Ижысь Urban Udmurt лагере ветлӥсьёс удмурт кылэз дышето вуриськыса

Удмурт Дунне
By Удмурт Дунне 23 июля, 2020 15:31
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Удмурт калык дӥсен тодматскыса, туала дӥсь вурыны луэ вашкала «Зингер» машинаен. Таин ик выро этномодалы сӥзем Urban Udmurt лагере ветлӥсь нылашъёс.

Егит модельеръёс дэремлы эскизъёс суредало, вурисько, дӥсез пӧртэм амалъёсын чеберъяны дышетско.
Туспуктэм: «Арт-резиденцилэн» «ВКонтакте» бамысьтыз

Лагерь ортче 13-тӥ-31-тӥ пӧсьтолэзе Ижысь «Арт-резиденциын» «Ижевские каникулы» проект улсын. 12 аресысен 18 аресозь пиналъёс но егитъёс мода дуннеен тодматско, лекциосы, мастер-классъёсы пыриськыса, дизайнеръёсын пумиськылыса, киужен вырыса. Лагерьлэн кураторез Дарали Лели вера:

— «Арт-резиденциын» мода ӧрез азинтыны тыршисько — со юрттэ туала удмурт культураез трос калыклы возьматыны. Ужмы пӧрмиз ке, кыӵе ке но шоу лэсьтыны быгатом, пӧрмытэм коллекцимес Ижын ортчылӥсь ужрадъёсын возьматъялом.

Лагере удмуртъёс но, ӟучъёс но ветло. Кин ке киужен кемаласен выре ини, кин ке вуриськыны али гинэ йӧндыре. Егит модельеръёс дэремлы эскизъёс суредало, вурисько, дӥсез пӧртэм амалъёсын чеберъяны дышетско. Та дырозь соос Максим Верёвкин суредасен ӵош удмурт тусо ковёр суредазы но экосумкаос вуризы, Эгралась дизайнерен Надежда Касаткинаен ӵош басмаез «верховой набойка» амалэн чеберъязы: вӧлэм пулэз краскае веттаса, басма вылэ пужы пуктылӥзы. Галина Матвеева дизайнер мадиз, кыӵе уксётӥрлык нулло пӧртэм ёросъёсысь нылкышноос. Бӧрысь котькудӥз нылаш аслыз тупась мониста лэсьтӥз. Нылашъёс куно витьыса гинэ уг пуко — асьсэос ветло музейёсы, вуылӥзы ини Пичи Пургала — тодматскизы Татьяна Москвина дизайнерлэн студиеныз.

Мастер-классъёсы ветлэ Анастасия Головина но. Нылаш Ижысь культурая колледжез йылпумъямын. Ачиз ӟуч ке но, удмурт культураен тунсыкъяське: колледжын калык киужъёсын тодматскиз, саклык висъяз пужыятсконлы, удмурт пужыослы.

— Мон удмурт калык дӥсен дышетскыкум тодматски, тодӥсько, кытчы кыӵе пужы пуктоно. Этномодая сменаын мыным туж кельше: мылкыды пурӟиз мар ке но ас киыным лэсьтыны. Удмурт кылэз уг тодӥськы ке но, удмурт егитъёслэн «Юмок» театразы ветлӥсько. Малпасько азьланяз кылэз но дышетыны, — вера Анастасия.

Нош 6-тӥ классын дышетскись Викаез лагере мамаез вайиз, нылыз суредаськыны, киужен вырыны яратэ шуыса. Вика шуэ:

— Дэремъёс азьвыл вурисько вал мунёосылы гинэ, табере аслым но вурыны быгато ини.

Лагере ветлэмъёс дӥсьтэк уз кошке, асьсэлы дэрем вурозы. Оло, соку городын ӵемгес пумиськылоз urban udmurt – городысь удмурт.

Анастасия Шумилова

Удмурт Дунне
By Удмурт Дунне 23 июля, 2020 15:31
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<