Галина Савина. Казнык. Верос

Ангелина Снигирева
By Ангелина Снигирева 15 июля, 2020 17:41
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Галина Савина, писатель,
«Удмурт дунне» газетысь корреспондент

Отпуске потыса, одӥг арнялы гуртэ кошки. Ӟырдам но куашетӥсь городлэсь, трос калыклэсь, вӧзтӥ шуласа кадь ӝог кошкись улонлэсь шутэтскем потӥз. Гурт аслаз шыпытэныз малпаськыны луонлык сётэ, нош кеносын изён пичи дырез тодэ вайытэ. Кыӵе умой, анай, вордскем гурт, дор вань дыръя.

Ӵош дышетскем эше арня шорын жингыртӥз. Ойдо, пе, адском. Катя Казаньын эмчиын ужа, кык нуналлы гинэ гуртэ бертэм. Пумиськыны кенешим дас час котыр.

Ӵуказеяз, мар но со салам кутыса, Тупал ураме васьки. Катяос доры вуи но… капказы гозыямын. Ма, кытын таос ваньзы? Катяен кенешим кадь. Яра, туала вакытэ сотовой телефонъёс вань. Тодмо номерез бичай. Вазьыса ӧй вутты на, Катя тэчыра сямен тачыртӥз ини:

  • Галя, тон вуид-а? Возьма, нокытчы эн кошкы. Монэ семьяосы ӵукна ик узыяны нуизы, бертӥськом ни. Ог ӝыны час улыса, вуом.

Мон нош ик номыр вазьыса ӧй вутты, эше телефонзэ кысӥз.

Малпасько, бакча сульдэр сямен урам шорын сылыны умой ӧвӧл, доре берто но бӧрысь лыкто. Со куспын кин ке вазись луиз:

  • Айбат, нылы.

Йырме ӝутӥ, пумитам но лыктӥсь ӧвӧл, мышкам но нокин уг сылы. Пель сьӧрам кылӥськиз шат?

  • Чаль ай татчы, чаль, — нош ик вазизы.

Йырме берыктӥ но, кеӵевыл сылӥсь коркалэн капка азяз песяй пуке но киыныз шона, лык ай, пе, дорам.

Мынытэк умой ӧвӧл кадь. Вамыштӥ.

Урамын куамын градус пӧсь, нош та песяй балонь курткаен пуке. Йыраз сыӵе ик зӧк кышет, пыдаз ыж гон носки вылаз бигер колошаос кутчамын. Кышетэз бадӟымен, оло, песяйлэн ымнырыз мыжык быдӟа гинэ адске. Со но шунды улын кылльыса бызырмем картошка кадь куренялэс луэмын. Нош киосыз кыӵеесь? Кышномурт боды вылэ пыкъяськыса пуке. Со киосын номыр сӥльвирез ӧвӧл. Сыӵе ик куренялэс ку улын писпу выжыос кадь вирсэръёс гинэ тордылэмын. Кӧня арес меда талы? Кин со? Малпанъёсме ачиз куспетӥ кариз:

  • Кин таӵе ямсыз песяй та, шуиськод-а? Казнык апаед мон, — синзэ кыньыртыса ик, шорам учке песянай. — Тон бон кинлэн луиськод ай? Пинал калыкез тодманы уг луы ни.
  • Мосей Микворлэн нуныкаез мон, — кызьы валэктыны паймыса, ӵужатайме верай.
  • Э-э, озьы-а, Миквор умой пиосмурт вал, выжызы но ужась, асьсэос чылкытэсь. Тань верад но, тусыз пуксиз. Миквор но, Одотез но Инмар доры кошкизы ни, мон гинэ дуннеез саптаса улӥсько. Адямиос, тазалык курыса, ӵукна вӧсясько, мон мед кулом ни шуисько. Анае сизьымдон кык аресаз атай доры кошкиз — сыӵе мӧйы йӧтэ ни вал. Мыным туэ Вӧй буранъёс дыръя укмыстон укмыс тырмиз ини, весь улӥсько на. Марлы меда, ӧйтӧд…

Мон номыр ӧй куареты. Песяй огшап малпаськиз но шуэ:

  • Таре ваньмыз туала телефонэн, сотовой шуо кадь, верасько. Тынад но тӥнь кияд. Соин сопал дуннее но жингыртыны луэ-а?

Учкисько шораз: серекъя-а та яке воксё кыдыз бертэм ни-а? Уг, синъёсыз туж визьмо учко, лэчыт но со вакытэ ик ӝож. Юнме шорысь янгыше уськытэм пичи пиналлэн кадь…

Вазьыса ӧй вутты, Казнык апай йырыныз шоназ.

  • Тодӥсько, сопал дуннее гожтэт но уд гожты, уд но жингырты, отчы ивор уг вуы. Но тодӥсько мукетсэ но: соос асьмемыз адӟо, кыло, асьмеос гинэ ум шӧдӥське. Мон но Ваняме, Коля, Вася пиосме, анаез, атаез адӟысал вылэм…

Песяй нош ик шыпаз. Сое малпаськонысь поттон понна юасько:

  • Тӥледлы анайды сыӵе тунсыко ним понӥз-а?
  • О-о, солэсь сузэрзэ гуртоос ужась Казнакей шуо вылэм. Анае, мон но сыӵе чырткем медло шуыса, озьы нимам. Ассэ Минёкай шуылӥзы, сыӵе чебер вал анае… Ой, мынэсьтым улонме вераны кутскид ке, нокыӵе выжыкылэд кулэ ӧвӧл, сыӵе паймымон гумыре мынам, — шуэ Казнык апай.
  • Вералэ ук, — вӧзаз пукси мон.
  • Соку кутсконысеныз мадёно, кылзод-а? — сое кылзӥськись ваньлы шумпотӥз кадь песяй.

