Кионгуртлэн зэмос зарниез. Христолюбов выжыослэн кӧкызы

Удмурт Дунне
By Удмурт Дунне 10 июля, 2020 16:43
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Дэри ёросысь Кионгуртын дурыныз уртчыса улон пӧзиз, «Красная горка» колхоз шаерамы одӥгез адӟем карымонэз вал. Кылем даурлэн 80-тӥ аръёсаз со неперспективной радэ сюриз. Дэри ёросын гинэ озьы 1959-тӥ-1990-тӥ аръёсы 38 гуртъёс быризы.

Кионгуртысь калык

8 семья бордысь

1890-тӥ арын ортчем переписья Кионгуртын 8 семья улэм, соос пӧлысь 4-ез ӟучъёс. 23 пиосмуртъёс (ужасьёсыз — 11) но 24 кышномуртъёс (ужасьёсыз — 16 мурт). Грамотаез тодэ вылэм 4 мурт, книгаос вань одӥг юртын гинэ – 5 экземпляр. Пудо-животтэм юртъёс ӧвӧл. Арлыдоослэн верамзыя, гуртэз кылдытӥллям 1869-тӥ арын Бураново волостьысь Пуро-Можга гуртысь потэмъёс.

1890-тӥ-1897-тӥ аръёсы Кионгуртын вылэм 1 вуко, 13 юрт. Улӥсьёсыз 98 лул: 48 воргорон, 50 нылкышно.

Гурт котыртэмын пеймыт нюлэсэн, отын трос кионъёс улӥллям. Юсь школае нуись сюрес вылэ нылпиос кионъёсты кышкатон вылысь ӝуась факелъёсын пото вылэм. Арлыдоос верало, кызьы кионъёс фермаосысь пудо-животэз кесяло, пуныосты пуро, нош одӥг пол дасо мында ыжъёсты возь вылын изъянтӥллям. Гуртлэн нимыз отысь ик потэмын.

Гуртэз палэнэтӥ ӧз ортчы Граждан ож. Кионгуртын вылэм гордъёслэн штабзы. Татын кужмо ожмаськон ортчем. Куаканюке тӧдьыосты но гордъёсты огазе ватӥллям. Али шайгу бервыл музъемен ӵошкамын… 1896-тӥ арын вордӥськем Феодор Тихонович Христолюбов тӧдьыос палан ожмаськем, чигнакузы гордъёс пала выжыны быгатэм. Бӧрысь ни, ваньмыз та шараяськем бере, сое колхоз председательысь куштӥллям но трудармие келяллям…

1930-тӥ арын Кионгуртын кылдытэмын «Красная горка» колхоз, председателе быръемын Матвей Тихонович Христолюбов (1941-тӥ арын быриз Быдӟым тыложын). Висъямын 300 гектар музъем, гыроно-кизёно бусыос – 233 гектар. 1936-тӥ арлы «Красная горка» колхозын скалъёслэн, ошъёслэн но ветылъёслэн огъя лыдзы луиз 23 йыр. Юськи сельсоветлэн протоколэзъя, 1940-тӥ арын колхозын 32 йыр валъёс лыдъяськизы. Бусые поттэмын 10 центнер пень, 32 тонна яке 115 короб кыед.

Кионгуртын туж ӟеч музъемъёс. Соин «Красная горка» колхозын кидыслы шуыса но нянь будэтӥзы. Гектарлы быдэ 30 центнерозь бусьтыр йыды, чабей, сезьы утялтылӥзы, нош кӧжы пуртэсъёссы 10 сантиметр кузьда вал. Зерноез колхозъёслы люкылӥзы, 2 этажъем складзы вылэм, 2 ю куасьтон интызы. Со сяна, будэтӥзы етӥн.

Ю шертон.

Адӟем карымон адямиос

Гуртлэн тусыз «Г» буквалы укша: тужгес кузез ульча Удмурт пал нимаськиз, отын удмуртъёс гинэ улӥзы, вакчиез – Ӟуч пал. Вань калык улӥз но ужаз огъя, шуг-секыт учыръёс соосты огазеязы гинэ. Ӝытазе егитъёс волейболэн но футболэн шудыны пото. Татын ик кырӟаны яратӥсьёс крезьгур мыто. Калык кырӟась вылэм.

1951-тӥ-1952-тӥ аръёсы гуртэ радио кыскемын. Керосин лампаез Ильичлэн лампочкаез воштӥз: котькуд хозяйствоез ез юболы гу копаны косӥзы. Контора юртын кинофильмъёс возьматъязы, асьсэлэн магазинзы ужаз.

1962-тӥ арын Кионгуртын 28 хозяйствоын 116 мурт лыдъяськиз ни: 51 воргорон но 65 нылкышно. Дышетскись нылпиос — 26, тэшкылиос 21 кузя.

