Выль книга: Люкаськизы одӥг липет улын

Удмурт Дунне
By Удмурт Дунне 24 июля, 2020 17:24
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Кылем толэзе «Удмуртский университет» издательствоын потӥз Татьяна Кибардиналэн «Шуныт липет улын» книгаез (6+).

Татьяна Кибардина — Удмурт кун университетлэн Можгалась филиалэзлэн директорез, филология наукаосъя кандидат. Кылем арын солэн «Анай» пьесаез «Кенеш» журналлэн литературной конкурсаз вормисе потӥз. Пьесаез но авторлэсь веросъёссэ выль книгаысь лыдӟыны луэ. Со сяна, «Шуныт липет улэ» пыремын семьяез сярысь очеркъёсыз, тодэ ваёнъёсыз, ӵыжы-выжыосызлэн произведениоссы но архивысьтызы туспуктэмъёс.

Кибардинъёслэн выжызы — туж кужмо выжы! Тазьы шуыны дӥсьтӥсько мон «Шуныт липет улын» книгаез лыдӟеме бере.

Сое мон ӝыны нунал куспын ньылӥ, лыдӟыны кутски но — дугдытскеме ӧз луы ни. Аспӧртэмлыко книга тодматэ Алнаш ёросысь Шадрасак-Кибья гуртысь Кибардинъёслэн семьяенызы: Михаил Васильевич но Любовь Ильинична кузпалъёсын но соослэн нылпиосынызы.

Элькунамы Светлана Кибардина журналистэз тодӥсьтэмез ӧвӧл, дыр. Тодӥсько мон Мария Михайловнаез но. Со ас вакытаз туж тунсыкоесь радиопередачаос дасялляз, мон сярысь но 2 передача эфире потаз — бадӟым тау солы. Нош Василий агайзы сярысь ӧжытгес тодӥсько вал. Лыдӟи со сярысь тодэ ваёнъ-ёсты но, солэсь кылбуръёссэ но. Синкылиосы потымон жаляй — сыӵе быгатӥсь адямилэн улонэз сокем вазь уретӥськем! Кӧня ӟечсэ лэсьтысал но, гожтысал но ай азьланяз! Туж мур пуштросъемесь чуръёсыз:

Кытчы кошкиськод тон, сюрес?

Сьӧрам ке мынӥд, верало.

Маин тон дано, дун ошмес?

Сюэд ке куасьмиз, валалод.

Малы, нянь, мыным тон атай?

Оло, тон монтэк улӥськод?

Малы, музъеме, тон анай?

Астэ бен кинлэн кожаськод?

Нош эшшо но паймытӥзы анайзылэн кылбуръёсыз! 4 классэз йылпумъям кышномуртлэн туж чебересь чуръёсыз. Малпаськонэ уси: асьмеос, удмуртъёс, ваньмы кылбурчиос, дыр. Мынам нэнӥе но, куно сектакуз, утыр малпаса, пыр кырӟа-вера вал. Нош Любовь Ильинична кылбуръёссэ тетрадяз гожъяса кельтэм.

Атайзы но визьмо, лыдӟиськись вылэм. Пиезлы армие ыстэм гожтэтъёсызъя гинэ но сое валано. Сыӵе йӧно, визьмо анай-атайлэн кызьы уз будэ синмаськымон нылпиоссы!

Мынам эшшо вераме потэ на Татьяна Михайловналэн произведениосыз пумысен. Та книгае пыртэмын солэн веросъёсыз но «Анай» нимо пьесаез. Пьесаезлы вылӥ дунъет сётӥз ини литературной конкурслэн жюриез. Мон но соглаш таӵе дунъетэн — пьесаын туж кулэ тема ӝутэмын. Пересьёслэн юртазы нокин но шумпотыса уг мыны, дыр. Мыным туж кельшизы веросъёсыз но. Кылыз вольыт, узыр, ӵемтылоно ӧвӧл. Огез бӧрсьы мукетсэ лыдӟем потэ.

________

Римма Рылова.

Можга ёросысь Александрово гурт

Удмурт Дунне
By Удмурт Дунне 24 июля, 2020 17:24 Updated