Мон, соглаш луэмме возьматыса, йырыным шонтӥ.

Казнык апай огшап шып пукиз, бодыеныз пыд азьысьтыз музъем вылэ аслыз валамон гинэ гожъёс лэсьтӥз: азьлозэ тодаз вайыны выриз-а яке мар бордысен кутскыны соку ик ӧз вала-а. Мон ӧй люкеты, возьмай. Шӧдӥ кадь, та арлыдо нылкышнолэн улонэз зэмзэ но аспӧртэм шуыса.


  • Пичи дырме тодам вайисько ке, со туж шудо вал 1930-тӥ арозь, — веранзэ мытӥз Казнык апай. — Мыным дас одӥг арес дыръя нырысьсэ кылӥ «кулак» кылэз. Гуртын ужаса байкем семьяосты кулаке поттазы. Милям вукомы, муш бакчамы, кеньыр изон машинамы вал, трос пудо вордӥмы, выль коркаямы кык толэз гинэ потӥм вал ай. Огнунал Казнакей ӵужапае шок-пуль шокаса вуиз: Минёкай, тӥледыз но кулак карыны медо шуыса кылӥ, пе, ыжъёстэс олле милям гидамы нуом, чечыдэс, ю-няньдэс анайёс доры ватэ… Номыр карыса ӧм вуттэ, ӝытаз ик ньыль кузя дорамы вуизы. Тужгес лекъяськиз огез, Сурон Олексей. Милемыз сельсовет, пе, юнматӥз, ми власть, комбедлэн комиссиез (комитет бедноты шуиськом, пе, асьсэдыз). Ваньбурдэс ватыны выриды ке, Сибыре келялом, шуо.

Анай монэ ӟус вылысь, китӥм кыскыса, кышнопала поттӥз, гур сьӧрын сандык сылэ вал. Отысь огзэ дэремез поттыса вылам дӥсяз, кыкетӥзэ поттӥз но ас вылаз дӥсяз, улаз уксётӥрлыксэ ватӥз… Воргоронъёс уйшор берозь утчаськизы, маке гожъязы, мертазы. Сандыкысь куэм дэраез, пыдвылъёсты-пӧзьёсты, ыж гон бугоръёсты мешоке тырыны кутскемзы бере анай ӧз ни чида, бӧрдыса черекъяз:

  • Олексей, мар даур-тӥськод, гуртоостэ качаськод ук. Тон тодӥськод, ми ноку но ӧм лушкаське, нокинэ медъяса ӧм ужатэ, малы тазьы ултӥяськод? Тол вуоз, нош тон пыдвылъёсты но поттӥськод ук.

Олексей нокыӵе ик ӧз кариськы.

  • Тушакъёстэ, миндэръёстэ но ваньзэ корка шорад тыр, тынад сьӧд зыбынэд но вал, сое но вай, мынам кышноелы ӵапак тупалоз…

Кеносмес, гидмес бушатэмзы бере выль коркамес но таланы малпало вал ай. Атай ведь ньыль часын ӵукна, буш вал вылэ пуксьыса, кытчы ке Можгала ветлӥз. Нуназе котыр отысь кагазэн вуиз. Сое Олексейлэн ныр улаз мычиз:

  • Сурон бам, коркаме уд тала, тани документ.

Мар вал меда со кагазын гожтэмын, ӧйтӧд, но милемыз — анаез, атаез, монэ, тямыс аресъем Пислэг вынме, ньыль аресъем Дуня сузэрме — юртамы ик улыны кельтӥзы. Нош талам дӥськутмес нуллӥзы милемыз кулак карем адямиослэн кышнооссы-нылпиоссы ик.

Кык арзэ секыт вал. Ярам, ӵужайёс, Казнакей ӵужапаелэн семьяез, атайлэн бускель гуртын улӥсь кырсиез ӧз куштэ. Атай трос ужаз, киыз мынэ вал. Кошовкаос, уробоос, кудыос, ларъёс, вышкыос лэсьтыса, я ю-нянь, я уксё вылэ вошъяз. Уг вунэтӥськы ни, кызьы со, Огырчи базаре ветлыса, анайлы сяськаё кашамер кышет басьтӥз. Оло, ӝӧккышет быдӟа ик вал со. Чебер Минёкаелы кузьым вайи шуыса, доре пыриз. Анай викышъяса бӧрдӥз. Соя ми но вузыны кутским. Атай милемыз бордаз кариз но буйгатэ:

  • Улом ай, нуныосы, улом, киос вань, йыр ужа, пыд йыламы султом но азьлолэсь но ӟеч улом.

