Вера Штыкова

Алнаш ёросысь Чем-Куюк (Тыло) гуртысь Елена Смирнова.

Мон сямен, туала удмурт литературамы туж лябӟемын. «Удмуртия» издательствоын печатласькем книгаос пичи тиражен пото. Г. Красильников, М. Петров, П. Чернов, К. Ломагин кадь гожъяськисьёс ӧвӧл, шуыны луоз. В. Ар-Серги — кужмо гожъяськись, но книгаосыз калык доры вуэмын ӧвӧл. Мынам дорам бадӟым библиотекае. Лыдӟисько «Кенеш», «Инвожо», «Кизили» журналъёсты, «Ингож» приложениез. Яратӥсько Е. Миннигараевалэсь гожъяськемзэ. «69 ар ортчыса…» фэнтезиез сокем яраз, 4 книга басьтыса, 9-тӥ классын дышетскись нылпиослы кузьмай. Лыдӟизы!!! «Сьӧд сюлыкез» но тунсыко. Нош Кузьымгуртысь кенакъёсмы Пугачёвоын пуштылонъёсын герӟаськем «Сайкатэ монэ, рай вуиз ке» произведениезъя лыдӟон конференция ортчытӥзы.

Кельше Л. Малыхлэн творчествоез. Пусйысал П. Захаров, В. Ар-Серги, Ан. Перевозчиков, Л. Нянькина, Г. Романова, В. Михайлов, Р. Лаптева-Игнатьева, О. Четкарёв, С. Матвеев, В. Шибанов, Т. Чернова, Ю. Разина гожъясьёсты. Пиналъёс пӧлысь одно ик висъясал А. Шумиловаез, Дарали Лелиез.

Балезино ёросысь Балезино каргуртысь Ольга Першина.

Ар-Сергилэсь «Марӟан весь» вероссэ лыдӟи. Лыд­ӟыкум, кино учкем кадь, ваньмыз син азям яркыт пуксиз. Автор сокем быгатыса кулэ кылъёс шедьтэм. Тросгес мед луысалзы ог-огзылы Педор но Дыдык кадь «огезъя — мукетыз, кутэзъя — кабыз, картузъя — йырыз, Инмаръя — Дуннез» тупамонэсь кузпалъёс. В. Ар-Сергилэн трос ужъ­ёсыныз тодматски но таӵе малпанэ вуи: юнме шорысь Удмуртиысь калык писатель нимын данъямын но дунъ­ямын ӧвӧл со.

Р. Николаеваез (Перевощиковаез) азьло мон артист шуыса гинэ тодӥсько вал, тау викториналы, солэсь но «Сюрес дурысь пушнер»,
«Городэ ветлӥсь­киз», «Эмъясь кеч» веросъёссэ лыдӟи. Соос сыӵе матынэсь гуртын будэм адямиослы, улонысь басьтэмын, капчиен лыдӟисько. Зэм но, таланто мурт котьма ласянь адӟем карымон.

Пичи Пурга ёросысь Гожня гуртысь Раиса но Владимир Герасимовъёс.

Берло лыдӟем произведениос пӧлысь тужгес но сюлме лякиськизы С. Карповалэн «Уг поты жадеме», Л. Тихоновалэн «Тон мынам шундые» кылбур бичетъёссы, Е. Миннигараевалэн «Мумы» повестез но А. Перевозчиковлэн «Гурезе тубон» кузьмадёсэз.

Е. Миннигараевалэн «Му­мы» повестяз ӝутэм ужпум выль сямен усьтэмын кадь по­тӥз. Улон, гочатӥсь зын, яратон, оскон, кулон сярысь лирической отступлениос повестез яр­кыт, лыдӟем потымон карыны юртто. Автор возьматыны быгатэм яратӥсь ныллэсь, нуны вайись нылкышнолэсь, анайлэсь, урод кужымъёсын нюръяськисьлэсь пуш дуннезэ. «Мон утё тонэ, ведь мон кужмо, мон — кышномурт, мон — Дунне Мумы, Бадӟым Анай, кудӥзлэсь улон, яратон кылдо…», — гожтэ автор.

