ДАРАЛИ ЛЕЛИ. Эн ю абсент, Арсений. Верос

Ангелина Снигирева
By Ангелина Снигирева 16 июля, 2020 17:01
Туспуктӥз Максим Агафонов
Дарали Лели
Туспуктӥз Максим Агафонов

Верало ай тӥлед одӥг учыр, одӥг улон сярысь… Мон пересь мурт, мыным табере оломар но зульыны яра. Нош тӥ кылзэ но пеляды понэ, пелепонъёс, хе-хе.

Арсений вал чебер, учкымон егит пиосмурт. Чебер гинэ ӧвӧл ай — котькуд ласянь усточи. Усточи ке но, мур шӧдӥсь, бордаз кыскись, дырекъясь луло… Бордаз кыскись гинэ уд шуы — бордаз думись! М-да… Мукет ласянь, лулпушсэ маке но конгыръяса улӥз. Ӧй шуысал, шекез вал, но кытӥыз-маиз буш ик вылэм, лэся… Ӧй ке луысал, мон ӧй но мадьысал! Умой ӧръя ӧз мыны пияш. Луэ улонын, ваньмыз сётэмын, эсьма, нош шумпотонлы инъет уг сюры. Арсений ачиз ик ассэ палэс шуылӥз. Туж турлы куронъёсыз сое кекатыса возизы. Уг тодӥськы, аслам сыӵе шузияськонъёсы ноку но ӧз потылэ. Йӧспӧртэм вал Арсений. Огшорыгес луыны кулэ. Хе-хе.

Озьы-а, тазьы-а, Инмар солы уно саламзэ кузьмаз. Арсений валамтэ, вылды: тыныд сётэмын ке, уже кут.

Сенялэн векчи киосыз но лулэз позыртӥсь чагыр синъёсыз нылъёсты, чечылы ёрмем мушъёсты сямен, гочатъяллязы. Омырскыны дась вал котькудӥз: векчи кускоез, чиед кукоез, пичи йыроез, начар бурдоез, лобась-поръясез, егит-пересез… Куашкам мылкыдэз ӝутыны, сюлэмез шунтыны быгатоз вылэм — шудтэмъёсыз нылъёс бордаз ӵемгес мериськылӥзы. Тазьы ик син азям пуксе: шутэтске Арсений, чарка омыръя, нош пельпум вылаз кыӵе ке мусо йыр кылле — яратыса палдэм, каньсырам. Сеня нокинэ ноку улляны ӧз дыртылы. Киыныз эмъялляз — вешалляз. Уго киыз солэн вылӥ кужымен тырмемын вал: суредаськыны пӧрмытылӥз. Инкуазь шӧдонэз пушказ зол гыбдаз ке но, дышетскемез ӧз окмы. Дышетскыны мылкыд кулэ, Арсений ассэ ӧз ёрты. Эх, ма… Огез суредэз быдтымтэ, мукетыз. Бар сьӧрысь яратоно эшсэ, сьӧд синкашо, меӵкыт синмо нылэз, кагаз вылэ ӵабъяз вал: кема учкиз-учкиз но, валантэм вожомонэн тырмыса, сутӥз-пазяз.

Бен, барын со пукылӥз ӵем. Тани та интыын ик, кытын али мон пукисько. Пушказ быгатыса киськалляз уйжомытӥсь шулдыр суретъёсты. Со ачиз но татын юртъерлэн люкетэз, тузӥ арбери кадь адскиз: бордаз пыӵазы дышем зынъёс, сямъёс. Тодӥськоды, кыӵе со (баръёсын куно луиськоды, луоз): лэйкыт крезьгур, урдэскад шокась адямиос но барменлэн ӟеч синъёсыз. Чарка пыдэс кадь чилясь синъёсыз. Дышиськод ке, таӵе макеостэк улыны секыт, о-о ведь? Шобрет улысь кадь тунсыко, аслаз катъёсызъя улӥсь дунне: ялан ас бордаз кыске. Кизер чиль-сьӧд абсент визез сутэ. Выжыкыл.

Кизер чиль-сьӧд абсент сутэ визез…

Тодӥськод-а, эше, та чур Арсенийлэн кылбураз бурдъёссэ вӧлъяз. Но кылбур вордскытэк ик кулӥз: лыдӟонлэсь ческытсэ валаса ӧз вутты. Кылбурчи ӧз кисьма. Опеть. Номырлы ярантэм! Сыӵе вал Арсений — ӝыныё-урдсо. Ачиз шуылӥз: палэс…

Кырӟа вал Арсений. Ӝӧк вылэ вуэн тырмытэм бокалъёс пуктылоз но етӥз шуккылоз ук, ныр улаз мар ке нургетыса! Крезьгуръя школазэ куштэм. Нош гитаразэ кыӵе ӟыгыръя вал, нылэз сямен — вожаса бырод!