Нош аслаз куараез дырекъя, синъёсыз пумен нюромо…

Бон, улӥм, пыд йыламы султӥм. Анай эшшо одӥг пинал вайиз. Марина сузэре вордскиз…

Ымусьтон бере гуртын ог-огзэс Виль шыд сиыны ӧтчало вал. Пудо вандо но гурын, горшокын лым пӧзьто. Осто, ческыт луэ вал бон со. Сэре бӧлякен юмшало, кырӟало. Атай мандолинаен ӟеч шудӥз, анай чебер кырӟаз. Кыӵе шудо вакыт вал. Сыӵе шыд сиён дыръя милесьтым куноосмес бускельёс но пырталлям. Атай отысен изьыезтэк доре бертӥз. Ачиз но утчаны ветлӥз, анай но, изьыез ӧз сюры. Анай туж куректӥз, йӧназлы ӧвӧл та, шуиз, бускель Ӝакылэн но, Койык картэзлэн но вегин кыл тодэмзы вань, шуо.

1935-тӥ арын вал со, Быдӟымнуналэ. Анай ӵукна ик табань пыжыны кутскиз. Атайлы бигер чашкае вина поныса сётӥз. Атай ал вылаз кык аресъем Маринаен ӝӧк сьӧрын табань вӧяса пукиз. Маке куспазы серекъяса ик анаен верасько вал. Со куспын атайлэн чашаез киысьтыз выж вылэ усиз но питыраса кошкиз, сэре ачиз пограз. Марина ӝӧк кук борды йырзэ шуккиз но жиетыса бӧрдыны кутскиз. Мон сое кутӥ, анай атай доры мыкырскиз:

  • Мики, мар луиз, синдэ усьты!

Атайлэн ымысьтыз шукы потэ ни вал. Анай кӧшкемыт шуш черекъяз, валаз ини, атай кулӥз шуыса. Выж вылысь ас понназ султэмез ӧз луы ни. Ми, нылпиос, нырысь атаез ӧс дорысь ӟус вылэ ӝутӥм. Сэре анаез валесэ выдтӥм. Мон Пислэгез Казнакей ӵужапай доры лэзи. Соос картэныз ӝог вуизы. Анайлэн ымаз йӧл кисьтӥзы. Ми ваньмы бӧрдӥськом. Со куспын ӧс куара кылӥськиз. Бускельмы Койык пыриз:

  • Минёкай, Христос, пе, улӟем. Тани Микышедлэсь изьызэ шедьтӥ, куинь толэзь валес уламы кыллем. Кызьы татчыозь шедьтӥськымтэмы, паймод но бырод, о-о, — кужмысь серектэм каре пиосмурт, ачиз атай шорысь синзэ уг вошъя.

Анай, Койыклэсь куаразэ кылыса, чотак султӥз, гур дурысь табапудэз кутӥз:

  • Кош мынам коркасьтым, ведӥн колӟо!
  • Мар сыӵе вожед потэ, Минёкай? Шумпот, Паска нуналэ кулэмъёс соку ик Инмар доры, рае, пе, сюро.

Казнакей ӵужапайлэн картэз Койыкез сильсьӧртӥз донгаса поттӥз. Соиз, ява, корказьысен эшшо пыкиське, корос лэсьтыны юрттом-а, пе, шуэ.

Весь малпасько, кытысь со тодӥз, атай кулӥз шуыса, гуртын нокин уг тод на вал, оло, зэмзэ но ведӥн вал…

Атай кулэм бере улон йырин-чукин луиз кадь. 1936-тӥ ар — сютэм ар вал. Нянь пыжыны пызь гинэ ӧвӧл, пот но ӧй вал ни, бусыысь сисьмем картошез уд шедьты. Пудо но, адями но начармыса, висьыса кулылӥзы. Кызьпулэсь гурызэ сиыса, тыпылэсь сулзэ парыса юимы. Эшшо тол кезьыт улӥз соку. Укно дурысь вуэз юыса, лэся, Маринамы черлаз. Куинь аресъем маке, ӟырдаса кылльыкуз но, «нянь, нянь» шуыса ӝуштӥз. Урод сиёнлэсь Пислэглы кӧткыль йӧтӥз.

Атайлэн яратонэз, пичи Маринамы, арня висемез бере кулӥз. Ватыкумы анай сандыкысь атайлэсь кузьмам кашамер кышетсэ поттӥз но, сузэрме соин бинялтыса, коросэ понӥз. Казнакей ӵужапай шуэ: «Минёкай, синпельлы уд кельтӥськы шат кышеттэ, яратыса нуллӥськод вал ук». Анай йырыныз гинэ шоназ, нылы, пе, сяська пӧлын мед улоз. Шайвылысь мырдэм бертӥмы, куазь пелляськыны кутскиз, анаез Мариналэн гу вылысьтыз басьтэммы уг луы ни, куараез бырытозь вузӥз, бӧрдӥз, сэре ӝуштӥз гинэ на. Доре пыриськом но, шыпыт, кезьыт. Казнакей ӵужапай шуэ:

  • Ма, та Пислэг гурез ворсаны вунэтэм ук, вань шунытэз ураме лэзем. Пислэг, изиськод-а, мар-а?