Нош Л. Тихонова удмурт нылкышнолы гимн кылдытэ:

Киямы ке туннэ нунымы,

Озьыен, сяськая улонмы.

Ма быдӟа тон кузё,

паймоно, —

Шӧдӥськод-а, удмурт

нылкышно?

Паймоно кадь, пӧртэм вакытэ гожтэм кылбур но повесть одӥг малпанэ, мылкыдэ вутто. Л. Тихонова «Тон мынам шундые» бичетаз
огазеям творчествоысьтыз тужгес яр­кыт кылбуръёссэ. Соос вордскем шаер, дор сярысь, кылбурчи шуныт кылъёс вера Аксакшур гуртэз сярысь, туала нылкышнолэсь пуш дуннезэ, пӧртэм мылкыдъёссэ усьтэ.

Кез ёросысь Александрово черкогуртысь Нина Лекомцева.

Алигес лыдӟи Г. Савиналэсь «Дядяй» вероссэ. Туж яраз, мур пуштросъем верос. Валялэн образэз туж кельшиз, макем яратэ вал со Миша вынзэ. Нош Миша улонысь шӧдтэк шорысь кошкиз. Ватон нуналазы зорлэн лыктэмез, гудыръямез туж умой кутэмын. «Мишалэсь ветлэм пытьызэ гылтэ ни», — малпаз кышномурт. Гурт пуме
вуыкузы ини, зор кызьы шӧдтэк шорысь кутскиз, озьы ик чутрак дугдӥз. Валя, эшшо огпол берыктӥськыса, шай пала учкиз. Табере соос ваньзы артэ: анаез, атаез но выныз…

Дэри ёросысь Юськи гуртысь Пётр Давыдов.

Берло лыдӟем произведениосы пӧлын егит гожъяськисьлэн Мария Векшиналэн «Оӵ/Ӧч кар» книгаез. Туж аспӧртэмлыко, удмурт шӧмын пачылмем гожтос — романэн, новеллаосын но веросъёсын бичет. Кӧня удмурт нимъ­ёсты пыртэ автор! Тани «Лул-сюлэм» но «Удмурт зэмлык» журналъёс, «Ваче вуон» клуб, «Уробо» завод, редактор Гондыр Захарович, Апай кылбурчи… Авторез сюлмаськытэ туала егитъёс пӧлын лыдӟиськонлэн кысэмез, Марго нимо героиня быдэс произведение пыр романзэ йылаз-пумаз вуттыны сюлмаське, литература омырен шока. Уг вала сое Донды туганэз. Роман лэчыт кылын, чылкыт но чебер гожтэмын, сое пумозяз лыдӟытэк, кӧт уг тыры. Малы ке но удмурт шӧмо произведениын удмурт нылаш тамак кыс­ке (асьме удмурт нылкышно гожъяськисьёс пӧлын тамакен эшъяськисьёс ӧвӧл кадь). Куд-ог юанъёслы валэктон ӧй шедьты ке но, та книга туала литератураын интызэ шедьтӥз, сюлэмез бугыртыны быгатӥз.

Балезино ёросысь Исаково гуртысь Татьяна Захарова.

Яратӥсько Л. Малыхлэсь, Р. Лаптевалэсь пиналъёслы гожъям произведениоссэс лыдӟыны. Туж тунсыко потӥз Б. Анфиногеновлэн кылбуръ­ёсын но поэмаосын «Айшет будущего» бичетэз. Сое мыным ачиз кузьмаз. Куд-ог кылбуръёссэ лыдӟисько но шӧдӥсько кадь, ми но озьы суро-пожо вераськиськом. Али «Кенешысь» шедьтӥ Дарали Лелилэсь «Зорнамер но Занна» романзэ, одно ик лыдӟыса быдто. Вераськон мынэ вашкала вакытэ кык сузэр-апайёслэн улон шоры учкемзы сярысь.

