Грант утӥзы выжыкылъёс но Калмез батыръёс

Related Articles

• Удмурт егит авторъёс пырисько «Лыдӟиськы, Ижкар!» фестивале 0 09.Сен
• Жаль ӧвӧл ӝыны миллион 0 12.Фев
• Лулчеберт удысын ар куспын ортчем ужрадъёс 0 18.Янв

Россиын ортчись «Культурной мозаика» конкурслэн Удмуртиысь люкетэзлы йылпумъянъёс лэсьтэмын. Вожвылъяськонын 33 проект вормиз, соосты улонэ пыӵатыны грантъёс висъямын луозы.

Конкурсэз радъя Тимченкоослэн фондзы, Удмуртиысь Правительство юрттэмен. «Культурной мозаика» радъяське пичи городъёсысь но гуртъёсысь культурной улонэз яркытгес, умойгес карон понна. Туэ конкурсэ вуиз 306 заявка шаермылэн вань ёросъёсысьтыз, Можга но Камбарка городъёсысь. Грантъ­ёслэн шоро-куспо быд­­ӟалазы — 250 сюрс манет. Проектъёс мытэмын луозы туэ май толэзьысен, йылпумъяськозы вуоно арын февраль толэзе.

Проектъёсын кивалтӥсьёс быгатозы тодон-валанзэс будэтыны. Ижын, Глазов ёросысь Адам гуртын, Пермьын семинаръёс ортчозы, куд-огез стажировка ортчыны быгатоз Вологда улосысь Тотьма городын но Самара улосысь Тольяттиын.

Вормисьёс пӧлын — робототехникалы сӥзем фестиваль, сӧсыр адямиослэсь улонзэс ӟечгес карыны чаклам проектъёс, крезьгуро лаборатория, адӟытонъёс но мукет. Куд-ог проектъёс удмурт кылэз но культураез утёнлы сӥземын. Кылсярысь, вормисе потӥз Пичи Пурга ёрос библиотекалэн «ВыжыКыл» проектэз. Табере Пичи Пурга черкогуртын кылдоз удмурт кылэз дышетонъя арт-студия. Пиналъёс кылэз дышетозы, анай-атайёс понна этнолекторийёс ортчозы, ёросысь школаосы но нылпи садъёсы этнодесантъёс вуылозы.

Нош Алнашысь ёрос библиотека грант утӥз «Выжыкыл песьтэр» проектсэ улонэ пыӵатыны. Алнашысь пиналъёс удмурт кылэз дышетозы, выжыкылъёсын тод­матскыса. Выжыкылъёс пыр ик творчество котыре кыс­тӥськозы. Со сяна, Алнаш ёросын ортчоз фольклорлы но киужъёслы сӥзем «Трокай» элькун фестиваль.

Вормисьёс пӧлын вань элькунмылэсь историзэ утёнлы сӥзем проектъёс но. Кылсярысь, Эгра ёросысь Кушъя муниципал кылдытэтын азинскись «Моя Кушья: 80 лет — от поколения к поколению» проект (азьвыл со «Всем миром» конкурсын вормисе потӥз) сӥземын Удмурт Лоза, Левой Кушъя, Кушъя гуртъёслэсь историзэс утёнлы. Проект улсын историлы но культуралы сӥзем экспозиция дасямын луоз, ветеранъёслы сӥзем книга печатласькоз.

Нош Сьӧлта ёросын мульт­фильмъёсты ярато. Черкогуртысь Нылпи творчествоя юртысь «СьӧлтаМультStoris» студия Калмез батыръёс сярысь мультфильм лэсьтоз. Со понна пиналъёс анай-атайёсынызы валче мунёос пӧрмытозы.

Культурая министр Владимир Соловьёв осконзэ вераз, грантъёсын пусъем проектъёс гуртъёсысь, городъёсысь улонэз ӟечгес карозы,
калыкез шумпоттозы шуыса.

________

Виктория КРАМОВА