Ӵужапай сэндрае тубиз. Отысь со мырдэм васькиз ни. Ымзэ кышетэныз ворсаса, Пислэгмы но кулэм…

Анай воксё сьӧдэктӥз кайгулэсь. Со дырысен мон солэсь пальпотэмзэ ӧй адӟы ни. Ӵукна султэ, ӝӧк пуме чашаен чай пуктэ но атаен вераське вал: «Мики, кыӵе улӥськоды ни отын? Медад кынме, медад висе, сютэм медад улэ кадь йӧтэ. Нылпиосты чакла, таре ваньмыз шори: тӥ отын куинь кузя, ми татын куинь кылимы…»

Казнакей ӵужапай ӵем чаклаз милемыз, анаез йӧлын чаен кужмысь секта вал. Со ик улэп кельтӥз, дыр. Нош гуртоос тросэз дорамы винаен ветлӥзы: Минёкай, ог чарка аракы ю, кайгуэд небӟоз, шуылӥзы. Казнакей сыӵеосты улляса лэзьяз: «Шыд лым уз вае, курытсэ кужмысь донгозы, вина юыса, нокин ӟече вуымтэ на».

Али малпасько, визьмо ик вылэм Казнакей…

  • Галя, вот уг кылы, умме усид-а, мар-а отчы? — урам трос кеськем куара монэ но, Казнык апаез но куалектытӥз. Йырме ӝутӥ, Катя капка азьысеныз черекъя, узыянысь вуиллям но дораз ӧте. Шуак ӧй вала кытынме. Монэ, кызетӥ даурлэн кутсконаз шедем муртэ, со вакытысь семьяысь поттӥзы кадь. Кытысь-марысь та Катя вуиз. Мынам тодэме потэ вал, мар луиз собере. Воже потӥз, тунсыко киноез акылес рекламаен вис карем кадь луиз.
  • Казнык апай, ӵуказе но татын пукод-а? Мон лыкто дорады? — юасько песяйлэсь.
  • Уже ужамын, ӝыны нунал, пересь лыосме шунтыса, тазьы пукисько, — шуэ песяй. Собере шорам учкиз но оскытэк юаз: — Нёшто лыктод?
  • Лыкто, туж тунсыко ваньзэ мадиськоды, — ӟус вылысь султыса, шуи мон.

Ӵуказеяз анай, кытчы дасяськемме тодыса, шуиз:

  • Мын, мын ветлы. Казнык апай визьмо кышномурт, ас вакытаз йӧно, адӟем карымон адями вал. Туннэ нуналлы гуртын самой пересез улӥсь. Со кадь нокин но уг тоды вашкала улонэз но, кырӟан-веранъёсты но. Вераськем но потэ, дыр, дораз пересез отӥгес каро ни кадь.

Казнык апайлэн капка азяз кожыкум, адӟи ини, песяй толон сямен ик бодыен музъемез гожмаса пуке. Монэ адӟиз но пичи пинал кадь шумпотӥз. Лыктэмме возьмам.

  • Толон матысьёсме тыныд вераса пуки но ваньзы уйвӧтам вуизы ук. Пуко татын, ӟус вылын артэ. Чебересь, егитэсь. Ваняе но пӧлазы. Тӧдьы дэра дэремен, сирес дортӥз легезьпу сяська пужъятэмын. Ачим солы вури, пужъятӥ вал ай. Мон шоразы укноетӥ учкисько кадь. Ваняе киыныз шона, чаль, пе, дорамы, тонэ гинэ возьмаськом. Ӧс доры вамыштӥ но… сайкай. Кӧты ик урод луиз, вӧт гинэ со вал шуыса. Воксё чын-чын кадь вал ук. Ваняе но сыӵе шорам учкиз…
  • Тӥ ог-огдэс яратыса кышнояськиды, дыр? — малпаськонысь поттӥсько песяез.
  • Ми-а? — паймытӥськиз Казнык апай. — Оломар эн вераськы. Соку яратонэн йырин ӧй вал. Собере огшап улӥз но серектӥз:
  • Кыӵе шузи мон вал, кӧня бӧрдӥ куракузы.

Ванялэн Аймак Пантель атаез Демьян агаеныз но яна потэм Очей пиеныз дорамы лыктӥллям. Нянь колды, лянэсэн чечы но куинь манет ӝӧк вылэ понӥзы но лыктэм мугзэс веразы. Анай воксё куалектӥз кадь. Дуняез Казнакейёс доры лэзиз. Мон коркась бызьыса потӥ, кеносэ ватски. Кыӵе бызён? Со йырын но ӧй вал ай…

Казнакей ӵужапай картэныз вуизы. Мон пельёсме кучыран кадь сак кари. Коркан шыпыт вал, кенешизы, вераськизы, луоз. Нош мыным мед кошкозы ни кадь йӧтэ. Тани кылӥсько, Казнакей ӵужапай кырӟа ни:

Учке али чаркаяды,

Отчы вина гожтӥллям.

Учке али эшшо огпол,

Таре юэ шуиллям.

Осто, малпасько, кылзы тупаз-а, мар-а? Кызьы со Иванзылы бызём? Мыным дас тямыс тырмоз, солы дас куать сяна ӧвӧл. Мон тык-тык мугоро, ӝужыт, со — чиныр-чоныр, лапег. Со куспын корказе Казнакей ӵужапай потӥз. Монэ чуланъёстӥ утча:

  • У-у, тышкан люкет, пӧзем ыж йыр, сыӵе ӟеч интые мынэмез уг поты, туннэ ик секытэн медло вал…

Шедьтӥзы, корка пыртӥ-зы. Анаез ӟыгыртыса бӧрдӥсько, эн сёты, шуисько, уг поты, бызьытэк кылё, кожаськод-а, мар-а?

