Коньдон понна мыкырсконо

Ангелина Снигирева
By Ангелина Снигирева 17 июля, 2020 15:21

Туэ куазь шумпоттэ узыр емышен. Шунды шорын кисьмало узы-боры, нюр вылын вуэ ни кудымульы. Адямиос ушъясько-возьмато тыр кудыосын туспуктэмъёссэс. Кин ке бичаськыса мылкыдзэ басылатэ, нош мукетыз уксё поттэ.

Туэ гужем зуыен но борыен узыр
Фото: В. Шоркина

Клиентъёсыз воштӥськизы

— Коньдон — пыд улын, — шуэ Ижын улӥсь Виктория Шоркина. — Зэм, сое бичан понна мыкырскыны кулэ, нош куддыръя — пыдесъяськыны но.

Азьло аръёсы Вика аслыз шуыса гинэ узы-боры октӥз. Нош туэ валаз: бичаськон пайда сётэ, уката ик коньдонлы ёрмиськод ке.

— Мынам кредитъёсы трос: машина но квартира понна толэзяз 26 сюрс манет тыронэ люкаське. Ужасько ас вылам – нылпиослы крезьгуръя нимаз урокъёс сётъясько. Но пандемиен валче югдур уродмиз, гужемзэ урокъёсы ӧжытгес кылизы, нылпиос семьяосынызы ӵош шутэтскыны кошкизы. Ваньмон дыры тросгес луиз, уксёе — ӧжытгес. Мар кароно? Тодмо интыям узыяны мынӥ но пайми: ма мында емыш! Вузан понна клиентъёс утчаны кутски, — вера Виктория.

Озьы 24-тӥ июне нылкышно узыяны кутскиз. Тазьы ужамзэ ивортӥз соцсетьёс пыр, соин базарын, басьтӥсь возьмаса, со уг сылы. Викалы тодмоосыз заказъёс сётъяны кутскизы. Оглом 9 литр узы вузай, шуэ Виктория. Табере Пичи Пурга ёросысь Кечол палъёсын кисьмам узы Москвае но, Екатеринбурге но кошкиз.

— Басьтӥсьлэн кыӵе куронэз вань, сое быдэстӥсько, — шуэ Вика. — Огез кышномурт куриз тодмоез сьӧры Москвае келяны, мукетыз, сакырен сураса, лэзьыны косэ, кынтыны курисьёс но вал.

Табере Виктория борыяны шӧтаз. Бичаськыны ширтэ Дэри ёросысь Ожмос палъёсы. 70 литрлэсь трос боры вузаз ни. Городэ вуыкуз, басьтӥсьёсызлы ивортэ, соосыз Викаез азбараз возьмало ни. Озьы нуназе бичам емыш ӝытазе ӝӧк вылэ вуэ. Шаплы нылкышно котькуд басьтӥсезлы виртурын (зверобой) керттэт кузьма на, озьы возь вылысь ишкем салам адямиосты шумпоттэ.

В. Шоркина узы-боры бича

Викториялэн анаез но тамында емышлы шумпотэ, арам медаз луы шуыса, кынтэ. Со понна юромо выль морозильник басьтӥз.

— Узыяса-борыяса инкуазь чеберлы шумпотӥсько, кырӟаса бичаськисько. Огполаз, польк-полькгес узы утчаса, нюлэс дорын ик бичаськи. Котырам маке ӵаштыртэм кылӥськиз. А, сё ровно гондыр ӧвӧл, дыр, малпасько. Йырме ӝутӥ но — ӟичы шорам учке. Магазинысь витринаын кадь сяськаос пӧлын пуке, монэ чакла. Нырысь куалектӥ, собере машина доры бызи: вай малпасько тае фотое пукто, — тумошо учырзэ тодаз вае Виктория.

Возь выл емыш бырыны кутскиз ке, со кудымульы (черника) бичаны выжоз — нюр вылын лушкем кушез но вань ни.

Базар луэ пӧртэм

Кин уг эшъяськы соцсетьёсын, соос вуз каро азьвыл сямен — базарын, калыко интыосын. Ижысь Трамвай кульчоын базарын арлы быдэ емышъёсын сылэ Сюмсиысь Николай. Солэн ӝӧк выл тыр вузэз: узыез но, борыез но, кудымульыез но вань. Котькуд емышез пӧртэм посуда тыремын: узы 200, 500 граммъем пластик стаканын, 1 литръем пластик ведраын.

