Гур азьын: Эгра ёросысь Байвал гуртысь Эмма Лекомцева мае адӟе, ваньзэ эскере

Удмурт Дунне
By Удмурт Дунне 14 июля, 2020 10:55

Эгра ёросысь Байвалысь Э. Лекомцева нуналлы быдэ маке ческытсэ пӧра.
Эмма Лекомцевалэн архивысьтыз

Эгра ёросысь Байвал гуртысь Эмма Лекомцева котьма карыны усточи, но тужгес яратэ ческыт пӧраськыны.

Эмма Васильевна дышетскемезъя покчи классъёсты визьнодась луэ, 40 ар пала ёрос газетын корректор луыса тырше, ӵош ужась эшъёссэ ческыт пӧраськемъёсын паймытъя.

— Мужикелэн мамаезлэсь, Вера Михайловналэсь, котьмалы дыши, — шуэ Эмма Лекомцева. — Ас вакытаз со Байвал гуртысь нылпи юртын пӧраськись луыса ужаз. 25 ар ӵош улӥмы. Табере мынам пиналъёсы кемалась быдэ вуэмын, нош песянайзылэсь пӧрам сиёнъёссэ туннэ но тодазы ваё на.

Табере Эмма Васильевна ачиз но песянай ни, но мамазылэсь пӧраськон амалъёссэ уг вунэты, кылсярысь, оладилы ыльнянь лэсьтэ кузям йӧлын гинэ — дрожжитэк. Ӝыны литр йӧллы 2 курегпуз, сылал, сакыр ватса, ваньзэ пызен суралтэ, собере чечы пуньы йылын сода ватса.

Кышномурт нуналлы быдэ маке пӧра: манник, сяртчынянь, торт… Соосты ӝогак гинэ лэсьтэ. Тортлы ыльнянь шукке но табаын пыже, буй-буй ӝутскем пыжоссэ собере, 3 «табаньлы» люкыса, кремен зыра. Шунянь но ас сяменыз лэсьтэ. Валтоссэ юмал ыльняньлэсь кутэ, тӧдьы но ӟег пызен сура. Пушкесэзлы ӵужъемез (солод) быректэм вуэн суралтэ, сакыр, шу ватса, кӧня ке часлы кезьыт интые пуктылэ но пӧраське.

— Пӧраськонлы сӥзем книгаосты шедьтыны уг луы вал бере, кытысь мар лыдӟиськом, ваньзэ тетраде гожъяськомы вал. Троссэ люкай «Сельская жизнь» газетысь но календарьёсысь, — шуэ Эмма Васильевна. — Нош берло дыре Интернетын бугыръяськисько, выль рецепт шедьтӥсько ке, соку ик пӧрано кожасько. Табере огреч но кезьыт вуэн гинэ сылалтӥсько.

Лекомцевъёслэн гулбечазы толлы дасям сиёнэн 200-лэсь трос банкаоссы. Азьвыл аръёсы Эмма Васильевна солэсь но трос дася вылэм, табере — ичигес, нылпиоссы асьсэос но сылалтӥськыны усточиос, пе. Холодильникез кынтэм емышен но губиен тырмытэмын.

Тулыс турын сиыны ярато. Гуртазы гоноколыс (борщевик обыкновенный, ӧвӧл сурано Сосновскийлэн борщевикеныз) будэ. Сое кышномурт умой-умой миське но, небыт луытозяз, сылал вуын пӧзьтэ. Собере кырмыса пызьыръя но кынтыны тыре. Со вож комокъёсын собере быдэс ар ӵоже шыд пӧзьтэ яке аръянэн окрошка лэсьтэ, отчы огреч но вож сугон ватсаса. Кучкылакез (щавелез) но кынтэ. Сое нырысь ик миське, векчи юдэ но сылалэн сура. Бӧрысь соин ар ӵоже шыд пӧзьтэ.

Чиньыдэ нюлод!

Тортлы крем

Кулэ: 2 стакан йӧл, 2 пуньы пызь, 1 курегпуз, 2 пуньы сакыр.

Йӧлэз быректытоно. Нимаз тусьтые шукконо курегпузэз, сакырез но пызез. Собере сое калленэн гинэ кисьтоно пӧзись йӧлэ. Суретэз напчытозяз пӧзьтоно, ялан сураса. Дась кремен тортлы дасям «табаньёсты» зырано.

Пасё мильым

Кулэ: 1 курегпуз, 1 стакан пызь, 1 стакан кефир, ӝыны стакан пӧсь ву, ӝыны чечы пуньы сода, 1 пуньы сакыр, 4 пуньы кӧсвӧй.

Тусьтые пононо рос-прос шуккем курегпуз, пызь, кефир, сода, вӧй но сакыр, бӧрысь отчы ватсано пӧсь ву. Ваньзэ шукконо но мильым пыжоно, со пасё-пасё но туж ческыт пӧрме.

Куреген но губиен пицца

Ыльняньлы кулэ: 1 стакан ву, 450 грамм пызь, 1 пачка (10 грамм) кӧс маял, 1 пуньы сылал, 2 пуньы сакыр, 2 пуньы кӧсвӧй.

Пушкеслы кулэ: быдэн 3-4 пуньы майонез но кетчуп, 300 грамм ӵынатэм курег сӥль, 300 грамм кынтэм коньыгуби, 1-2 йыр сугон, 200 грамм моцарелла сыр.

Сӥлез векчи юдоно. Губиез но сугонэз, векчи юдыса, таба вылын пырсатоно. Ыльнянез 1 часлы кезьыт интые пуктоно. Дасям ыльняньлэсь 2 пицца пӧрмоз. Ыльнянез погыльтоно, вылзэ майонезэн но кетчупен зырано, со вылэ нырысь ик юдэм сӥль, собере губиен суретэз вӧлдоно но моцарелла сырез пыргытоно.

Удмурт Дунне
By Удмурт Дунне 14 июля, 2020 10:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<