  • Мон но дас тямысам бызи. Атайдэ уг тодӥськы вал, нош кыӵе умой улӥм. Алама адямиос лыктысалзы ке, уллясал. Ӟеч выжыысь, анай-атаез но йӧноесь, узыресь. Пизы но урод уз луы. Тонэ интыяй ке, сюлмы капчи луоз, нылы, — шуиз анай.

Озьы мон Аймакъёслы кен луи. Нырысетӥ уяз Иванлэн анай-атайёсыз, Лукеръяпай но Пантель агай, изьыны сэндрае тубизы, милемлы кышнопала валиськизы. Мурт коркан кесяськыса уд ул ни ук. Мон выдӥ валеслэн огпалаз, Ваня — мукет палаз, вискамы йыр улысьтым миндэрез понӥ. Куазь шуныт луытозь, озьы изьылӥм. Пересьёс валазы, лэся, ӝукмы уг пӧзьы шуыса, май толэзе кеносэ валиськизы. Пантель агай кышноезлы шуэ: соослы одӥг миндэр гинэ пон, артэ мед изёзы.

Ванялы но та кышнояськон кулэ ӧй вал. Со укыр пинал ук ай. Кеносэ изьыны потыса, эрикез шӧдӥз, лэся. Ӝомал усем бере, капка ул пулэз басьтыса (ӟирыос ӟукырто шуыса, дыр), ураме потэ но шудон пӧлы пегӟе вал. Серемме кутэме ӧз луылы, адӟыса, кызьы картэ капка ултӥ мынэсьтым пега. Пересьёс тае но сактӥзы. Огполаз Ваняез кеносэ пыртӥзы но, уд оскы, ӧсэз сопалтӥз тунгоназы.

  • Кышноеныд шудоно ни, эшъёсын ӵукнаозь калтыртоно ӧвӧл, тон таре паръяськем пиосмурт, — шуиз атаез.

Ваня вӧзам писэй кадь выдӥз, атаезлэсь кышка вал со.

Бӧрысь вераз ни, эшъёсыз, пе, горо кышноямзы пумысен. Ма, монэ но ӵош шудоно эшъёсы, Сэдыкен Олькаос, серем карылӥзы, тон, пе, солэсь ныр улзэ ӵушылӥськод, дыр, пичи ук ай, зырымесь.

Огпол Ваня кизэ мылазям понӥз. Мон пельдораз сыӵе васькытӥ, валесысь музэ вуиз. Шуисько, эшшо огпол кидэ кузь лэзид ке, пыд вискысьтыд пичи Ванядэ ишкалто, педло ветлэмед уз луы ни.

Картэ вӧзам выдыны ӧз ни дӥсьты, востэм вал со. Сюры вылысь тулупез музэ куштыса изиз.

Озьы ик ар ортчиз. Мон весь кошко шуыса ас поннам кылли, сыӵе уг кельшы вал татын. Доре бертыса, анайлы ӝожтӥськылӥ.

  • Уллязы ке, бертод, но сыӵе ӟеч инты уд шедьты ни, — шуиз анай.

Лукеръяпай но сюлмаськиз:

  • Малы сыӵе вазь кышнояно вал, нылъёс быриллям-а, мар-а, соос ог-огзы шоры уг но учкыло, кызьы улозы? Гурт калык серекъя, кенды муры, лэся, пе, ар уло ни, нунызы ӧвӧл.
  • Дышозы, — шуиз картэз. — Эшшо ар, кык возьмасалмы ке, мукетъёсыз курасалзы.
  • Сирота ныл — бадӟым ыштон, — киыныз шонтӥз кышноез.

Пантель агай пыдзэ выж борды йыг! шуккиз:

  • Шып ул, визьтэм вераськемдэ уг яратӥськы. Анайзэ-атайзэ тодыса, умой ныл со, кен но усто луоз. Кеньырез йыраз вань, провор ужа, мар кулэ на.

Малпасько, э-э, тон монэ визьмо кожаськод? А мон асме шузи кадь возё но, тӥ монэ уллялоды. Со дырысен мар гинэ ӧй туртты ук, али но возьыт но, серем но. Корказьзы ӝужыт вал, тямыс-укмыс тубат. Мон отӥ адями сямен ӧй васька. Кык пыдын пагӟа вамен тэтчаса, гидкуазе потай. Корказы ик зуркалляз, макем маскара адске вал, дыр, палэнысен. Скал кыскыны потӥсько ке, сенике тубисько, кык-куинь курегпузэз отын ик пилисько но юисько вал, кӧмзэ кыед люке куштӥсько. Пересьёс валало вал, дыр, мон озьы йыртэмасько шуыса, но аслым номыр ӧз вералэ. Сиськыса пукыкумы гинэ, анайзы шуиз: «Пантель, сиге капкан пуктоно, мурт писэй дышем, лэся, курегпуз вылэ вуыны ӧйлась ни». Огполаз Лукерьяпай кладовоязы чечылы пыриз, мон мышказ ик потӥ но ӧссэ ворсай. Нош со излэсь кладовой вал, укноез мыжык быдӟа, ӧсэз кортлэсь. Нуназеяны бертэм Пантель агай анаймес усьтӥз. Куалектэм Лукерьяпай жоб куараен кесяськиз, мон кеносын кышкаса пуки. Пантель агай сое буйгатыны выриз, кӧня пол, пе, верано, ӧстэ пыкъятэк эн пыра — со секыт, ас кожаз пытсаське. «Визьмо кенэд ворсаз монэ», — ас кыл вылаз сылӥз кышноез.

