Кытчы выже кыл?

Удмурт Дунне
By Удмурт Дунне 2 июля, 2020 14:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
Нациосын ужан политикая министерствоын эскеризы анай кылэз дышетонъя ужпумъёсты.
Туспуктэм: Нациосын ужан политикая министерстволэн сайтысьтыз

Нациосын ужан политикая министерство берло коллегизэ сӥзиз Удмуртиысь кылъёсты дышетон удысэз азинтон сярысь вераськонлы.

Ар интые — дас

Министр Лариса Буранова, кенешонэз мытыса, шуиз:

— Удмурт кылэз азинтон берло аръёсы, мон учкемъя, шонер сюрестӥ мынэ. Со туала луэмзэ возьматэ, кылсярысь, туннэ этнодизайн туж вӧлмемын, удмурт шӧм но кыл кутӥськыны кутскизы вуз каронын, ужбергатонын.

Сюлэмшугъёс сярысь верано ке, министр соосты ньыльлы люке:

  • Наука. Кыл уг быгаты азинскыны научной инъеттэк. Соин нуиське кыллюкамъёс (словарьёс), удмурт кыллы электронной корпус лэсьтонъя уж. Туннэ нуналлы выльысь улӟытэмын шонер гожъяськонъя (термино-орфографической) комиссия.
  • Дышетон. Бадӟымгес саклык висъяно анай кылэз школаын дышетонлы.
  • Нылпиосты визьнодан. Нылпиосын вордскем дырысенызы анай кылынызы вераськоно, семьяын удмурт кыл чузъяськиз ке, пинал, сое тодытэк, нокызьы но уз буды.
  • Ивор вӧлмытон. Кыл СМИ-ос, Интернет, книгаос пыр вӧлмыны, вераськонын
    ӵемгес кутӥськыны кулэ.

Коллегиын трос тунсыко ивортонъёс чузъяськизы. Кылсярысь, Йӧскалык ужъёсъя федерал агентствоысь управлениен кивалтӥсь Тимур Цыбиков мадиз кылем арын кылдытэм Анай кылъёсты утёнъя но дышетонъя фонд сярысь. Со юрттыны кулэ учебникъёс, кыллюкамъёс поттыны, кылчиосты дасяны.

2019-тӥ ар ЮНЕСКО-ен ялэмын вал выжы калыкъёслэн кылъёссылэн аренызы. Нош ООН-лэн калыккуспо ассамблеяез выжы калыкъёслэн кылъёссылы сӥзе 10 ар — 2022-тӥысен 2032-тӥозь.

Родной — кыкез

Йӧскалык кун политикая стратегилэн лыдпусъёсызъя 2018-тӥ арын кунамы кутӥське вылэм 277 кыл, но дышетӥське 105-ез гинэ. История наукаосъя кандидат, социолог Владимир Воронцов трос аръёс ӵоже эскере ни элькунысьтымы кылъёслэсь улонын кутӥськемзэс.

2002-тӥ арын удмуртъёс пӧлысь асьсэ кылынызы верасько вылэм 72 процентэз, 2010-тӥ арын — 65-ез. Нош пиналъёс, егитъёс пӧлысь тодо 37 процентэз гинэ. Нош мар возьматоз туэ ортчоно перепись? Угось 10 ар ӵоже шаерысьтымы удмурт кылэз дышетӥсь школаос 2 поллы кулэсмизы! Со дыре ик юалляськонъёс возьмато: 73 процентэз гинэ удмуртъёс лыдъяло, школаын анай кылзэс одно дышетоно шуыса. Ӟучъёс пӧлын удмурт кыллы дурбасьтӥсьёс 37 процент, бигеръёс пӧлын — ӝыныез пала.

Мар кароно? Социолог Владимир Воронцов лыдъя, кужмоятоно кыл политикая законлэсь улонэ пыӵамзэ:

  • • кылдытъяно кылэз дышетонъя выль методикаос, учебникъёс, пособиос, кыллюкамъёс;
  • • выжоно «цифрае»: удмурт кылэз паськытгес вӧлмытоно Интернетын, телевидениын;
  • • усьтоно удмурт кылэз дышетӥсь азинлыко нылпи садъёс, гимназиос (Ижын гинэ ӧвӧл, мукет городъ-
    ёсын, ёросъёсын но);
  • • лыдъян-гожъян (перепись) дыръя калыклы луонлык сётоно 2 полэс национальностьсэ (анайя но атайя) пусйыны, 2 кылэз анай кылын лыдъяны.

Коньдон тросгес, но дышетӥсез ӧжытгес…

Дышетонъя но наукая министр Светлана Болотникова вераз анай кылъёсты дышетонъя огъя югдур сярысь. 2019-тӥ-2020-тӥ дышетскон аре шаерамы удмурт кылэз предметэз сямен дышетӥзы 191 школаын (17 сюрс 495 пинал). Ар солэсь азьло гинэ дышето вал 200 школаын. Министр мугъёссэ пыр-поч ӧз вера, но валамон ук, анай-атайёс азе кыӵе кылэз родноез сямен дышетыны быръён сётэм бере куд-огез палэнскизы удмурт кыллэсь, малы ке шуоно ЕГЭ сётоно ӟуч кылъя. Али выльысен вераськон мынэ ни, 2 кылэз родноен лыдъяны луонлык сётоно шуыса.

