Глазов ёросысь Штанигуртын «Шудбур» удмурт клуб ужа

Удмурт Дунне
By Удмурт Дунне 6 июля, 2020 11:04

Глазов ёросысь Штанигуртын 2017-тӥ арысен «Шудбур» удмурт клуб ужа. Сое кылдытӥз но азинтэ мыло-кыдо егит нылкышно Марина Наговицына.

Марина Наговицыналэн архивысьтыз
Глазов ёросысь Штанигуртысь М. Наговицына нылпиосты удмурт сям-йылолъёсын тодматэ.
Марина Наговицыналэн архивысьтыз

Марина Глазовысь 48 номеро нылпи садын пӧраськись луыса тырше, нош сюлмыз куриське калык пӧлы, сцена вылэ. Егит нылкышно ваньмон дыръяз «Чупчи гуръёс» но «Тулыс шапыкъёс» ансамбльёсын кырӟа, пӧртэм пумо ужрадъёсы пыриське. Алигес Марина «Чеберай» элькун марафонын устолыксэ возьматӥз. Глазов ёросын 35-55 аресъемъёс пӧлын вормиз.

— Мон яратӥсько шаерме, удмурт кылэз, культураез. Кӧ-
ня асме тодӥсько, удмуртлык мыным котьку тунсыко вал, —
вера М. Наговицына. — Тэк пукыны уг чидаськы: яратыса пыриськисько пӧртэм ужрадъёсы, сцена вылын кырӟасько. Тӥни отысен ик монэ синйылтӥз асьме палась азьветлӥсь, Золотари гуртысь «Истоки» музеен кивалтӥсь Антонида Бёрдова. Со мыным удмурт клуб усьтыны ӵектӥз. Оскалтоно, малпай.

Озьы, Штанигуртысь клубын ужасен Ольга Корепановаен кенешыса, удмурт клуб усьтӥз, сое «Шудбур» нимаз. Удмурт семья шудо луыны кулэ, пе. Нырысь-валысь сое семьялэн клубез гинэ шуыса азинтыны тыршо вал, но бӧрысь кенешизы: отчы вань мылкыд карисьёс — пичиос но бадӟымъёс — ветлыны мед быгатозы. Табере 2 ар ӵоже толэзяз 2 пол Марина,
нокин курытэк-косытэк, Штанигурт вӧзысь гуртъ-
ёсы вуылэ, отысь нылпи-
осын пумиськылэ. Пичиосты удмурт сям-йылолъёсын, шудонъёсын, сиён-юонэн тодматэ, асьсэ палась удмурт азьветлӥсьёсты куно вае. Нылкышнолы ужрадъёсты ортчытыны юрттӥсько «Золотой ключик» нылпи садысь воспитательёс, «Чупчи гуръёс» но «Тулыс шапыкъёс» ансамбльёслэн кивалтӥсьсы Ольга Бегишева, Глазовысь вуриськись Валентина Пряженникова.

«ВКонтакте» бамын асьсэлэсь группазэс нуо, сое тунсыко иворъёсын, асьсэ ужрадъёссы сярысь материалъёсын, туспуктэмъёсын тырмыто. Та бамез адӟыса ик, «шудбуръёсты» асьсэ доразы нылпи садъёс ӧтьыло.

— Адямилы пичи дырысеныз анай кылзэ, культуразэ яратон мылкыд пыӵатыны кулэ, малпасько, — шуэ нылмурт. — Удмуртиын улӥсьёс удмурт кылэз, сям-йылолъёсты мед тодозы. Пумиськонъёслы юри удмурт шудонъёс, выжыкылъёс, мультфильмъёс дасясько, удмурт дӥсен быдэскыса яке выжыкылысь геройлы пӧрмыса, пыжиськыса лыктӥсько. Тань 48-тӥ нылпи садысь пичиос доры, Лӧпшо Педунь кариськыса, вуи, удмурт выжыкылысь та героен тодматӥ, шудонъёс ортчытӥ. Штанигуртысь пичиосын удмурт сиён-юонъёс сярысь вераським, уйпал удмуртъёслэн дӥськутэнызы тодматским. Коротайын «Юмшан» квест-шудон ортчытӥм, отчы нылпиос мумы-бубыосынызы лыктӥзы. Пичиослы возьматӥм, кызьы пу пильылоно, табань пыжоно. Уноез нылпиос сое адӟытэк будо ни. Удмуртлыкен герӟаськем юанъёсын визь сынан ортчытӥм на. Та гуртысь ик «Гербер» ансамбльысь кышноосын ужаны яраське. Соослэсь сомында выльзэ тодӥсько, озьы ачим но дышетскисько, соослы но мар ке мадько. Таӵе пумиськонъёс покчиослы но, анай-атайёслы но, песянайёслы но ярасько. Озьы ас валамея вырисько удмуртлыкез утьыны но азинтыны. Кыӵе ке ужрад ортчытыны ӵектыса, нылпи садъёсын герӟаськисько, но тросгес мыным асьсэос воспитательёс вазисько, лыктыны курыса. Туж шумпотӥсько, тыршеме кинлы ке кулэ шуыса.

Марина пичиос доры вуэ чебер удмурт дӥсен, солэн трос пӧртэм пумо вашкала но туала дэремъёсыз. Вашкала сям-йылолъёсты возьматыны дэра юбказэ дӥся — сое ӵыжы-выжыез кузьмам. Сцена вылын кырӟаны тупамон чебер, яркыт костюмъёсын шумпоттэ В. Пряженникова.

Анайзы кадь ик котькытчы вутскыны тыршо 3 нылпиосыз но. Зӧкез (бадӟымез), 16 аресъем Артём, гитараен шудэ, спортэн эшъяське. 12 аресъем Вероника анаеныз ӵош городысь сценаосын ӵемысь кырӟалля, аккордеонэн шудэ. 5 аресъем Степанзы спортэз гажа, суредаськыны яратэ.

________

Ангелина СНИГИРЁВА

Удмурт Дунне
By Удмурт Дунне 6 июля, 2020 11:04
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<