Со учыр бере но ӧз уллялэ. Ӵуказеяз Ванялэн атаез (со колхозын бригадир вал) бертӥз но шуэ:

  • Кен, Голюшурмае трактористэ дышетскыны мынод. Колхоз ньыль муртэ келя: Опой Еняез, тонэ, Горд Дуняез, старшойды луоз Кокой Нияз.

Мон мытыны ӧй дӥсьты.

Лукер паймытӥськиз: кышноосты но трактористэ дышето шат?

  • Егит пиосты, арня ортчыса, Можга лесхозэ ужаны келялозы. Валэн, дӧдьыен мынозы, нюлэс поттоно, пе. Ваня но мыноз. Ато гуртоос шуозы, Пантель милесьтым пиосмес ыстэ, нош аслэсьтыззэ дораз кельтэ, — шуиз картэлэн атаез.

Озьы ӝыны ар пала Ваняен ӧм адске. Опой Еня но Горд Дуня дышетсконзэс ӧз быдтэ, мӧзмиськом шуыса, куспетӥ бертӥзы. Мон но малпасько вал но, анай ӧз лэзьы. Чидай. Озьы Ниязэн кыкнамы трактористъёс луим. Ваня май толэзе буш вал вылын бертӥз. Мон, скал кыскыса, гидысь потӥсько. Шуак ӧй тодма. Чебертӥськем, оло, быдэс йырлы мынэсьтым ӝужыт луэм. Возьдаськем кадь луи. Ӝытсэ сиськем бере Ваня шуэ: кышно, ойдо ни изём. Ӵыж гордэктӥ, пересьёс кылымтэ улсы кариськизы. Кеносэ потӥм. Ваня ӝик-ӝик ик бордаз ӟыгыртӥз. Малпасько, талэн пель дораз уд сёт ни, ма, чабкем но сокем ӧз пот ни кадь…

Гуртэ Ленинградын поттэм «Универсал» трактор вуыку, мон секытэн ни вал, тани-тани пияло. Нияз нырысь огназ гыриз. Ваня кебитын ужаз, пересь Опочей дорын. Быдэс гуртын со кадь усто дурись ӧй вал, Ванялэн но киыз воляз.

Ӝоген милям Коля пимы вордскиз. Осто, мар шумпотон вал со. Нылпи вайиськод ке, пиосмуртэз но яратыны кутскиськод вылэм. Ваня сыӵе мусо потэ вал. Малпасько, кыӵе мон шудо… Соку декрет шуонъёс ӧй вал, Колялы куинь толэзь дыръя пред ужаны потыны косӥз. Озьы мон тракторен гыри-кизи. Куддыръя анай, пиме пичи уробое пуктыса, гырон дорам лыктоз вал. Зарни комокме нонтӥсько, чупасько но выльысь ужасько. Анай тыбырам топ-топ вешалляз. Лукерьяпаез но анай шуыны кутски. Со бусые нуныме ӧз нуллы, Колялы сьӧд нянез яке сакыр пилетэз ӟустарие бинялтыса сётказ. Со топокез пие сюлмысь ик нонылӥз ук.

Туж умой улӥськом вал но, война кутскиз. Гуртысь ваньмыз кадь воргоронъёс оже кошкизы. Ваняез 1942-тӥ арын басьтӥзы. Ой, бӧрдӥ ук кошкыкуз.

  • Эн бӧрды, берто, анай-атаез чакла, Коляез эн черлатэ, юрт тон вылэ кыле, — шуиз. Ӟыгыртӥз но огшап шып сылӥм. Сэре капкаез ворсаны косӥз. Бертыкум, пе, тон ик мед усьтод. Гурт пумозь но келяны ӧз лэзьы.

Кыӵе шуг но кайгуо вал со вакыт, веранэз ик ӧвӧл, дыр. Секыт уж, сютэм улон, гуртэ вуись похоронкаос… Тракторен ужан смена вошъяськиз ӝыт но ӵук куать часын. Ӵемысь ачим уйин ужаны куриськисько вал, нуназе дорын юрттоно, пиелэсь но мӧзмисько шуыса. Смена ӵоже кызь сизьым трудодень тыр ужаса бертылӥ. Уйин тракторлэн азяз фонарь ошыса гыри. Шай дорын бадӟым бусы вал. Огполаз уйин Лефинь Шакталэсь гузэ гырыса кошкиськем. Гуртысьтымы пиосмуртэз малы ке сюреслы вамен ватӥллям, нош шайвыл кенерен котыртэмын ӧй вал. Курдаменым могась кылё ни, кожасько вал. Ӵукна бертыса верасько но, Ванялэн атаез шуэ:

  • Кен, юрттӥсь кур вӧзад, Дунядэ юа. Егит калыкез Балезино чугун сюрес лэсьтонэ, нюлэс коранэ келяны туртто, Дуняез но нуозы. Отын эшшо секыт уж.