Элькунысьтымы дышетон сярысь кун программая туэ 10,5 миллион манет висъямын удмурт кылъя но литературая учебникъёсты федерал перечене пыртыны. Нялтас вераса, 1-тӥ-4-тӥ классъёслы учебникъёс перечене пыртэмын ни, али экспертиза ортчо 5-тӥ-9-тӥ, 10-тӥ-11-тӥ классъёслы учебникъёс.

«Цифралы» бадӟым оскон

2019-тӥ арын кылдӥз удмурт кыллэн электрон корпусэз. Мар со сыӵе? Удмурт кылын вань текстъёс одӥг азе люкасько, соосты шедьтыны луэ поисковой механизм пыр. Со сярысь вераз Историяя, кылъя но литературая Удмурт институтлэн кивалтӥсез, история наукаосъя кандидат Игорь Поздеев. Таӵе корпуслы луыса капчиялоз кылтодосын эскерон уж но словарьёс кылдытон. Туннэ нуналлы вераськон мынэ ни удмурт кылын верамез валась синтезатор кылдытон сярысь. Солэн «лысьӧмез» лэсьтэмын ни, кылиз на искусственной интеллектэз материалэн тырмытыны.

Со борды ватсаськиз эшшо одӥг шумпотымон ивор. Дышетон удысысь йӧскалык ужпумъёсты эскеронъя институтлэн кивалтӥсез Надежда Ураськина вераз, та вие лэсьтӥське удмурт кыллы но литературалы дышетонъя нимысьтыз портал. Отчы пырозы учебно-методической материалъёс, кыллюкамъёс, конкурсъёс, олимпиадаос сярысь ивор, документъёс но трос мукетыз.

Портал усьтӥськыны кулэ 2021-тӥ арын.

Егитъёс усьто кунгожъёсты

Анай кылэз дышетонын адӟем карымон луэ К. Герд нимо гимназия. Кылэн тунсыкъяськыны, асьсэды возьматыны пиналъёслы туж юрттэ проектъёсын ужан, мадиз гимназилэн кивалтӥсез Татьяна Волкова. Школаын вань асьсэлэн проект кылдытъян офиссы. Макем тросгес тунсыко малпанъёс, ужрадъёс, сокем умойгес — котькудӥз пинал отын аслэсьтыз интызэ мед шедьтоз. Но, валамон, данакез проектъёссы герӟаськемын удмуртлыкен. Пиналъёсты, кылсярысь, туж огазеяз «Ашальчи&Герд» этноколлекция кылдытон.

Тунсыко туала проектъёсын ужало егитъёс. «Шунды» огазеяськон та дырозь туж тодмо ке вал «Шундыкар» проектэныз, берло аръёссэ калыке ӝог вӧлме «Шудком» визьбур (интеллектуальной) шудон. Отын егит визь люкъёс йырзэс тӥяло, шудон ортче удмурт кылын, куд-ог юанъёс но герӟаськемын фин-угор культураен. «Куара» ресурсной центр ар но ӝыны талэсь азьло гинэ кылдӥз ай, но та вакчи дыр ӵоже но трос лэсьтыса вуттӥз ни. Кылсярысь, дасямын ни удмурт кылын 9 научно-популярной лекция (бордазы ӟуч но англи кылъёсын субтитръёс мыно), Ижын ортчытъяны кутскизы удмурт стендапъёс (маскаръяськон ӝытъёс), егит анай-атайёс понна лэсьтӥсько «Ныло-пиё» подкастъёс…

Италиын улӥсь филолог Лариса Широбокова тодматӥз 2 кылэз дышетон удысын дуннеысь усто амалъёсын. Лариса Владимировна — филология наукаосъя кандидат, со кунгож сьӧрын улӥсьёсты дышетэ ӟуч, мадьяр кылъёслы, «Мама в Италии / Mamma in Italia» журнал поттэ, огдыре трос кыллы дышетыса, пизэ будэтэ.

— Кылъёсты дышетонын удмуртэныз но ӟученыз гинэ буйгатскыны уг яра, — лыдъя Л. Широбокова. — Инвисъёсты паськытатоно, котькуд выль кыл мукетсэ усьтыны юрттэ, тунсыкез ӝутэ, озьы куинетӥез-ньылетӥез шӧдскымон капчигес сётӥське. Трос кылэз тодон лингвистикаен гинэ герӟаськемын ӧвӧл, нырысь ик со — анай-атайлэн но котырысь адямиослэн мылкыдзы, учконзы.

________

Зинаида РЯБИНИНА

Удмурт Дунне
By Удмурт Дунне 2 июля, 2020 14:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<