1967-тӥ арын июнь толэзе ДТ-54 тракторен Кионбусыез гырыку, азьвыл Кионвуколэн бервылысьтыз, зарни манетъёсын тырмытэм 2 банкаос кыре потӥллям, огез шорияк вандӥськем но, зарни манетъёс пазьгиськиллям. Кубиста мерттыны вуэм кышномуртъёс нырысь паймиллям, ма та таӵе шуыса, собере кутскиллям ук бичаны! Мукет нуналаз, милиция коркась корка зарниез октыса ветлыку, кышномуртъёслы зарниен йырин ӧй вал, соос самогон пӧзьтон аппаратъёссэс ватыны кутскиллям. Нош зарниез каргаса ватэм вылэм вуколэн кузёез. Кин кутылэм, кема ик улӥллямтэ… Но со кыре потэм бере матысь гуртъёсысь но лопатаосын вуылӥллям на утчаськыны…

Кионгуртысь тусъёс.

Кионгуртлэн зэмос зарниез — Христолюбов выжыос. Кионгуртысь ческыт узы-борыен, дун ошмес вуэн кӧтсэ тырыса, удмурт калыклы усьтӥськиз яркыт кизили – тодосчи, этнограф Людмила Степановна Христолюбова. Михаил Сергеевич Христолюбов 40 арлэсь ятыр тыршиз «Ижсталь» предприятиын фрезеровщик луыса. Пусъемын «Знак Почёта» но Ужысь Горд Знамя орденъёсын. Сергей Иосифович Христолюбов – «За отвагу», «За взятие Кёнигсберга», 2 Горд Кизили орденъёслэн кавалерзы. Михаил Георгиевич Христолюбов механической заводын кивалтон удысын тыршиз, «За воинскую доблесть» медалез вань, луиз Удмуртиысь промышленность удысысь дано ужась. 37 ар ӵоже Ижын троллейбуслэн водителез луыса ужаз Елизавета Сергеевна Христолюбова, Россиысь Транспортъя министерстволэн 1-тӥ степенё «За безаварийную работу» гадьпусэныз пусъемын, Россиысь ужысь ветеран луэмын. Виктор Сергеевич Христолюбов – Коми Элькунысь судебно-медицинской эксперт. История – со улэп жильы выллем: бырем гурт адямиосты ог-огенызы герӟа, кужым сётэ.

Паймымон шырыт сямыныз висъяське али Юсь черкогуртысь одӥгез гажамон адямимы — Николай Николаевич Христолюбов. Вордӥськиз 1946-тӥ арын Кионгуртысь колхозникъёслэн семьяязы. Атайзы Николай Изосимович — Быдӟым тыложез пырпотэм ожгарчи, кадровой офицер, «За отвагу» медальлэн но Горд Кизили орденъёслэн кавалерзы, Воронежской фронтын взводлэн командирез но миномётной ротаысь командирлэн юрттӥсез вал, «Свобода» колхозын счетовод-бухгалтерлэсь ужзэ быдэсъяз.

Нош пиез Николай Николаевич горд дипломен пырпотӥз Орджоникидзеысь С. Киров нимо военной училищеез. Майор Н. Христолюбов Пермь улосын службазэ нуиз.

Кионгурт бусы.

Чузъяське баян куара

Война дыръя Кионгуртысь 28 юртысь фронтэ кошкизы 30 воргоронъёс. Котькуд хозяйствоысь! 13-ез гинэ берытскиз. 60 мурт вормонэз фронт мышкын дуриз, колхозын нылкышноос, мӧйы воргоронъёс но пиналъёс ужазы.

1975-тӥ арысен кутскыса, арлы быдэ 9-тӥ Мае бырем Кионгуртлэн интыяз люкаськылэ татын улэм калык. Вормон Нуналэз соос татын пусъё. Чорыг лым сиён но пыштурынэн чай юон вискын чузъясько кырӟанъёс, сюлэмез чепыльтӥсь тодэ ваёнъёс… Баянзэ кутэ котьма ужлы усточи Николай Христолюбов. Миым 9-тӥ Мае гуртлэн бервылаз ӝутӥзы памятник. Мемориал вылын зарни букваосын гожтэмын фронтэ ветлэмъёслэн но быремъёслэн нимтулъёссы.

Кионгурт быриз, но калык сюлэмысь ӧз ышы. Гурт котырысь интыос но гурезь бамалъёс туж узыр узы-борыен но эмезен, нюлэс – губиен. Кионтымет чорыганы яратӥсьёсты котыраз люка, чылкыт вуаз пыласькыса, адями кужым басьтэ. Инты нимъёс туннэ но ышемын ӧвӧл: Такасик, Кионгоп — кион уллёос люкаськылон инты, Чальӟигоп – борыен узыр инты, Казакнюлэс, Казакпруд – Граждан ож аръёсты тодэ вайытӥсь топоним, Обиньгоп – аракы пӧзьтон инты, Лаӵа – вуко бервыл…

________

Анастасия ДАВЫДОВА,

Дэри ёросысь Юськи черкогурт

Удмурт Дунне
By Удмурт Дунне 10 июля, 2020 16:43 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<