Пред доры мыныса, озьы ик шуи, юрттӥсьтэк уг ни ужа. Мукетъёсыныз кивалтыны уг быгаты, соин ик Дуняез бордам юнматэ. Трактористъёс гуртын трос ӧй вал бере, пред соглаш луиз, озьы Дуня бордам прицепщике кутскиз. Медам кышкалэ шуыса, уйин кырӟаса ужаськом вал. Гужем пумын уйёс пеймытэсь, кезьытэсь, ми шай дортӥ гырыкумы-кизьыкумы, отысь вань пу киросъёсты сутыса быдтӥм кадь. Озьы атайлэн гуэз но киростэк кылиз. Али уг но тод ни, кытчы со ватэмын вал. Простить мед кароз монэ…

Казнык апай шыпаз, кышет пумыныз синкылиоссэ ӵушиз. Ӝож мылкыдысь поттон понна юасько солэсь, кӧня ар тракторен ужаз.

  • Тямыс ар луиз кадь. «Универсалэн» сяна, ХТЗ тракторен но гыри ай. Ужамме адӟыны ёросысь кивалтӥсьёс но вуо вал. Огполаз передовиклы сямен трактор бордам горд флаг думизы но асме патретэ шуккизы. 1946-тӥ арын войнаысь Ваняе бертӥз (1945-тӥ арын со зол сӧсырмем, госпитальын кема улэм). Нош ар ортчыса, милям Вася пимы вордскиз. Ваня соку ик шуиз: тырмоз трактористын ужаны.

Мон пастуке интыяськи, нырысь бадӟым пиеным колхоз уллёез возьмам, сэре пичиез но сьӧрамы калъяськиз ни. Гурт котырысь вань возьёсты, нюк-гопъёсты тодӥсько вал. Али пыдъёсы мынысалзы ке, пал синмыным коть адӟысал Тилинчи, Парси, Италмас возьёсыз, Кузёбайгыркез, Выльвыжнюкез, Валлэзён но Луд гурезьёсты. Нош кӧня пар пӧзьы-пыдвыл керттӥ, кӧня киуж чильпай. Дас арлэсь кема пастукай ук. Зор-а, тӧл-а, ӵукысен ӝытозь инкуазьын, дорез уд адӟиськы. Нош гудыръямлэсь кыӵе курдасько вал. Огпол писпу улэ пиосыным ватским. Сыӵе гудыртӥз-чилектӥз, дунне пилиськиз, инбам кымаськиз, кожай. Учкисько но, вӧзысьтымы лулпуэз ӵашъем, пересь писпу шори пилиськем, ява. Пыдъёс но висьыны кутскизы но, пастукысь кошки, парсь гидэ ужан кариськи. Татын капчигес йӧтӥз. Но тожо оломар но вал. Соку парсьёсты пастуказы ай. Ӝыт фермае васьки но, мынам мумы парсе клеткаяз ӧвӧл. Нокытысь уг сюры. Парсь ӝоген пияны кулэ ни вал. Комиссия люказы. Милям гидамы но утчаськизы, анай доры но тубазы, Дуня сузэре дӥне но утчаськыны вуиллям. Малпаллям, мон ватӥ, лушкай, дорын пиятон вылысь. Ӧз шедьтэ. Шуизы, парсед ышиз, озьыен, тон тыриськоно луод. Тямыстон манет пуктӥзы, быдэс уждунэ со вал. Кӧня кайгыри, юнме шорысь янгыше уськытӥзы, эшшо ик штраф лякизы шуыса. Нош кык арня ортчыса, нурскетӥсе дас парсьпиосыныз ферма доры вуэм. Пастукысен пегӟем-а, ферма дорысь уторысь кошкем-а, кин мед тодоз на таре. Но уксеме ӧз берыктэ ни. Тӥни озьы но луэ вылэм.

Мынэсьтым улэм-вылэмме кылзӥд ке, паймод но бырод, маиз гинэ ӧй вал. Ӵош шудоно эшъёсы сузэр кадь йӧто вал. Нош бератаз мыным кӧтсы пӧсь луиз. Сэдыклэн картэз войнае быриз, нош Олькалэн юыны яратӥз. Курытсэ ӟузе ке, мыжыкъёссэ кырме вал. Эшъёсы вожъяськыны кутскизы мыным. Синмам ик вераллязы, Ваняед вӧзын, пе, эрке писэй кадь улӥськод, номыр сярысь сюлмаськытэк, кыл кылытэк. Ма, озьы, ми соин туж ӟеч улӥм. Витьтон кык ар ӵоже огпол но чабкемез но, урод кыл но верамез ӧй вал мыным. Вина ӧз юы, тамак ӧз кыскы, калыкен керетыса ӧз ветлы, вань ужез ужаз. Но эзель уг юа ук, кинэ, ку сьӧраз нуоно. Ваняе но пудо сюдыны потыса пограм. Пери шуккиз кадь сое. Кызь ар талэсь азьло пери шуккемез йӧнатыны уг быгато вал-а, мар-а? Ньыль нунал кор кадь кыллиз. Верамез уг луы, нош синъёсызъя валасько, кылэ, вала монэ. Кизэ маялляса, вӧзаз пуки. Ваня, шуисько, эн кельты ай милемыз, учкы, кыӵе умой но капчи улӥськомы. Нунокъёслэсь ӟечсэс адӟем потэ ай, эн кулы. Мон тонтэк огнунал но уг улы. Киме зол-зол ик кырмиз, нош синкылиосыз бамаз уг тэро… Ӧз кылзӥськы, кошкиз дорысьтым… Пиосы но умоесь вал. Коля военной луиз, быдэс дуннеез котыръяз, берло Кировын улӥзы ни. Васяе колхозын ужаз, ньыльдон вить ар шофёр вал, одӥг штрафтэк но. Сэдыкен Олька вожъяськизы улэмелы но. Соос мынэсьтым кайгуме ӧз адӟе, асьсэлэсь пиналъёссэс ӧз ватэ. Инмар нокинлы но сыӵе куректонэз медаз возьматы…

Казнык апайлэн синъёсыз нош ик нюромизы. Песяез кызьы буйгатыны валатэк, вераськон ӧрмес воштоно кариськи.