Крезьгуран малпанъёссэ эктон согиз, лэся. Мугорзэ Шива выллем выретъяз ук! Позыръяськемез шоры учкыса, жадёнэз вунэтылӥськиз, ява.

Эктонлэсь но зол яратэ вал Арсений, ас понназ ватскыса, пияла пелляны. Татын со мастёр вал! Нокин ӧз адӟылы, кызьы со пияла пельтэ, нош пельтэмзэ адӟысалды ке, валасалды: сыӵезэ Арсений гинэ пӧрмытоз. Йӧспӧртэм адями вал.

Пияла пельтонзэ вунэтыса, угы-зундэсъёс лэсьтыны йӧндыриз. Одӥг дама туж дуноен басьтӥз солэсь «А» букваен печато зундэссэ. Со уксёен Арсений ӝыны ар юиз — коньдонзэ жильдӥз, чурыт куртчем ӧз выры.

Шива тодэ, мар но со ӧз йӧндыры!

Барын ик вань улонэз ортче вал. Бар, бар, бар… Выльысь но выльысь Сеня абсент ярдурын чорыгаса пукиз. Арня куспын, оло, котькуд нунал пыралляз: дыр берганэз шӧдыны уг луы. Одӥг пол вӧзаз ортчыт чебер нылок пуксиз: нап-горд йырсиез питырес бамыз котыр пуштырскыса ваське, синкаш бордаз мертчиськыса, азвесь угы ошиське — пичи чилясь изэн (куинетӥ син выллем). Полыс кадь кузь но шонер, ӝужыт сапегъёсы чуртнам пыдъёсыз, тодмотэм этимологиен корт агрегатъёс выллем, шорад урдӥсько. Ух, кыӵе кышномурт! Яратон пучыяськыса ӧз вутты — нылмурт Арсений мында юыны ӧз чида уго, ӵукна дораз бертӥз. Сеня ке, нокыӵе кариськытэк, ӝытозь интыяз пукиз, собере уйлы кылиз на. Ну, трос вал сыӵе нылокъёс. Соосты буйгатъян понна со басьтэ вал: вордӥськонэ — капчи шӧмо ӵуж яке горд коктейль, пуксёнэ — мартини бианко, вирнуналэ — мартини россо, покчиарняе — емышен ликёр, удмуртарняе — текила, кӧснуналэ — дунву виски, арнянуналэ — коньяк. Тае тодӥсь нылъёс нимысьтыз нуналъёсы ветлылӥзы.

Тӥледлы та выллем учыр тупаз ке, луоды тӥ, шуом, ӵап таӵе барын, но палэнын пукись пиёк-эстет вӧзады бокалэн я чаркаен матэктоз — эн оске солы!

Тросэз та улонын ваньзэ валаны тыршо: озьы каньылгес, кожало. Эн дыртэ, мусоосы. Кельтэ пичияк инты омырвӧтлы. Йырсазьды ачиз утчалоз валэктонъёс. Сое но сюдыны кулэ, ялан абсент гинэ уд юы, озьы ук? Арсенийлы но сюриз йыр висён. Таӵе вал со возьмамтэ пумиськон.

Нимыз вал Таня. Кышное но Таня вал, соин тодам кылиз… Таня пыриз возьдаськыса, бадӟым шубаен — ӧс куспы ик ӧз тэры. Калыкез тачак, ваньзы луньыр-ланьыр ветло, зырасько. Арсенийлы, конечно, одно солы юрттоно вал! Юрттыны со усточи. Кылиз-усьтӥз нылашез — нош отын бубыли.

  • Юртты мыным, — шуэ. — Бубыли луэме уг поты.
  • Кызьы юрттом? — паймиз Арсений.
  • Официантка мон. Туннэ спецобслуживание, юромо ужаны потӥ. Бубыли кадь дӥсяськыны косӥзы. Бурдъёс ошизы тани. Уг поты бубыли луэме! Шоу лэсьтэме уг пот. Мон со мон.
  • Бурддэ кылём шат? — абдраз Арсений.
  • Кызьы кылёд на? Со малпанад лопырскемын ук! Тон монэ бубыли кожад, бер ни табере.
  • Ӧй, ӧй кожа мон тонэ бубыли, нылаш кожай.
  • Я, тырмоз. Астэ эн алда.
  • Кытчы лопыр… мынӥсь-код?
  • Кош азьысьтым! Гонтэм.

