Кӧтӝожлы инты ӧвӧл

Удмурт Дунне
By Удмурт Дунне 9 июля, 2020 11:49

Туэ «За любовь и верность» гадьпусэн пусъемъёс пӧлын Вавож ёросысь Какмож гуртысь Алевтина но Владимир Болтачевъёс.

Вавож ёросысь Какможысь Болтачевъёс
30 арлэсь ятыр ӵош уло.

Алевтина Владимировна но Владимир Валериянович 9-тӥ классын дыръязы тодматскизы. Одӥг классэ сюризы. Нырысьсэ адӟыкуз ик, Владимир Болтачев мусо нылашлы синмаськиз, мынам луоз, шуиз. Нылмуртлэсь йырзэ ачиз пала берыктыны пӧрмытӥз. Табере семьяен улэмзылы 30 арлэсь ятыр ни.

— Какмож гуртысь кошкон сярысь ноку ӧм малпаллялэ, — шуэ Алевтина Болтачева. — Володя вань даурзэ электрик луыса леспромхозын ужаз вал ай. Предприятие быремен, нылпи садэ кариськоно луиз. Гуртын уж шедьтыны шуг.
1 сюрс 800 пала улӥсез бере, ваньмызлы инты уг тырмы. Ачим но нылпи садын ужасько. Артэ капчигес но шулдыргес.

Болтачевъёслэн задор мылкыдзылы гуртын синмасько. Соос угось быдэс семьяен я инкуазе шутэтскыны пото, я ёросын ортчылӥсь конкурсъёсы пыриськыло. Нылпиоссы пичиесь дыръя но быдэс семьяен спорт ӵошатсконъёсын вормылӥзы. Толалтэ ялан куас вылэ султылӥзы.

— Стадион корка дорын ик ке, спортэн кызьы уд эшъяськы
меда? Нылпиослы но адӟем карымон луоно ук. Мылкыдзэс но ӝутоно, чеберзэ адӟыны дышетоно. Соин Вало дуре но чорыган сямен ваньмы люкаськиськом, палаткаен ик быдэс уй-нуналлы кошкиськом, — вера Алевтина Владимировна.

Кузпалъёслэн 5 нылпизы. Куинез пиналъёссы будэмгес бере ни опекае басьтӥзы ёросысьтызы ик шуг-леке сюрем нылашез. Настялы
соку 9 арес вал ни. Сое асьсэлэсь кадь будэтӥзы. Егор, Илья но Даша дыдыез эш каризы. Семьязы уката юнмаз кадь. Собере Болтачевъёс эшшо нылпи ваёно кариськизы на. Пичиезлы, Игнатлы, али 9 арес. Бадӟымъёсыз гуртысьтызы потэмын ни, ужало но дышетско. Но шутэтскон нуналлы быдэ сямен бертыны тыршо: анай-атай вӧзын ик сюлэм буйга, шуо. Соос вынзылы адӟем карымон луо, визьмынызы но ужаны быгатэменызы паймытъ­яло.

— Ми ваньмы туж яра­тӥськомы кырӟаны. Картэ но, нылпиосы но ваньзы сямен шудо гитараен, арганэн но синтезаторен. Володя ас вакытаз гуртысьтымы ансамбле ветлӥз, но со быриз. Табере дорамы милям асьмелэн ансамбльмы. Ваньмы люкаськиськом ке, ужлэсь вис кылдыку, инструментъёсмес поттӥськомы. Мылкыдлы усьыны сётоно ӧвӧл. Телевизор азьын гинэ пукид ке, нылпиос мае тодазы ваёзы? Гужемлы быдэ кытчы ке но потаськомы — со семьяез юнгес каре. Сыӵе дыръя керетонлы, кӧтӝожъёслы инты уг кыльы ни, — шуэ Алевтина Владимировна.

Болтачевъёслэн юртъер котырзы бадӟым. Пудо вордо, сад, бакча возё. Ваньмон дыръяз Алевтина Владимировна дышем сяменыз кияз вуриськон кутэ. 50 арескам суредаськыны кутски, шуэ. Нош Владимир Валериянович пу вандылэ, пужыятэ — киыз котьмалы мынэ. Ог-огзэс валаса уло.

Азьвыл медаль сёто вал, Иже вань данъяно семья-осты люкаса. Туэ коронавирус вӧлмемен, кузпалъёсты доразы сӥлы карозы.

________

Елена Сараматова

Удмурт Дунне
By Удмурт Дунне 9 июля, 2020 11:49
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<