Валтӥсь библиотекарь Анна Кастильо Мехиа — фея

Удмурт Дунне
By Удмурт Дунне 7 июля, 2020 08:43

Ижысь И. Наговицын нимо модельной библиотекаысь валтӥсь библиотекарь Анна КАСТИЛЬО МЕХИА 2017-тӥ арын Россиысь устоез егит библиотекарь луиз, кылем арын Удмуртилэн Тӧроезлэсь «Признание» премизэ басьтӥз. Егит специалист волонтёр ужен выре, проектъёс гожъя, тренингъёс ортчытъя, кылбура, суредаське, театрын шудэ, «Мынам Удмуртие» радиоын эфире поталля, дуннеез котыръяны яратэ… Кызьы меда ваньмаз вутске? Паймонэз ӧвӧл, угось Анна — фея.

Туспуктэм: Анна Кастиль Мехиалн архивысьтыз
Ижысь И. Наговицын нимо модельной библиотекаысь валтӥсь библиотекарь Анна КАСТИЛЬО МЕХИА
Туспуктэм: Анна Кастиль Мехиалн архивысьтыз

Покчи библиотекарь

— Тросэзлэн тодэмзы потэ, кытысь мынам сыӵе аспӧртэм нимы, — вера А. Кастильо Мехиа. — Анае дышетскемезъя лингвист но кылысь кылэ бе­рык­тӥсь, ас вакытаз интер­дви­жениын ужаз, калыкъёслэсь кусыпъёссэс юнматон понна тыршиз. Озьы атаеным тодматскиз. Бӧрысь соос люкиськизы, но атаеным мон ӟеч кусып возисько. Испан кылэз валасько, но уг вераськиськы.

Вордӥськи мон Ижкарысь Буммашевской урамын, татын ик будӥ. Пичи классъёсын дышетскыкум, И. Наговицын нимо библиотекае ветлыны кутски. Библиотекарь Оксана Фарахутдиновна Нуртдинова — али со ки­вал­тӥсьмы — милемды, покчиосты, волонтёрской уже кыскиз, ми пӧртэм ужрадъёс ортчытъяны юрттылӥмы. Школаын монэ серекъялозы вал: будыса одно ик библиотекарь луод. У-уг, пӧй, мон журфаке пыро, мынам аслам крутой медиастудие луоз. Журналистикая факультетэ мон пыри, студент дыръям ик библиотекае ужаны интыяськи. Дышетсконме 5-тӥ курсын аналтӥ, нош библиотекаын 10-тӥ арзэ ужасько ини. Озьы ке но льӧль малпанэ быдэсмиз — медиастудия татын, библиотекалэн юртаз, кыл­дӥз, шуыны луоз.

10 ар талэсь азьло малпанмы кылдӥз: Россиысь устоез библиотека луоно. Соку залъёсмы пеймытэсь вал, калык шер пыралляз. Интымы шӧтэмгес вал ке но, усто библиоуй радъяны быгатӥм, отчы 300 пала егитъёс вуизы. Ужасьёсмы адӟизы: ӟеч ужлэн ӟеч емышез луэ. Куд-ог дыръя мукет библиотекарьёс ми шоры кырыжгес учко, кизилияськиськом, малпало. Кивалтӥсьёс но весь уг дунъяло — выль амалэн вырисьёс огдышем улонэз котьку бугырто угось. Модельной библиотека луэммы потӥз но, верасьёс луизы: нош малы тӥ? Тӥ филиал гинэ ук. Со понна нюръяськоно луиз. Улонын ас кожаз номыр уг кошкы, ӝог воштӥськоно луэ. Кужмо но дӥсьтӥсь луоно, мыр-мыр нюръяськоно ужед понна. Озьы, номыр шоры учкытэк, кылем арын библиотекамы модельной луиз.

Мон ужпумез гинэ адӟисько, могӟетъёсты уг синйылтӥськы. Уж бордам но кырмиськыса уг улӥськы. Кулэ луиз ке, али ик султо но кошко. Тодӥсько: та интыын ваньмыз умой, ваньмыз монтэк но ужалоз. Котькуд проект озьы радъяськыны кулэ: кивалтӥсь кошкиз ке, ужез сотэк но мед азинскоз.