Кутӥз но шуак тэргаз Сеняез. Соиз, мазэ-созэ валатэк, ӝожомиз, урмиз, отчы-татчы жӧлмаса ветлэ. Ӝытбыт Таняез чаклаз, ӧтьылӥз, юалляз:

  • Малы тон улляд монэ? Малы озьы вераськид?

Таня шораз кырмышъятэк учке:

  • Мар ке куриськоды? Юон ваём-а?
  • Эй!
  • «Эй» нимо юонмы ӧвӧл. Но мон барменлэсь юало, оло, мар ке пӧрмытоз. Яке мае ке мукетсэ быръёды? Джин, ром… Абсент ӝуатыны быгатӥськом.
  • Абсент, абсент. Чалякгес вай.

Таня Сеня доры куинь пол лыктэ. Куинь полаз ик пӧртэм буёлозэ вае: гордзэ, вожзэ, сьӧдзэ. Сеня юэ гинэ, Таня лобӟе… Сеня выльысь мар ке бӧтьыртэ — вӧлдэт улысен ини.

Ми собере гинэ тодӥм: со бубыли бурдъёс узыр юисьёсты гочатыны, соосын шудыны малпамын вал. Барлэн кузёез озьы тупатэм: вермутъёс но ликёръёс сяна, дуно тылву но ӟеч мед вузаськоз, пе. Арсений но нылашъёслы пӧртэм юонъёс мед октоз, пе, акыльтӥз ини, пе, огдышем юон расписаниеныз.

Валантэм луиз, кин кинэ алда. Сеня но эрекчи луиз. Дунтэм сур но тужгес уродос водка октыны ӧдъяз. Шузимиз адями. Ваньмыз Таняен йырин. Таня котькуд нунал ӧз ужалля, ас мылкыдызъя бырйылӥз: юромо но вакытаз уд кемды. Арсений лыктэ — Таня лобӟыса кошкемын. Мар бен, нылъёс трос, соосты сектаны луэ. Но ведь Таня ачиз секта! Сотэк ортчись уйёсы Арсений супыляк кудӟылӥз, сур но водка тыметэ зымылӥз.

  • Эмъяно та адямиез, — куалектӥз Азат Фазилевич, барлэн кузёез. — Эмъяно, ато ке воксё юэмысь дугдӥз ини!

Юыны усточи вал Арсений. Эшшо огез устолыкез быриз. Хе-хе.

Та мадёнэз пеляды поныкуды, юанды кылдӥз, дыр, зэм-а вал со Арсений, ӧй-а малпа мон та адямиез? Но ведь мон тӥлед верай ни: визьмын гинэ улыны уг яра, омырвӧтлы но инты кельтоно. Арсений кадь адямиос вань, вань та дунне вылын. Куло но выльысь вордӥсько. Толон гинэ — серем-а, ӝожмыт-а? — адӟылӥ со выллем егит пиёкез. Озьы ик бар дурын пуке, синзэ кыньыръя. Кытысь соос, сыӵе Арсенийёс? Инмар соосты, инкуазьын баланс мед луоз шуыса, оген-оген музъем вылэ келялля. Кызьы соос уло? Кытысь абсент юыны уксё шедьто? Эшшо ке кызьы сомында абсент ӟузьылэм бере улэп кылё? Тӥледлы но суредам учыр тупаз ке, луоды тӥ, шуом, ӵап таӵе барын, но етӥз пиёк, абсент гажась синпӧет, чарка бӧрсьы чарка кысказ ке — эн оске солы. Со улэп луыны уг быгаты. Со, зэм но, кулӥз ни, дыр, абсентын тямыстон градус уго.

Арсений но кемалась лобӟемын: Инмар сое берен ас эксэйлыказ басьтӥз. Мынам улонам огпол но абсент веръяме ӧвӧл. Тылвуослы оскон вань шат? Йӧл вылын пӧзьтэм пыш гинэ юисько. Соин али ке но улэп — Арсений сярысь мадиськисько. Йӧллы сяна, та дунне вылын номырлы оскыны уг луы. Нош абсент — со лобӟем муртъёслэн мӧльзы. Вот и мед лобалозы. Нош мон та пукон вылын ньыльдон ар пукисько ини, тау Арсенийлы, интызэ бушатӥз.

Суредаз ЧУДЬЯ ЖЕНИ

Ангелина Снигирева
By Ангелина Снигирева 16 июля, 2020 17:01
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<