«Ижводоканал» предприятие: ижкаръёс дӥне чылкыт ву вуттэ

Удмурт Дунне
By Удмурт Дунне 24 июля, 2020 15:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Ижводоканал» выльдӥське: предприятилэн ву чылкытатонъя «Ижевск-Кама» станцияз туэ 35 миллион манет тыр оборудование пуктӥзы.

«Ижводоканалысь» цехлэн кивалтӥсез А. Трефилов: ижъёс доры чылкыт ву лыктэ.

Ижысь тросэз улӥсьёс доры ву Кам шурысь вуэ. Воткаысь водохранилищеысь кыскем ву ог 50 километръем трубаетӥ кошке. Калык доры вуэмезлэсь азьло вуэз чылкытато, пушказ реагентъёс ватсаса, отстойник пыр ортчытыса но кварцевой луо пыр сӥсъяса. Уй-нунал ӵоже «Кама-Ижевск» станциын 150 сюрс пала кубометр ву юыны дасяло.

Мар ватсаське вуэ? Вуысь векчи кырсь пырыосты огазеясь коагулянтъёс — бӧрысь соосты сӥсъяны луэ. Вуысь щёлочьсэ йылэтӥсь изваскалэсь сурет — трубаос ӝог медаз сыноме шуыса. Связанной хлор — со вуысь кышкыт микроорганизмъёсты быдтэ. Хлор вуэз алама медаз кары шуыса, сое «буйгато» аммонийлэн сульфатэныз.

Табере та ватсэтъёсты: коагулянтэз, изваскаез, аммонийлэсь сульфатсэ — вуэ автоматической системаос лэзё. Соос уг янгышало, шуэ ву басьтонъя но вуэз чылкытатонъя цехлэн начальникез Андрей Трефилов.

— Азьло реагентъёсты ужасьёсмы ватсало вал. Табере кулэ лыдпусъёсты компьютере пыртӥськом но, система ачиз ваньзэ сура-дася. Озьы янгышъёс ичигес луизы. Быдэстэм ужмылы ачим но оскисько. Кранысь бызись вуэз быректыса юисько, — вера Андрей Трефилов.

Выль оборудованиез инвестиционной программа чотын, лизинг амалэн басьтӥзы. «Ижводоканал» предприятилэн директорез Александр Пономарёв шуэ:

— Таин выльдӥськон ӧз дугды, азьланяз но автоматика пыртыны тыршом. Али предприятиын оптимизация ортче, производительностез йылэтонъя федерал программае пырыны быгатӥм.

«Ижводоканаллэсь» ужзэ эскерыны вуылӥз «ЖРП-8» управляющей компанилэн кивалтӥсез Фарит Губаев.

— Кранэз усьтыкумы, ум но малпаське, кызьы вуэз чылкытато, — шуэ Ф. Губаев. — Кезьыт вулэн дуныз Ижкарын ичи, шуыны луоз. Озьы ке но «Ижводоканал» предприятие выльдӥськыны коньдон шедьтэ, выль технологиос пыртэ. Со туж умой Ижын улӥсьёс понна.

Предприятиысь валтӥсь технолог Елена Лагутина:

— Вуэз чылкытатӥськом, нормативъёсты чакласа. Азямы эшшо бадӟымгес куронъёс пуктӥськомы: нормативъёслэсь 20-30 процентлы ӟечгес ву дасяськом, трубаос пыр ортчыса но, ву чылкыт мед луоз, калыклы изъян медаз вайы шуыса. Предприятиямы пуктэм выль система ӟеч ужа: Кам шур вулэсь аспӧртэмлыксэ, умойтэм палъёссэ чакласа, вуэз тазатэ.

Анастасия Шумилова

Удмурт Дунне
By Удмурт Дунне 24 июля, 2020 15:00