Воргорон быгатэ вуз карыны. Тани кудымульыез пияла банкае тыремын — со пияла пыр туж чебер адске: таза, лыз-лыз, дыльды виямон. Нош узы паньга, озьы бере, сое возьматыны кулэлыкез ӧвӧл, пластик та учыре юрттэ — нелькиськем емыш уг адӟиськы.

Россиысь Нюлэс кодексысь 11-тӥ статьялэн 1-тӥ пунктэз вера: адямиос эркын но дунтэк быгато тэле ветлыны, асьсэлы чакласа, емыш, мульы но губи бичаны.

Та Кодексысь ик 34-тӥ но 35-тӥ статьяосын пусъемын мукет югдур. Адями, нюлэскысь бичаськыса, коньдон поттэ ке, та ужбергатон лыдъяське, со понна нимысьтыз чаклам куронъёс вань.

Николай ачиз сике бичаськыны уг ветлы, солэн ужез — городэ вуттон но вузаськон. Нош октӥсько кышноез но ӵыжы-выжыосыз. Соос 4 часын ӵукна тэле мыно, нош 3-4 час ортчыса, тыро ведраосын вуо.

Кӧня емыш вуза воргорон гужем ӵоже — верамез уг поты. Но пайдаез ӧй луысал ке, со татчы арлы быдэ ӧй лыктысал.

Мукет вуз карисьлэн — Нина апайлэн — трос калык пӧлын сылэмез уг поты. Со кылем арын аслыз выль инты шедьтӥз: «Столичный» микрорайонын улӥсь егит семьяос умой басьясько. Миым сӥзьыл Нина апай нуналлы быдэ кадь татын улмо вузаз. Соку бадӟым супермаркетэ пырисьёс-потӥсьёс вуззэ ӝог басьязы.

Нина апай тодэ: басьяськисьёс тросгес луо ӝытпал. Соин супермаркет вӧзы со викториен но эмезен султӥз, ӝӧкез-пуконэз ӧвӧл, пичи ведраоссэ муз вылэ пуктоно луиз. Кышномурт дуно уг куры. Но дугдӥсез-юасез ӧвӧл. Оло, кышкало: эмезь – улмо ӧвӧл, сое пуж-пуж уд миськы.

Егитъёс возьмало, бичам емышез дорозязы, ӧс азязы ик, мед вуттозы шуыса. Кылсярысь, пинал семьяос ваньмыз сямен соцсетьёсын но мессенджеръёсын («Вайбер», «Ватсап», «Телеграм») пуко. Табере котькуд коркалэн таӵе «кенешон» интыез вань. Кылсярысь, «Столичной» микрорайонын 1 сюрс мурт огъя группаын пуке. Ӵапак таӵе интыын ик ялонъёс но сётыны луэ. Валамон, мурт адями та группае пырыны уг быгаты.

Таӵе группаын емыш вузасьёс ивор сёто ке, басьтӥсьёс ур-вар каро. Басьтӥсьёс дунэз уськытыны уг выро: кӧняен ӵектод, сомындаен басьтӥсь шеде, но дорозязы ваемез витё.

— Мынам 3 нылпие. Бакчамы ӧвӧл. Базарысь тодмотэм песянайёслэсь басьтыны кышкасько. Нош татын артэ коркаосын улӥськом. Малпасько, вузась мурт уз ӵекты сисьмем, паньгам емышсэ. Ми уго котькуд нунал лавкаын яке нылпи площадкаын ӵош учыраны быгатӥськом. Соин котырам улӥсь но емышен вуз карисьёс оскымонгес пото, — шуэ Лилия тодмое.

Емыш бичаны яратӥсь адямилы асьме шаермылэн пӧртэмлыкез туж тупа. Малы ке шуоно лымшор ёросъёсын узы-боры куасьмыны кутскиз ке, бичаськыны луэ на уйпалан. Мылкыд гинэ медло.

Алёна Ионина

Ангелина Снигирева
By Ангелина Снигирева 17 июля, 2020 15:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<