  • Казнык апай, тон вашкала кырӟанъёсты трос тодӥськод, дыр, — юасько песяйлэсь.

Со кышетсэ тупатӥз но шуэ:

  • О-о, тодысалыд ке, пинал дыръям шудон пӧлын мон кадь кырӟасез ӧй вал. Тон ӵуказе лыкты на, мон тыныд кырӟаса ик сёто. Сэре ваньзэ верай-а, кожаськод ни, мынам трос ай паймымон учыръёсы, — кескич пальпотэ песяй.
  • Мон та пересьмы ас понназ вераськыса пуке ни, кожасько, тыныд-а, мар-а, выжыкылъёссэ маде, — азбарысь Казнык апайлэн Маша кенэзлэсь потэмзэ огмы но ӧм шӧдэ.
  • Мон алдаськыны дышемын ӧвӧл, аслэсьтым улэм-вылэмме кызьы вал, озьы верасько, — вожез потӥз Казнык апайлэн.
  • Кинлы нош со тунсыко? Пинал муртэ ӝегатыса пукиськод татын, — будэтӥз Машапай. Собере шорам учкыса шуэ: — Со милям сыӵе, кылзӥсь шеде ке, виясь кобы кадь дугдэмез уг луы ни.
  • Тӥни, пересьми, толк быриз но, монэ озьы унь-мань каре ни, — кенэз шоры возьматэ Казнык апай. — Шуисько: сёт ини монэ пересь юртэ. Ачим мултэс, но пенсие кулэ на. Мынам тямыс нуноке. Пичиезлэн гинэ на, Алёшамылэн, коркаез ӧй вал, мурт патерын Ижын улӥзы. Кылем арын асьсэлы юрт басьтӥзы, кредит шуонэн, уксёзэ мон тырисько. Пенсие бадӟым, нош мыным малы коньдон кулэ на. Ӵем бертало чакланы. Пичи кен дорам лыктэ но шуэ: «Песяй, кыӵе тазалыкед, кема ул али, кызьы ми тонтэк…» Сюлмам ӵыжтэм вӧй поно кадь. Нош таизлы (бадӟым кенэз шоры возьматэ) маке верасько но, ымдэ эн кока, шуэ. Вот, пересьмыны но, кулыны но шуд кулэ вылэм ай.

Машапайлы умой ӧз пот, лэся, мон азьын керетыны. Казнык апайлы шуэ:

  • Я, эн ӝожтӥськы, умой улӥськом, шыд но пӧзиз ни, ойдо пӧсь лым ӟузьылод, — песяйзэс кунултӥз но ӟус вылысь султыны юрттӥз. Казнык апай «г» буква кадь куасалтӥськемын вылэм. Капка доры губыр-губыр вамыштӥз. Пырон сямен ини куаретӥз: «Тон ӵуказе лыкты на, ява…»

Ӵуказеяз шӧдтэк шорысь городэ кошконо луи. Малпай, шутэтскон нуналъёсы берто но одно ик Казнык апай доры васькало. Арня шорын анайлы жингыртӥ, тодыны, кыӵе иворъёссы вань, мар вылез?

  • Толон Казнык апаез ватӥзы, — онгыратӥз со.

Мон гуньдэм кадь луи:

  • Кызьы озьы?
  • Вот озьы. Пуксёнэ Машазэ мунчо эстыны косэм. Изьыны выдон азяз, пе, шуиз: «Кен, капкаез эн ӵога, Ваня буш вал вылын лыктэ ни мон доры, ато вуоз но йыгаськыса сылоз». Иземе гинэ медам кыль вылэм, тылэз но кышнопалась эн кысы, пе.

Ӵукна, Маша султыку, анайзылэн мугорыз сӥя ни вылэм, изён сямен ик кулэм.

Келяськонын туж трос калык вал, нунокъёсыз ваньмыз бертӥллям. Маша но зол бӧрдӥз. Эш, пе, вал ай со мыным, коркан шокась вал, табере огнам, пе, кыли. Нылпиосыз ваньмыз палэнын уло ук.

Эх, малпасько, тодысал ке, городэ ӧй лыктысал, мынысал но юалляськысал на Казнык апайлэсь. Возьмаз, дыр, нош мон алдам кадь луи. Эшшо ведь трос на веранэ, шуиз вал, кырӟанъёссэ но гожтыса ӧй кельты. Жаль… Мукет ласянь, солэн лулыз али гань-гань, дыр, Ваняеныз, пиосыныз пумиськизы ни, луоз…

Ангелина Снигирева
By Ангелина Снигирева 15 июля, 2020 17:41
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<