Калык понна

— Выль поколениысь библиотекаос — пӧлазы пыре И. Наговицын нимо лыдӟиськон юрт но — выль сямен ужало. Ми дорын арняяз 20-30 ужрад ортчылэ, пӧртэм проектъёс быдэстӥсько. Мае компьютерен лэсьтыны луэ — сое уже кутӥськом. Искусственной интеллектэз адямиос юнме шорысь малпаллямтэ. Отчётъёс гожъяны, пырась-потасьёсты лыдъяны капчигес луиз.

Библиотекарьлы калыкен ужаны быгатоно, адямиос ми дӥ­не доразы кадь мед пыралозы. 10 ар талэсь азьло ми психологъёсын вераським, адямиен кусып возён сярысь литература лыд­ӟим. Бӧрысь проектной уж паськыт вӧл­миз. Книгаос гинэ сётъяса улӥсь­ёс коллективысь асьсэос кошкизы. Али котькудӥз библиотекарьмы огдыре лыдӟисьёсын но ужа, 10 проект но капчиен нуэ, соцсетьёсын но гожъяське. Коть­ку­дӥз аслэсьтыз тунсыкъяськонъёссэ ужаз но кутыны быгатэ.

Али Россиын калык понна ужась библиотекаос ӧжыт. Бен, кемаласен озьы вал: библиотекалэн валтӥсь ужпумез — информациез люканы, сое пӧртэм амалъёсын утьыны-возьыны но калык дорозь вуттыны. Но али но тросэз библиотекарьёс малпало, соос книгаосты утьыны гинэ кулэ шуыса. Та малпан борды куд-огез кырмиськемын, сотэк угось вылезлы дышетскыны, вош­тӥсь­кы­ны кулэ.

Ми кунгож сьӧрысь коллегаослэсь адӟем кариськом — соослэн калыкен кусып возён ужзы волятэмын ини. Модельной библиотекалэсь проектсэ гожтыкумы, малпаськимы, кызьы пайда вайыны быгатомы котырамы улӥсь адямиослы. Ижкарлэн Буммаш шуон люкетаз трос асьсэ понна калтыртӥсь нылпиос, дышетскымтэ адямиос. Гужем трос нылпиос ас кожазы кылё, соос ми доры вуыло. Буммашысь ужтэк калгись егитъёс лыкто, бӧ­рысь эшъёссэс ӧтё. Татын соос асьсэды мукет сямен возё. «Астэ умой возь» шуыса ӟургетонэз ӧвӧл, малы ке шуоно соос асьсэды доразы кадь шӧдо. Нош дорын жоб кылъёсын вераськыны уг яра, котырез арам кароно ӧвӧл. Мылкыдзы но бурдъяське, рок-концерт яке мукет ужрад ортчытэмзы потэ.

Удмуртилэн Тӧроез Александр Бречалов вуылӥз И. Наговицын нимо библиотекае
Туспуктэм: И. Наговицын нимо библиотекалэн «ВКонтакте» бамысьтыз»

Дышеты но дышетскы

— Ми адямиослы быгатонлыкъёссэс усьтыны, льӧль малпанъёссэс улонэ пыӵатыны юрттӥськомы. Потэ ке книгадэ печатламед — ми вералом, кызьы графической дизайн лэсьтоно, кызьы кулэ луись программаен ужано, юрттом издательствоен вераськыны, рекомендация лэсьтом. Асьмеос книга ум печатлалэ — адями сое ачиз карыны кулэ.

Али ми трос калыкез дышетыны, пӧртэм удысъёсын визь-нод сётыны быгатӥськомы. Покчиезлы дышетскисьмылы 4 арес, мӧйыэзлы — 83. Потэ ке адямилэн виртуальной дополненной реальностен тодматскемез — ми юрттомы. Ми возьматӥськом, али технологиос дунтэмесь шуыса. Занятиосмы бере тон быгатӥськод 600 манетэн шлем басьтыны, телефонад дунтэк программа пуктыны но лэсьтыны, шуом, шаермылэн историеныз тодматӥсь проект.

