Ижысь суредасьлэн Анна Образцовалэн «Уйвӧт» адӟытонэз усьтӥськиз

Удмурт Дунне
By Удмурт Дунне 8 июля, 2020 09:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ижысь суредасьлэн Анна Образцовалэн ужъёсыз люкамын «Уйвӧт» выставкае. Адӟытон ужалоз Ижысь Туризмъя но киужъёсъя элькун центрын июль пумозь (6+).

Удмурт мифология бадӟым инты басьтэ Анналэн творчествояз.
Туспуктӥз Чудья Жени

Анна Образцова вордскиз Дэбесын, йылпумъяз УдГУ-ысь Искусствоосъя но дизайнъя институтэз, 2017-тӥ арын финно-угроведениея но историяя магистр луиз. Егит суредась 3-тӥ арзэ ужа Туризмъя но киужъёсъя элькун центрын. Солэн кивалтэмез улсын Удмуртиысь 6-тӥ-9-тӥ классъёсын дышетскись пиналъёс Россиысь «Кадры будущего — регионам» проектын 1-тӥ инты басьтӥзы, удмурт мифологияя комиксъёслы проект дасяса.

Удмурт мифология бадӟым инты басьтэ Анналэн творчествояз. Художник верамъя, со пичиысен юн герӟаськемын удмурт культураен, угось анаез — удмурт кылъя но литературая дышетӥсь. Анаез куремъя ик нылаш, школаын дышетскыкуз ини, фин-угор мифологилы сӥзем иллюстрациос лэсьялляз.

Анналэн суредъёсыз вутто инсьӧре но зарезь пыдсы, пичи шуръёсы но сюрес вылэ, выжыкыл дуннее но анай-атай юртэ. Суредъёсаз — пӧртмаськонъёс но выжыкыл дунне, нош тӧр шорын — нылкышно. Ненег нылаш, йӧно эксэй кышномурт но Шунды мумы. Кышномурт котькинэн кыл шедьтоз — кӧшкемыт изьверен но, угось тодэ: лякыт кыл, шуныт вешам буйгато. Кышномурт тылэз, омырез, вуэз, музъемез — вань стихиосты, быдэс дуннеез огазея.

«Алиса в стране чудес» книгалы удмурт шӧмо иллюстрациос, йогаен вырись удмурт нылашъёс, удмурт Афродита… Суредась, селекционер кадь, удмурт писпу борды мукет культураосысь образъёсты-пушъетъёсты бурмытэ.

— Удмуртъёслэн суредаськон искусствозы кемалась ӧз кылды. Вашкала вакытысь суредъёс, гожтосъёс ӧвӧл кылемын. Мадёсъёс ымысь ыме асьме вакытэ вуизы, соин туж тунсыко соосты суред пыр возьматыны. Малпаськыны ӧдъяськод: нош таиз геройлэн кыӵе тусэз вал? Ӵошатӥськод мукет культураосын но. Соин но удмурт мифология суредасьлы мур колодец кадь луэ — омыръяса-омыръяса уг буша. Удмурт мифъёс художниклы эрик сёто.

Суредъёслэн нимъёссы но пӧртэм кылъёсын сётэмын: удмурт, ӟуч, англи.

— Суредъёсы ӵемысь кылдыло кыӵе ке кырӟан чур бордысь. Кылъёс йыре пыро но, малпаськонэ усиськод. Кырӟан чурысь вордскем мылкыдэз одно ик суред пыр возьматэм потэ, — валэктэ А. Образцова.

Егит художник анимациен вырыны яратэ. Выставкаын солэсь вакчи мультфильмзэ адӟыны луэ. Берло дыре нылаш цифровой амалэн ӵемгес суредаське. Кисточкаосын суредаськыку, ялан астэ суредаськод, нош цифраен озьы уг луы, вера А. Образцова.

Адӟытонын озьы ик вань А. Образцовалэн суредъёсыныз футболкаос — туала вакытэ искусство дӥсь вылэ ӝог кӧче.

Анастасия Шумилова

Удмурт Дунне
By Удмурт Дунне 8 июля, 2020 09:00