Балезино ёросысь Вӧё­гуртысь Надежда Корепанова.

Туала кылбурчиос пӧлысь тужгес аспӧртэмлыко гожъяське Б. Анфиногенов.
«Азькышет, духовка, пурт. Кышномурт…» кылбурез гожтэмын существительнойёсын ги­нэ. Нош син азе яркыт пуксе туа­ла семья.

В. Ар-Сергилэн «Анайлэн кырӟанэз» кылбурез туж сюлэмме бугыртӥз. Со сямен ик, мон но анаеным вераськыны шайвылаз вуылӥсько.

Л. Ганькова «Вождэ эн вайы, анае» кылбуреныз лыдӟисьсэ визьнода, анайдэс вӧсь эн карелэ, берло жаляно медад луэ шуыса. Нош Е. Макарова «Улон — одӥг» кылбураз вакчияк но туж визьмо вераны быгатэм, улонлэсь котькуд нуналзэ дунъяны быгатоно шуыса.

Туж яратыса лыдӟисько З. Рябининалэсь ужъёссэ. Со­ос мур пуштросъемесь, мал­паськытӥсесь. Алигес лыд­ӟи Л. Малыхлэсь «Вужер» но «Кышет» веросъёссэ. Кыказ ик вераське мӧйымытозязы ӵош улэм кузпалъёс сярысь. «Вужер» веросысь Иван Марьязэ ватэмез бере гинэ валаз аслэсьтыз янгышъёссэ, нош «Кышет» веросысь Такъянай картсэ ватэмез бере но Офоньзэ туж дунъя, сое жаляса, нылъёсыз доры улыны уг мыны. Малы Марья шудтэм кышномурт ке но, эшъёсыз солы вожъясько? Нош Такъянай — шудо кышномурт, но солы вожъяськисез ик ӧвӧл кадь? Юанъёс трос, валэктон шедьтыны шуг. Пӧламы ведь ӧжыт
ӧвӧл Марья кадь кышноос.

Г. Савиналэсь «Казнык» вероссэ, нимыз кылылымтэ кыл шуыса, лыдӟыны кутски но дугдыны ӧй ни быгаты. Лыдӟеме бере авторен ӵош кайгырыны кутски, Казнык апайлэсь верамъёссэ кылзэм потэ на вал, кӧня кырӟанзэ сьӧраз нуиз, гожтыса кельтыны но луысал ук.

Можга ёросысь Тылой (Малая Валожикъя) гуртысь Лилия Николаева.

Туж кельшиз Л. Ганьковалэн «Сьӧлыктэм Анна» повестез. Лыдӟи «Удмурт дунне» газетысь. Соку ик тодам лыктӥз А. Купринлэн «Суламифь» веросэз. Та кык произведениослэн маиз ке кельшисез вань — кык шудо но шудтэм кышномуртъёслэн улонзы. Авторлэн гожъяськон кылыз но туж узыр — кӧня чебер удмурт кылъёс, ӵошатонъёс — воксё синмаськи!

Кияса ёросысь Подгорной черкогуртысь Наталья Соколова.

Берпуметӥ лыдӟем произведение — У. Бадретдиновлэн «Айгуль — толэзь сяська» повестез. Туж яратӥсько лыдӟыны яратон сярысь произведениос-ты, нош таиз книга нимыныз ик бордаз кыске. Шуг-секытъёс пыр потыса гинэ, валаськод, мар со сыӵе зэмос яратон. Та книга киям шӧдтэк шорысь сюриз. УдГУ-ын ӵош дышетскем эшелэн кыӵе гинэ удмурт книгаосыз ӧвӧл. Солэсь кутыса лыдӟи вал, туж кельшиз.

Удмурт Дунне
By Удмурт Дунне 21 июля, 2020 16:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<