«Библиостартап» проектмы адямиослы быгатонлыксэс возьматыны, аудиторизэс шедьтыны юрттэ. Техника, инты, книгаос, информационной партнёръёс, методика, тодон-валан, волонтёръёс — мар милям вань, ми дась сётыны. Озьы ми дорын 50 пала адямиос проектъёссэс быдэсъяло, кылсярысь, калыкез дунтэк дышето курсъёсын, нош асьсэлы ним лэсьто.

Калык сярысь малпаськыса, ми быгатӥмы пӧрмытыны сыӵе инты, кытын тӧр шорын, книга интые, адями пуктэмын. Ми дӥне лыктыса, адями вала: бен, книга — со туж усто, но сое дорын но лыдӟыны луоз. Нош библиотекаын тунсыко адямиосын кусып возёно.

Книга пушкы пыртоно

— Малпало, мон книгаос лыд­ӟыны, соос сярысь вераськыны яратӥсько шуыса. Весь озьы уг луы. Берло дыре трос лыд­ӟись­кись­ко. Комплектование дасяку, ми котьку проектъя ог 10 ке но книга лыдӟисьёслы ӵек­ты­ны кулэ. Книгаосты, асьмеос лыд­ӟы­тэк, ноку ум дэмлаське. Ремонт бере усьтӥськеммы азьын выль книгаос вайизы — ми библиотекаын уйёсы но пукимы, выль книгаосты зынъяса-бугыръяса.

Мон пӧртэм жанръем книгаосты яратӥсько: детектив, триллер, фантастика, психологилы сӥ­зем, научно-популярной. Берло дыре Гийом Мюссолэн, француз писательлэн, детективъёсыз ярало.

Книга котырын аспӧртэм мылкыд кылдытоно, сое лыд­ӟись­лы палано. Шуом, тросэз лыд­ӟись­кы­ны уг ярато школаысен ини, угось отын зӧк книгаос сёто, пиналъёсын быдэ вуэм муртъ­ёсын кадь верасько. Пиналэз книгаен эшъяськытыны ми выль амалъёс утчаськом. Книга ӵектон азьын юалляськиськом: кыӵе тынад мылкыдыд, мае шӧдӥськод? Угось пиналлы книгаез лулыныз шӧдоно. Ад­ӟись­код: таиз пияш пырак книгаысь Пичи принц кадь. Нырысь солы мультик возьматӥськом, суредаськиськом, виртуальной реальносте пыртӥсь шлемен маке возьматӥськом. Бӧрысь пинал ӵек­тэм книгаез шумпотыса лыд­­ӟе ини. Куддыр нылпиосты выжыкыл дуннее вуттӥськом. Пиналъёс синзэс кыньыса кыллё, нош ми книгаез шара лыд­ӟись­ком.

Библиотекаез выльдыку.
Туспуктэм: И. Наговицын нимо библиотекалэн «ВКонтакте» бамысьтыз»

Бен, литературая урокын озьы уд кары: программаез чаклано, дыр ӧжыт. Но пиналъёс котьку ярато вань сюлмысь мадемез.

Сётэмез ӟечен
берытске

— Анае 3 арескысеным англи кылэз дышетытӥз. Бӧрысь школаын, университетын дышетӥ англи, француз, фин кылъёсты. Кӧня ке кылъёсты тодэме ужын юрттэ. Кызьы кунгож сьӧрысь коллегаосмы ужало, кыӵе амалъёссэс ми дорын но пыртыны луоз? Мукет кылъёсысь статьяос берыктылӥсько.

Миым библиотекаямы удмурт кылъя курсъёс кутскизы, ачим но удмуртэз ды­ше­тӥсько. Кӧня ке ар талэсь азьло ӧй но малпасал, федеральной грантлы проект гожтӥ ке, мынам сое удмурт кылын нимаме потоз шуыса. Удмурт кыллэсь чеберзэ уг адӟиськы вал. Но ваньмыз дышетӥсь бордысь потэ. Ангелина Ефремовна Решетникова дышетӥсе юалляськиз: тодӥськод-а, малы та кыл озьы чузъяське, малы тазьы? Кылзӥськы, кыӵе чебер. Со юрттӥз кыл шоры мукет сямен учкыны.

