Глазов ёросысь Штанигуртысь «Искра» культурая юрт выльдэмын

Related Articles

• Тӧр шорын — Сарапулысь литература 0 06.Дек
• Кино пуктыны — Эстоние 0 12.Авг
• Кылдоз шаермылэн туризмъя паспортэз 0 25.Ноя

Тупатъян ужъёс лэсьтэмын «Огъя Россия» партилэн «Пичи Дорлэн лулчеберетэз» федерал проектэз улсын.

2 ар возьмазы штанигуртъёс клубзылэсь чеберскемзэ. 2019-тӥ арын ремонтлы кошкиз 1 миллион 100 сюрс манет, 800 сюрсэз федерал бюджетысь вуиз. Коньдон висъяны быгатӥз Глазов ёросысь Культурая но туризмъя центр но: татысь ужасьёс, проектъёсын, ужбергатонэн вырыса, табыш потто. «Искраысь» концертной залын выль выж вӧлдӥзы но пуконъёсты воштӥзы. 2020-тӥ арын клубысь сценаез тупатӥзы, югыт сётӥсь оборудование басьтӥзы, аудиосистема пуктӥзы. Туэ ремонт 649 сюрс манет тыр усиз, пӧлысьтыз 43 сюрс манетсэ нош ик висъяз Культурая но туризмъя центр.

Выльдэм культурая юрт учкисьёсты пумитаны дась, нош клубысь ужасьёс выль творческой сезонлэсь кутскемзэ возьмало. «Искрае», штанигуртъёс сяна, бускель деревняосысь улӥсьёс вуыло, татын ик ёрос ужрадъёс ӵем ортчыло.

Ремонт азьланьтӥське Глазов ёросысь мукет культурая юртъёсын но. Кылсярысь, Трубашурысь клубын выль укноос пуктэмын. Инициативной бюджетирование проект чотын культурая юрт вӧзын шудон площадка усьтӥськоз.

Сергей Захаров