Али «Мынам Удмуртие» радиоен кусып возисько. «Книжные феи» авторской программаямы арнялы быдэ вераськом, кыӵе воштӥськонъёс шаерысьтымы но дуннеысь библиотекаосын али ортчо, тунсыко книгаос сярысь мадиськом. Ачим но шаермы сярысь иворъёсты лыдӟыны, татысь адямиосты кылзыны но валаны кутски. Азьло мон малпасько вал: малы шаерысьтымы СМИ-ос кулэ, вань ук федерал компаниос. Кӧня ке асьмелэнъёсыз шоры вылтӥяськыса учкылӥ. Али валасько: Удмуртия зол воштӥськиз берло дыре.

Калыкез, выжыосмес валаны мыным юрттӥз Россиысь культурая министерстволэн «Волонтёры культуры» программаяз пыриськеме но. Кылем арысен мон регионысьтымы куратор луи. Юан кылдӥз: кызьы Удмуртие вуись адямиослы верано асьме сярысь? Куд-ог волонтёръёс уг но тодо элькунмылэсь историзэ, сям-йылолъёсты. Озьы ми лэсьтӥм шаермес азинтонъя дорожной карта. Луонлык кылдӥз ёросъёсы поталляны, отысь калыкен тодматскыны. Соослы проектъёс гожъяны юрттӥськомы, асьмелэн ужмы сярысь мадиськомы.

«Волонтёры культуры Удмуртии» проектлэсь командазэ дасякум, мон валай: культура — со ӧвӧл кыӵе ке тодон-валан, кудӥз адямиез визьмогес каре. Культура — со астэ, выжыостэ, дуннеез валан-шӧдон. Удмуртия — со пичи гуртъёсын возиськись кыл, культура. Ижын улыку, уд адӟиськы адямиосты, шаермес.

Пӧртэм интыосы вуы­лӥсь­ко, тренингъёс ортчытъяса но. Чакласько, кытын кызьы ужало. Вань усто библиотекаос ёросъёсын но, туж ӟеч ужало Кияса, Глазов, Пичи Пурга. Куд-ог дыръя, оло, кыӵе ке быгатонлыксы уггес тырмы, но библиотекарьёслэн синъёссы ӝуало. Тренингъёс ортчытъякум, шуисько: ойдолэ асьмеос книжной феяос луом. Ми ваньзэ быгатӥськом, ми волшебникъёс. Библиотекаысь потыса но, библиотекарь луэмысь ум дугдӥське. #Книжныефеи хештэг пумен вӧлмиз, али сое Россиысь мукет библиотекаос но куто.

Мон понна валтӥсез — адямиос. Ачим но уг возьдаськиськы, кенеш курыса, кинлы ке вазиськыны. Малпасько, котырысь адямиослэсь котьку дышетсконо. Одӥг пумиськон но юнме шорысь уг ортчы. Улон монэ дышетӥз: озьы-а, тазьы-а, но асьмеос ог-огмылы кулэ. Тон сётӥськод ке, со берытске. Но куддыръя кӧня ке возьмано луэ.

«Мынам Удмуртие» радиоын передача нуэ
Туспуктэм: Анна Кастиль Мехиалн архивысьтыз

Улон ачиз тодэ

— Ваньзы малпало, нуналам 48 час шуыса. Со озьы ӧвӧл, дырме радъяны мон уг быгатӥськы. Ваньмыз ачиз пӧрме. Мон оскисько: улон ачиз тодэ, кызьы шонер, солы пичияк юрттоно гинэ.

Ваньмон дыръям куное ветлыны, кырӟаны яратӥсько, самодеятельной театрын шу­дӥсь­ко, суредаськисько. Дуннеез котыръяны кельше. Толэзяз 2 пол мон одно ик кытчы ке шонтӥсько — Удмуртиысь я Россиысь пӧртэм интыосы вуы­лӥсь­ко.

Вунонтэм кылиз Ямало-Ненецкой округысь Салехард городэ вуылэме. Анае жингыртэ: монэ ыштэм. Мон Салехардын, пӧй, ужасько. Синмаськи ямал калыклэн культураезлы. Кельше мыным Тюменьын, ӵем вуылӥсько Владимир улосвылэ, Москвае, Питере, Сочие. Синмаськемын Крымлы, малпасько, куке но одно ик уло зарезь дурын. Кылем арын вуылӥм Псковско-Печорской монастыре Богородицалэн успениез дыръя. Мон волонтёр вал бере, нуналлы быдэ 6 час сылоно луиз, калыкез чакласа. Нош ӝытъёсы черкысь ужасьёсын тылскем дурын пукылӥмы, гитараен шудыса, кырӟанъёс нёръяса. Мон оскон но черк шоры мукет синмын учкыны ӧдъяй. Черкын ужасьёс но воштӥськыны-выльдӥськыны, егитъёсын оградын мыныны дась.

Кунгож сьӧры нырысьсэ вуылӥ 2018-тӥ арын, Малайзиысь форуме пыриськи. Вуылӥ Малайзилэн шоркараз Куала-Лумпуре но нимаз сылӥсь Сингапур каре. Сингапурысь улон паймытӥз монэ. Отысь адямиос коньдон трос потто, но шутэтскыны воксё уг быгато, биороботъёс кадь уло. Огпол Центральной библиотекае вуи но син­йылтӥ нылпи сэрегын пукись семьяез. Анай-атай, 2 нылзы, ваньзы книга лыдӟо, ог-огенызы уг верасько. Мон юай, малы, пӧй, пиналъёсыныды уд вераськиське. Сингапурын нимысьтыз часъёс пиналъёсын ортчытыны чакламын, нош милям, пе, уг поты — ӵуказе уж дуре мыноно, кужым люкано. Пиналэн дырмес ортчытоно ке, библиотекае лыктӥськом, тодон-валанмес будэтӥськом. Нош нылпиоссы зэм но мӧзмо, соослы саклык уг тырмы, тросэз няняосын будо. Соосын кутскы гинэ вераськыны — туж шумпото, ӟабыльто, быгатонлыкъёссэс возьмато.

Нош Куала-Лумпурын мыным туж яраз. Та карын трос калыкъёс уло, пӧртэм сямъёс пӧлэстӥськемын, ваньзы эшъясько. Та инты сюлэмыя: улӥськод, ужамед уг поты ке — эн ужа, уксё поттон сярысь эн малпаськы, гитараен ульчаын шудыса, кӧня ке копейка басьтод но — тырмоз. Куала-Лумпур азинскем инты ке но, отын улон дунтэм усе. Кивалтӥсьсылы 80 арес — калык ачиз куриз сое берытскыны, малы ке шуоно со трос ӟечсэ кариз адямиос понна.

Мынам Финляндие вуылэме потэ, учкеме, кызьы отын библиотекарьёс ужало. Ми Америкаысь библиотечной ассоциациен но кусып возиськом, оло, куке но отчы но вуыло.

И. Наговицын нимо библиотекаын нылпиос выжыкылэ вуо.
Туспуктэм: И. Наговицын нимо библиотекалэн «ВКонтакте» бамысьтыз»

Палэнын сылэм уг поты

— Споръяськонъёс уг чусомо: ньылозы асьмеды туала технологиос яке уз? Бен, троссэ ужасьёсты роботъёсын воштыны луэ. Но асьмелэн мукет муртэн кусып воземмы потэ на. Кемалась дыръёсы но адямиос тылскем дуре люкаськылозы но ог-огзылы тунсыко мадёсъёс вералозы вал. Инкуазь асьмелы сыӵе сям сётӥз, оло, со ик асьмеды пӧйшуръёслэсь висъя. Мукет ласянь ке учконо — пӧйшуръёс но уллёосы люкасько.

Самоизоляция дыръя тросэз нёръязы: ку ини ужрадъёс ортчытъялоды? Ма, ачим но курадӟи. Мыным калык пӧлын яра. Дорын пукыса чик ӧй вутты, волонтёре куриськи, «ПоддЕРжка» проектэ пыриськи. Бӧрысь библиотекарьёсын остановкаосын маскаос сётъяллям, валэктон уж нуим. Мынам уг поты югдурлэсь палэнын сылэме. Война вакытэ улысал ке, мон ожмаськыны мынысал, дыр.

________

Анастасия ШУМИЛОВА

Удмурт Дунне
By Удмурт Дунне 7 июля, 2020 08:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<